Read South Giziga JDG 5 Bible Online

JDG 5 - South Giziga bible

JDG 5

¹Tapasa, Debora ati Barak mangal ngi Abinoˀama, a zlaka dimis ani:

²«Angi hirwuy Israyele, da mizli a vulaka vu taŋ le taˀ wãˀ, da a pulaka vu taŋ le mbak wãˀ ngi mongoy taŋ na, gaka sise da Bumbulvuŋ.

³Kum buy madiɗahay, cinam, kum buy mimaɗiɗahay jikam slimiɗe! Yi wuɗ i zli dimis ngi hunuma Bumbulvuŋ. yi wuɗ i gi muguzlum da Bumbulvuŋ, Buymisemuŋ ngi Israyele.

⁴Bumbulvuŋ, ti ka mapo sar ti muwã Seˀir, ti ka maso ti ruwuy Edom na, hirwuy a jijik, muŋ a po vuŋ, gazlavay a po yam.

⁵Muwãhay a cifam virzi a mbuŋ ka Bumbulvuŋ ngi Sinaya, a mbuŋ ka Bumbulvuŋ, Buymisemuŋ ngi Israyele.

⁶Ar hin ngi Samgar, mangal ngi Anat, ar hin ngi Yaˀele, zuɓa mulak hiɗim hiɗime, a kiɗ mi le, yo mizli mazuɓam mulaka, a ram tir jiviɗ mugun gunoy.

⁷Mizli anta ar walahayaya mata, asi ruwuy Israyele, mizli anta mata, hã sey tapas, ya Debora mubawa, hã sey tapas ya Debora mubawa, ya mumuŋ ngi Israyeley.

⁸Mizli Israyeley a wunam kulihey, dambalaka vurum a ndilo taŋ le a duba sar. Soje durmuk kukur mufaɗ asi ruwuy Israyele, amma ko mbaray malla ziwit purla tekeɗe anta asi haŋ taŋ ta.

⁹Mevel ɗu naŋ ar miwi Israyeley, naŋ ar mizli muvulaka vu taŋ le taˀ wãˀ ngi mongoy taŋ. Gaka sise da Bumbulvuŋ!

¹⁰Kum mizli majiɗam ar madiya zungu babarahay, kum macifam ar tapihey, yo kum mizli muzuɓa jiviɗey, wulkam.

¹¹Mijiginey ar li vula yam da gineweye, ara slufaka ɓi ngi Bumbulvuŋ mulum bugawla, naŋ mulum bugawla ti gidaŋ naŋ asi ruwuy Israyel. Akẽh na, mizli ngi Bumbulvuŋhay a pam sar nga mizlingreŋ.

¹²Debora, puɗuku, puɗuku! Puɗuku, puɗuku, zuɓa dimis ngaŋ avu mi. Barak, mangal ngi Abinoˀam, slikiɗi, mo ti mizli mija ɗikeye.

¹³Dar mizli mindiram ti siyfa, a jumom ng'avu buyoy, mizli ngi Bumbulvuŋhay a soko ng'avi ya ti wuzla bugawlahay.

¹⁴Bugawla Amalekey a soko ti Efrayim, Benjamin a sipa taŋ ɓaˀ a dirba ɗike ti soje ɗikey, miwi sojehey a soko ti Makir, yo miji ganday ngi buy miwi liheye, a soko ti Zabuloŋ.

¹⁵Buy ngir sukwi ngi Isakaraya taŋ ati Debora. Barak i mbur ngisi Isakar, a ki ɓaˀ aseˀe ar li micaya. Angi muy ngi Rubeneye, ngilawuy a gi le haɗa.

¹⁶Ki cifi ar wala ngi gezleŋhey, ɓa ki cin tuwuy ngi ginewey vur mike? A wuzla muy ngi Rubeneye, cufuɗ a gi le haɗa!

¹⁷Galaˀat a cifi hã duba Zurdeŋ. Na, Daŋ, ki cifi ar palalam ngi yamay vur mike? Aser a ndir a mi mubuliy, yo a cifi gweˀ avu li pi sar ngi palalam naŋhay.

¹⁸mizli ngi Zabuloŋhoy a ndiram mata ngi mucu, waɗ mizli ngi neftalihey ar li gi vurumo.

¹⁹Buyoy a soko, a kiɗam vu, buy kanaˀanay, a zlaka kiɗa vu, a Taˀanak, gweˀ a mi yam Megido, amma ko gwat ngi vurum, ɓiri bara a lumam ta.

²⁰Wurzlaŋhay a kiɗam vu a dadala muŋ a diga, zle ar hay taŋhay a diga, a kiɗoko Sizera.

²¹Mizaw Kisoŋ a kil taŋ le leɗeɗ, Mizaw Kisoŋ, mizaw mivi! Akum nga mbuŋ ti kiɗa vu!

²²Dar sar ngi pilisey a hurmom a ruwuyo, a kukurom, a kukurom kaɓa pilisey mapam taŋ mi.

²³Modro ngi Bumbulvuŋ a ɓi na, nisaka walahay Meroso, nisaka mizli ngi raˀahaya, asi a kiloko widi ngi Bumbulvuŋ ta, a kiloko widi ngi Bumbulvuŋ ati bugawlahaya ta.

²⁴Yaˀel, ngwas ngi Heber, mbur Keni na, anja Bumbulvuŋ a ɗuwuluw mi, anja a ɗuwuluw mi a wuzla ngwas micifa ngir guɗukoyo gar!

²⁵Sizera a cufuɗ yam na, naŋ a vulaŋ ɗuwa, a vulaŋ wursla angi sikiɗ ngi buyoy.

²⁶A tila haŋ til ng'avu dum, a tila haŋ hazumo ng'avu tokom ngi ɓiri ngi migi slrahay, a kiɗa Sizera, a hirnga kuyop, a kiɗaŋ, waɗ li tinike mangil hoyoɓ hoyoɓ.

²⁷A diɗ ndirɗaɗ asi sar naŋ, simtiraˀ, a diɗ ndirɗaɗ asi sar naŋ, simtiraˀ, li naŋ midiɗ ndirɗaɗ ara na, a muc wãˀ ara.

²⁸Mumuŋ ngi Sizera a puro hiri tir ɓiri munjororo, hirnga girizlzle tir fenetire, a puro hiri, dar a ɓi: Mota ngi vurum naŋ a muro kahana vur mike? Mota ngi vurum naŋhay a soko zãyaˀ zãyaˀ vur mike?

²⁹Ngwas misi sinmijileŋ ngi wuzla cil naŋhay a mbiɗaŋ di: a maŋ di, a ɓaŋ na:

³⁰‹Ko mbri na, a roko hilam zlili ar vurum, yo a roko ar li wunuk naŋ takwa? Vur mbur migi vurum gar na, diili mija purla malla cuw takwa? Zana misi yam wal wal ava waɗ midira le dar dar da Sizera, zana midirahay le cuw ngi luw asi ˀay ngi diili mijahay le.›

³¹Bumbulvuŋ, anja mesene ɗikey a ngizlam gar kahana, amma ngama ɗikeye, anja a ndiram kaɓa pas majiɗo ti jiɗ aruŋ.» Joˀ hirwuy a ndir setette vi kukur mufaɗa. Sukwi ngi Benjameŋ a sipataŋ, a jum ng'ar ngay taŋ