Read South Giziga JDG 7 Bible Online

JDG 7 - South Giziga bible

JDG 7

¹Zedeyoŋ, a zilaka Yerubaˀal ma. Zedeyoŋ a slikiɗam ngi li biŋ biŋ ati mizli ngi seˀeheye, ara pam sar gweˀ a ciki miviɗiviɗi ngi yam a Harot. Amma li pi sar ngi Madiyanaya, naŋ kini tir vay muŋ, a ciki muwã More, ar li micay.

²Bumbulvuŋ a ɓa Zedeyoŋ na: «Mizli ɗikeye taŋ haɗa, y'anta vula Madiyanay asi haŋ taŋ ta. Naɓa Israyeley a sa huhumom vu, a sa ɓam: ‹I laham ti gidaŋ ndra!›

³Na zle, ɓa mizli: ‹Ko wa gar majijik ti zluwun na, anja a mi ngi hay, a bi ti muwã Galaˀat!›» Mizli durmuk cuw a wuzla taŋ, a mam ngi hay, a ndiram durmuk kuruˀu.

⁴Bumbulvuŋ a ɓa Zedeyoŋ na: «Mizli taŋ haɗa aruŋ na si! Ɓa taŋ ɓa a pam sar nga mi yam, i sa pura taŋ a diga. Naŋ kine, da i ɓuw le: mbur hana, aru asi ka na, a ru. Da i ɓuw le: mbur hana, aru asi ka ta na, aru ta!»

⁵Dar Zedeyoŋ a pi sar ti mizli nga mi yama. Bumbulvuŋ a ɓa Zedeyoŋ: «Ko wa gar masa zluva yama nga mi kaɓa kiri na, gwaha pal. Yo ko wa gar masa sa yama guɓ ti guɓ na, gwaha naŋ pala ma.»

⁶Mizli mazluvaka yama ti zluv nga mi ka kirey na, taŋ skat skat makir, is ngi mizli gar, a saka yama guɓ ti guɓu.

⁷Bumbulvuŋ a ɓa Zedeyoŋ ma: «Ya masa luhukum, yo ya masa vulukum Madiyanay asi haŋ kum na, tisi mizli miskat skat makir, muzluvaka yam nga mi ti zluv na. Anja vendeke ngi mizli a mam cek ngi hay taŋhay.»

⁸Mizli miskat skat makir tuwa, a hilaka gwat ngi zum mizli muwam taŋ vu ngi zuɓa jiviɗe waɗ tulum taŋhaya. Akẽh na, Zedeyoŋ a ɓa vendeke ngi Israyeleye ɓa a mam ngi hay taŋhay, a ndiram ati mizli miskat skat makir na ɓula. Li pi sar ngi Madiyanaya, naŋ tir vay ruwuy ar li micayya.

⁹Ngi duvuɗ nah na, Bumbulvuŋ a ɓa Zedeyoŋ: «Slikiɗ, pi sar ng'ar walahay guɗuk ngi Madiyanaya, asi i vuluw taŋ le asi haŋ ɗiki.

¹⁰Amma ani ki ra zluwun ngi pi sar nga kiɗa vu ati taŋ, na pam sar ati gawla ɗik Pura.

¹¹Ki sa cine taŋ maɓam a diga ayɗi. A dirba nah, kisa lum gidaŋ ngi pi sar nga diga.» Zedeyoŋ a pam sar ati gawla naŋ Pura, hã sesẽŋ avu li cici mudumbuŋ ngi sojehey.

¹²Mizli Madiyanay, Amalekey waɗ mizli maslikiɗam aka aka, misi tisi pas ngi miprike, t'ada sikinih ar li micaya, kweslekwesle kaɓa jaray, zlogomo taŋhay a slufam ta, taŋ haɗi kaɓa muyuŋ a mi mubuliy.

¹³Hirak ti Zedeyoŋ mandilo na, naɓa mbur ada, ara slufa ɓi ngi musuwun naŋ da cil naŋ, a ɓaŋ: «Cin ɗi, i musuwun ani wureˀani: I pur ɗaf mida ti hapa ngi daw giziŋ, ara putukul ar walahay guɗuk ngi madiyanaya, ara lum guɗuk a mbuŋ, ara dumbusla guɗuko, a putukusoŋ, a ndir ginjiɓaɓ mirkendel!»

¹⁴Cil naŋ tuwa, a mbiɗaŋ di: «Ko mbri, i maslalam ngi Zedeyoŋ, mangal ngi Yoˀas, mbur Israyel na si. Buymisemuŋ a vulaŋ Madiyanay ati walahay guɗuk taŋ gar asi haŋ naŋ.»

¹⁵Zedeyoŋ micina ɓi ngi musuwuno cin cin waɗ pulaˀvra naŋ si na, a huruk huruk, a dirba nah, a mi ng'ar walahay guɗuk ngi Israyeley, a til mi: «Slikiɗam! Asi Buymisemuŋ a vula walahay guɗuk ngi Madiyanaya le asi haŋ ndra.»

¹⁶Zedeyoŋ a wunka mizli miskat skat makir tuwa, a wuzla makir. A wuɗuka taŋ tulumoy gar taŋ, tutuŋhoy njoŋ njoŋ kine waɗ daliivuhoy kulaˀ kulaˀ ar tutuŋhoy tuwa.

¹⁷Dar a ɓa taŋ na: «Ki sa purikiy, yo kisa suluɓoko mi ɗu! Ti ya misa ndil le a mi li pi guɗuko na, gwat ya masa ga gar na, kisa gaka ya.

¹⁸Ya ati mizli ngisi yahaya cek, i sa faka tulumo. Kumo kwana, kisa faka ndah ndah hirnga ngi li pi guɗuko gun aya, yo kisa wudam aseˀeŋ: Ar slimiɗ ngi Bumbulvuŋ ati ngi Zedeyoŋ!»

¹⁹Zedeyoŋ ati mizli miskat ngi seˀeheye, ara ndilam a mi li pi guɗuko, gweˀ ng'avu wuzla duvuɗu. A mbiɗaka mijigina li le wureˀ. Ti Zedeyoŋ ati mizli ngi seˀeheye, a hizigaka tulum kãh kãh, a wahaka tutuŋ taŋhay tuwa kpoh kpoh.

²⁰Akẽh na, mizli mitaˀ taˀ ngay mucuw mekelemey tuwa, a faka tulumoyo, a wahaka tutuŋ taŋhaya ya. Daliivuhoyo kaw kaw ti haŋ gula, waɗ tulumoyo ti hazum, a wudam: «Ar slimiɗ ngi Bumbulvuŋ waɗ ngi Zedeyoŋ.»

²¹Ti taŋ mideŋ deŋ gun hirnga li pi guɗuk vuna na, mbur gar deŋ arleˀe ngbaŋ. Amma mizli a waham ngbuw ar walahaya, widi cǝruw cǝruw, ara kilam.

²²Tulum miskat skat makir tuwa mazilam mi na, Bumbulvuŋ a zlira Madiyanay ar li pi sar ti guɗuko keɗeɗe, a ngumam vu ar wala taŋ tehhe a muŋ. Mizli gar ara kilam, hã sesẽŋ a Bet-Sita, jik dibiɗ nga Sereda, hã sesẽŋ a mi mizaw Abel-Mehola, gweˀ avu Tabat.

²³Akẽh na, a ziloko Israyel ngi Neftaliheye gar, ngi Aserey waɗ ngi Manaseheye, a sipaka Madiyanay tuwa.

²⁴Zedeyoŋ a slin mizli ng'ar walahay vay muwãhaya cek, a ɓaka mizli na: «Pam sar nga pa hiri da Madiyanaya, tikaka mi yamaya, zle a mi mizaw Zurdeŋ hã sesẽŋ a Bet-Bara.»

²⁵A jaka Orep ati Zep, buy Madiyanaya cuw taŋ. A kiɗaka Orepe, a muwã Orep, yo Zepe kwana, ar li ma ɗucom gudubun a Zep. A dirba nah, a sipaka Madiyanay ava, a bukoko hirnga ngi Orep ati ngi Zepe, a ram taŋ da Zedeyoŋ a duba zaw Zurdeŋ hã sesẽŋ gweˀ avu li cici mudumbuŋ ngi sojehey.