Read South Giziga JDG 8 Bible Online

JDG 8 - South Giziga bible

JDG 8

¹Mizli Efrayimey a ɓaka Zedeyoŋ na: «Ki gi ti ndra kahana vur mike? Ka muru nga kiɗa Madiyanay na, ki zila ndra ta vur mike?» A slikiɗam himaˀ fõh fõh ng'araŋ.

²Amma Zedeyoŋ a ɓa taŋ: «Ya vuna i mi gi ngi ndila ngi kumo ka? Holok ngi gudubun Efrayimey migaka na, a funa Abiyezer miga sifi naŋ vuna ta kwa?

³Bumbulvuŋ muvula buy Madiyanay, Oreɓ ati Zeɓ na, asi haŋ kum ngbaŋ. Gwat ya miga ngi wi ati ngi kum vuna, i gwat mike?» Zedeyoŋ miɓa taŋ ɓi hana na, a tisla taŋ mevel so.

⁴Zedeyoŋ ati mizli naŋhay miskat skat makir tuwa, a ndilam a mi mizaw Zurdeŋ, a tuwuɗakaŋ. A giram le ngbaŋ, amma ara sipaka Madiyanaya na si.

⁵A ra ndilam ar walahay Sukot, Zedeyoŋ a ɓa mizli ngi digahaya na: «Inga vulaka helelem makala da mizli ngisi yahay na so, ani a giram le. I sipi di i buy Madiyanay, ti Zeba ati Salmuna.»

⁶Amma buy Sukotoy a ɓakaŋ: «Ɓa i vulaka gwat ngi zum da mizli ɗikey na, ki wa Zeba ati Salmuna vuna le si kwa?»

⁷Zedeyoŋ a mbiɗa taŋ di: «Naŋ kuy! Da Bumbulvuŋ misa vuliy Zeba ati Salmuna le asi haŋ ɗu na, i sa cupukum ti hadaw waɗ ti titif ngi wuzlaɓuh mikirɗak kirɗak.»

⁸Zedeyoŋ aru ti kẽh nga Penuwel, a ɓa mizli ngi digahaya kanah ma. Mizli Penuweley a mbiɗakaŋ di misi purla ati ngi mizli Sukotoy tuwa.

⁹Zedeyoŋ a ɓa taŋ: «Da yi mo le njiraŋ na, i sa mbizla hay musubur hana avra.»

¹⁰Zeba ati Salmuna a roko a Karkor ati soje taŋhay, a gam gwat ngi durmuk ti skat skat zlum gu. Mizli misi tisi pas ngi miprike, soje taŋhay mindirama, i taŋ tewle. Naŋ kine, mizli taŋhay misinaka kiɗa vu le ti maslalama, taŋ durmuk skat ti kukur cuw zleˀe, a kiɗaka taŋ le vagay vagay.

¹¹Zedeyoŋ a ja jiviɗ ngi mizli maslikiɗam aka aka, misi tisi pas ngi miprik ngi Noba ati Yogboha. A kiɗa sojeheye, sojehey a puraka zleˀe kaɓa a roko piyaŋŋa a diga.

¹²Zeba ati Salmuna, a hilaka kil, amma Zedeyoŋ, naŋ ɓaˀ asi taŋ, a ja buy Madiyanay mucuw tuwa, Zeba ati Salmuna. A Ya zluwun cak cak da soje taŋhaya gar.

¹³Zedeyoŋ mangal ngi Yoˀasa, ara mo tir li kiɗa vu, baɗ tir li jiɗ ngi Heres.

¹⁴Zedeyoŋ a ji gawla Sukot pal, a cufuɗaŋ, a tohoŋ slimiɗ ngi buy Sukotoyo cek waɗ mizli micawwahaya. A gam jom gar, mizli kukur tarnaˀ ti tarnaˀ.

¹⁵Akẽh na, Zedeyoŋ aru ng'avi mizli Sukotoyo so, dar a ɓa taŋ: «Ki ɓikiy vur ɓi ngi Zeba ati Salmuna: ‹ki wa Zeba ati Salmuna le, ɓa i vulaka gwat ngi zum da mizli ɗikey migiram le kwa tuwa na, ki sinaka le aruŋ ya?› Yawwa! Na Zeba ati Salmuna t'ani.»

¹⁶A hil hadaw ati titif ngi wuzlaɓuh mikirɗak kirɗak tuwa, a kuta mizli micawwa ngi Sukotoyo ti naŋ.

¹⁷A waha hay musubur ngi Penuwele, a kiɗ mizli ngir walahaya sunok sunok.

¹⁸Dar Zedeyoŋ a ɓa Zeba ati Salmuna: «Mizli kum mikiɗaka taŋ ar muwã Tabor na, taŋ mbrike?» A mbiɗakaŋ di: «A bam vu ati ka. Mbur gar asi taŋ a gi kaɓa zuŋ ngi buy.»

¹⁹Zedeyoŋ a mbiɗa taŋ di: «I sukum ɗuwoy, mumuŋ ndra purla! Ti slimiɗ ngi Bumbulvuŋ misi ti siyfa, da ki kiɗaka taŋ zleˀe ta na, anja y'anta kuɗukum ta ya.»

²⁰Dar a ɓa Yeter mangal naŋ modogomo: «Slikiɗ, kiɗa taŋ vagay vagay!» Amma gawla tuwa, a muɗa maslalam naŋ ta, asi i zuŋ aruŋ, ara zluwun.

²¹Zeba ati Salmuna, a ɓakaŋ so na: «Ka vuna slikiɗ, kiɗa ndra tihaŋ ɗike, asi maga gwat hana gu na, sey i mbur mindila le!» Dar Zedeyoŋ a slikiɗ, a kiɗa Zeba ati Salmuna vagay vagay, a dirba nah, a cuko gwat ngisi ˀay ngi zlogomo taŋhaya.

²²Mizli Israyeley a ɓaka Zedeyoŋ na: «Ka vuna, cifi buy ndra ati mangal ɗike, waɗ dideˀ ɗik nga mbuŋ, asi ki laha ndra le tisi haŋ ngi Madiyanaya.»

²³Zedeyoŋ a mbiɗa taŋ di: «Masa cifi buy kum i ya ta, yo i mangal ɗu ta ma. Anja macifi buy kum i Bumbulvuŋ!»

²⁴Dar Zedeyoŋ a ɓa taŋ: «Yi wuɗo cufuɗukum gwata ani ɓula: Vulikiy dangwa kum mulumoko taŋ ar vurum na pal pal!» Naŋ kine, mizli taŋ mipaka taŋ hirnga na, t'ada ti dangwa ngi ɓiri tapasl tapaslay, asi taŋ i Israyeley zleˀe.

²⁵A mbiɗakaŋ di: «Haˀaw i vulukuw taŋ!» A ciyam godo cay, yo mbur gar a hizig dangwa naŋ mulumo di ar vurumo pal pal ng'araŋ.

²⁶Dangwa ngi ɓiri tapasl tapasl Zedeyoŋ mucufuɗa tuwa, a cikil kilo kukur cuw. Gwat ngi wuyahay, gwat ngi slimiɗey, zana munduva naŋ ndezze ngi buy Madiyanay maka ka na, a slufa taŋ ta. Yo virzle ngisi ˀay zlogomo taŋhaya, a slufa ta ma.

²⁷Zedeyoŋ a ɗiyi di kuli, a jika jak a, walahay naŋ. Israyeley gar a huruk hurukam a mbuŋ kuli nah. A tiri avu Zedeyoŋ ati mizli ngi hay naŋhaya, i diɓel ngi kiɗ taŋ.

²⁸Naŋ kine, Madiyanay a hinam hirnga a mbuŋ Israyele, ko a zuɓaka hirnga kaˀ a muŋ gu ta. Hirwuy a cifi zuy zuy ar siyfa ngi Zedeyoŋ hã vi kukur mufaɗa.

²⁹Yerubaˀal, mbiɗeˀvra Zedeyoŋ mangal ngi Yoˀasa, a cuh, ara cifi a hay naŋ.

³⁰Ziri mikwanay ngi Zedeyo hoyo, taŋ kukur tarnaˀ, asi naŋ ti ngwasay haɗi.

³¹Ngwas mangasl ngi Zedeyoŋ ada a Sikeme, naŋ kwana, a yaŋ mangal mizile le pal, a caŋ slimiɗe Abimelek.

³²Zedeyoŋ mangal ngi Yoˀasa, a sa muc na, naɓa a gi midigila le ar wuya. A dikaka a Ofra, walahay ngi sukwi Abiyezer, ar zivi ngi cine naŋ Yoˀas.

³³Amma a dirba Zedeyoŋ mumuc na, Israyeley a zlaka huruk huruk a mbuŋ Baˀala si ma, a puraka Baˀal-Berite kaɓa Bumbulvuŋ.

³⁴Israyeleye, Bumbulvuŋ Buymisemuŋ taŋ, miloho taŋ tisi haŋ ngi mesene taŋhay migun hirnga taŋ na, a puyukom di hirnga le.

³⁵Zedeyoŋ a ga mezle le haɗi da Israyele ngbaŋ, ɓa a ɓam taŋ i muy ngi Zedeyoŋ mazilaka Yerubaˀal ma na, ko a ɓam ɗaˀ ta.