Read South Giziga JUD 1 Bible Online

JUD 1 - South Giziga bible

JUD 1

¹I ya Yude, gawla ngi Yesu Kristu. Ya sukum ngi Zak matuhukum ɗerewol hana da kum mizli, Cine ndra Buymisemuŋ muzulukum, muwuɗukum, yo miwi vu ti kum da Yesu Kristu na.

²Anja Buymisemuŋ a gukum mezle, a vulukum zuy, yo a vulukum wuɗavu haɗa haɗa.

³Ngama ɗuwoy, ɓi ngi laha vu, ndra mujom gar ndra anga na, i wuɗ le zleˀe haɗa, ɓa i tuhukum ɓi naŋ. Ya mupura i tika ˀay avu ya na, i tuhukum di ngi vulukum gidaŋ ɓa ngi cika vu asi ɓi ndra matiɓaka, Buymisemuŋ muvula wãˀ da mizli naŋhay na.

⁴Asi mizli mizirɗa mihey ada, a coko le a wuzla kumo, kiita taŋ i mutoho le zlezle daf dumbuŋ si. Gi mezle ngi Buymisemuŋ miga ndra di na, a tiram di ɓi ngi sulome. Buy ndra Yesu Kristu, madiɗa ndra pal i naŋ na, a jam mi, a ɓam a sinakaŋ ta.

⁵Ko da ki sinaka ɓi hana le gar tekeɗe kwana, i ra mukum hiri naŋ ava, asi ti Bumbulvuŋ muloho mizli naŋhay gar ti ngi hirwuy Ezipte na, a dirba nah, mizli mungumam tiɓi ta gar na, a ziza taŋ le.

⁶Modro ngi Buymisemuŋhoy micifam ar li naŋ muvula taŋ di na ta, yo mupulaka li cifi taŋ na, a juwa taŋ le kaŋ kaŋ ti celelu hã ngi set, a wi taŋ vu le weˀ angi luvuŋ, ngi kutuko hin madiɗa ngi kiita.

⁷Sodom ati Gomor waɗ prok ngi ciki taŋhay gar ma na, a vulaka vu taŋ ar gi sulome kanah ya, yo a ram ti kil ngi sipi cil taŋhay ngi hin, a sa sam bonoy ar vu ngi sete, yo gi gwat taŋ i ngi ki mumuyuŋ zay sla a slimiɗ mizli gar.

⁸Naŋ kanah ya, mizli mibiyãˀ biyãˀ tayna, ara jupaka vu taŋ tehhe a muŋ, ara puraka gidaŋ ngi Buymisemuŋ hiris le, a zaka gwat misi dudok ngi muŋhoyo.

⁹Ko Misel, buy ngi modro ngi Buymisemuŋhoy vuna, a ga gwat hana ta. Ngi pas numuŋ, ti taŋ mitiram ati Milyam, taŋ mingilam mi ar zuɓa vagay ngi Moyis na, Misel a guf gaf le ngi ga kiita ngi za Milyama ta. Amma a ɓaŋ: «Anja Buymisemuŋ a kutuw ti bonoy.»

¹⁰Amma mizli tayna, gwat taŋ misinaka ta si na, a zaka si, yo gwat taŋ misinaka ti wuluk taŋ misi ka ngi gwat ngi ɓuhoy, wuluk taŋ migilaw gilaw na, i gwat nah masa ziza taŋ tewle.

¹¹Kay! Taŋ ar bonoy, asi a sipam di i jiviɗ ngi Kayẽ. A pulaka vu taŋ da slir, ɓa ngi luuma dala kaɓa Balaˀam, yo a zizam kap kap wãˀ, asi a slam himaˀ le avu Buymisemuŋ kaɓa Kore [1].

¹²Mahiryaka zuma ɗaf ngi kum sukumuŋhoy na, i taŋ vuna, ti zuma gwat taŋ mifineˀ gidaŋ, hã a mbam manja mesem na. Taŋ kaɓa gazlavay manja yam, himiɗ makil di sikikiki. Taŋ kaɓa widis ngi mohoroy, ko da i hin ngi yi taŋ tekeɗe kwana anta yam ta. Kaɓa widis muputukusohoy le, slaslalak yurkok yurkok avra, mumucahay le wãˀ.

¹³Gi gwat taŋ ngi mesem na, a vunohoko di kaɓa diɓel ngi yam mangi a mizaw, mago mongofok jiv jiv, taŋ kaɓa wurzlaŋ ngi muŋhoy mizizam le. Buymisemuŋ a ɗiya taŋ li le angi luvuŋ titra mukuy ta wãˀ.

¹⁴Henok, mbur mitarnaˀ naŋ, zle avu Adamu na, a njik ɓi le vur taŋ, a ɓi na: «Puraka, Bumbulvuŋ, ara sawa ati modro naŋhay gwat ngi durmuk kukur mbeˀ mbeˀ,

¹⁵ɓa ngi ga kiita da mizli gar. Mizli mizirɗa mihey gar na, a sa ga taŋ kiita vur gwat ngi gi taŋ malambaˀ na, yo vur mingiɓi ngi sliŋ ngi mizli migi mungra tayna maɓaka ar naŋ na.»

¹⁶Mizli tayna, t'anta cinam ndum ta ndrehhe, ara mbulom mi. Taŋ vur may gwat ngi vu taŋ tew si. A ɓam ɓi ngi huhumvu taŋ. Mizli zliv li lum ada avu taŋ na, a puram mupuɗaw i taŋ.

¹⁷Ngama ɗuwoy, kumo na, ɓi ngi mislin ngi Buy ndra Yesu Kristuhoy muɓukum di zleˀe daf dumbuŋ na, wulkaka keŋ.

¹⁸A ɓukum na, angi hin ngi dirbahay na, mizli mekelemey a sa singiram ar kum, a sa gam may gwat ngi dumvu taŋ mahĩyã.

¹⁹Macoko ti wunkaˀay a wuzla mizli na, i taŋ vuna. Wuluk taŋ i wuluk ngi mizli si. ˀUf ngi Buymisemuŋ anta a hur taŋ ta.

²⁰Amma kumo na, ngama ɗuwoy, a ram nga mbuŋ nga mbuŋ ar tiɓi. Diram dibiɗ ti gidaŋ ngi ˀUf Mipal.

²¹Cicam ar wuɗavu ngi Buymisemuŋ, kutukoko gimezle ngi Buy ndra Yesu Kristu masa vulukum siifa ngi set na.

²²Mizli muroko wulkam cuw cuw na, puraka taŋ ˀircece.

²³Lohoko taŋ, ɗuɗoko taŋ ti gidaŋ tir vu. Puraka ˀircece da mizli mekelemeye, amma ti zluwun araŋ, hirsaka kpak taŋ hã avu zana taŋhay, dumvu taŋ migi mungra majupa taŋ di na.

²⁴Mbur majiginukum gu ɓa ki ndilam ar mungra ta, yo mandil ti kum gu manja hereweɗ, ti mumul haɗa a mbuŋ naŋ misi ti dudok haɗi,

²⁵yo Buymisemuŋ mupurla tew, Milih ndra tisi Buy ndra Yesu Kristu na, anja hunum, dudok, madiɗa waɗ gidaŋ gar a ndir da naŋ zle dumbuŋ angi naŋ miga gwatay gar, zle wurenna hã ngi sete. Amin.