Read South Giziga JDG 4 Bible Online

JDG 4 - South Giziga bible

JDG 4

¹Ehut a muc le, a dirba nah, Israyeley a zlaka gi malambaˀ a mbuŋ Bumbulvuŋ ɓula si.

²Bumbulvuŋ a vula taŋ da Yabin, buy Kanaˀan misi ar walahay Hasor a hiɗika taŋ. Buy ngi soje naŋhay a zilaka Sizera, naŋ a cifi a Haroset-Goyim.

³Israyeley a wudam ng'avu Bumbulvuŋ, asi Sizera, buy ngi sojeheye, naŋ ti mota ngi ɓiri ngi vurumoy skat skat ngoltir, yo a guzuvura Israyeleye guzuvar guzuvar, hã vi kukur cuw.

⁴Hirak ti nah na, Debora ngwas mijiviɗ ngi Bumbulvuŋ, ngwas ngi Lapidoto, maga kiita da Israyeleye i naŋ.

⁵A cifi asi dibinoji mazilaka dibinoji ngi Debora, ar wala ngi Rama ati Betel, a muwã Efrayim. Israyeley a jiɗam nga gi kiita ava a diga.

⁶Ti di numuŋ ada na, Debora a ɓi a zilaŋ Barak, mangal ngi Abinoˀam, mbur Kedes ngi ruwuy Neftali, a ɓaŋ na: «Bumbulvuŋ, Buymisemuŋ ngi Israyel a puluw jiviɗ le ani: Aru, kuso mizli a muwã Tabor, hil mizli zilehey durmuk kuruˀ angi sukwi ngi Neftali ati ngi Zabuloŋ.

⁷Sizera, buy ngi soje ngi ruwuy Yabin ati mota ngi vurum naŋhay waɗ soje naŋhaya, i sa hizigiɗo taŋ ng'avi ka a mizaw Kisoŋ, ɓa i sa vuluw taŋ asi haŋ ɗiki.»

⁸Barak a mbiɗa da Debora: «Da ki ru asi ya na hã ɓula, amma da ki ru asi ya ta na, a gi ta.»

⁹Debora a mbiɗaŋ di: «I sa ram bummoˀ ɓula so, amma ar li ka masa ru gar na, anta sa vulukuw dudok da ka ta, asi Bumbulvuŋ a sa vula Sizera asi haŋ ngi ngwasa.» Debora a slikiɗ, a ram ati Baraka nga Kedese.

¹⁰Barak a zila Zabuloŋhoy ati Neftalihey nga Kedes. Mizli mizilehey durmuk kuruˀ a ram aseˀe, joˀ Debora kwana, aru asi taŋ ya.

¹¹Heber mbur Keni, a wuɗukam le zleˀe ati mizli Keni mekelemey, dideˀ ngi Hobapay, Hobap hazeˀe ngi Moyise. Yo a nga guɗuk naŋ hã seŋ seŋ avu widis madiɗakaŋ a Saˀanayim, gweˀ avu Kedes.

¹²Mizli a soko ɓaka Sizera na, Barak, mangal ngi Abinoˀam, a jiɗ le nga muwã Tabor.

¹³Akẽh so na, Sizera a cikila mota ngi ɓiri ngi vurumoy miskat skat ngoltire cek waɗ mizli naŋhaya cek, zle a Haroset-Goyime, a ram nga mizaw Kisoŋ.

¹⁴Dar Debora a ɓa Baraka: «Slikiɗi, hin Bumbulvuŋ muvuluw Sizera asi haŋ ɗik na, a ndila le. Haˀaw, Bumbulvuŋ a ki le a mbuŋ ɗike.» Barak tuwa, a po sar ti muwã Taboro, mizli mudurmuk kuruˀ tuwa sek aseˀe.

¹⁵Akẽh na, Bumbulvuŋ a ga zluwun da Sizera ati mota ngi vurum naŋhay waɗ soje naŋhay a mbuŋ Baraka, a ngumaka taŋ ti maslalam. Sizera a pi sar tir mota ngi vurum naŋ, a kil ti sar.

¹⁶Barak a gidiɗa mota ngi vurumoy ati sojeheye, hã sesẽŋ a Haroset-Goyim. A ngizlaka soje ngi Sizeraˀahaya gar ti maslalam, ko pal tekeɗe a ndir ta.

¹⁷Dambalaka Sizera makil ti sar na ng'ar guɗuk ngi Yaˀel, ngwas ngi Heber mbur Keni, asi Yabin, buy Hasor ati hay ngi Heber, mbur Keni na, taŋ zuy zuy ar wala taŋ.

¹⁸Yaˀel a bo nga ji hirnga ti Sizera, a ɓaŋ: «So ci a hay ɗu kumani ɗu, so ci a hay ɗu, ki zluwun ko neˀ ta» A ci ngi hay ar guɗuk ngi ngwas tuwa, a sirtaŋ borgo sirit.

¹⁹Sizera a ɓa ngwas tuwa: «Yam ara giy, inga vuliy yam ngi si neˀ takwa.» Ngwas tuwa, a wuna kwenekwene ngi ɗuwa wun, a vulaŋ di, a si, waɗ a sirta sirit ti borgo tuwa a muŋ.

²⁰Sizera a ɓa ngwas tuwa ma: «A ra cici deŋ avu miviŋ ngi guɗuko, da mbur a so, a cufuɗuw le: mbur ada aka kwa na, ɓaŋ: mbur anta.»

²¹Amma Sizera a gir le kupuyah wãˀ, a hinje le ɗokɗok. Yaˀel, ngwas ngi Hebere, a zuɓ dum ngi guɗuk waɗ tokom ngi ɓiri, aru jibaˀ jibaˀ ng'avaŋ. A diraŋ dum ngi guɗuk tuwa, dar ar li tinik, gor njoŋ, hã dar a ruwuy. Sizera a muc simtraˀ.

²²Dambalaka Barak ara supo Sizera. Yaˀel a bi nga ji di hirngaŋ, a ɓaŋ: «Sawa i buguw mbur ka masipa na.» Barak a ci ngi hay ngwas tuwa, keɗ na, Sizera i mumuca naŋ simtraˀ a ruwuy, dum a ro sĩw ar li tinike.

²³Tapasa, Yabin buy Kanaˀana Bumbulvuŋ a maŋ le a ruwuy a mbuŋ Israyele.

²⁴Israyeley ara ɗuvam ɓihey hirisl hirisl ti gidaŋ da Yabin, buy Kanaˀana hã a kiɗaka mi naŋ gbaˀ na si.