Read South Giziga REV 1 Bible Online

REV 1 - South Giziga bible

REV 1

¹Gwatay magam na, Yesu Kristu a njika taŋ le ar li babara. Gwatay masa gam gweˀ na, Buymisemuŋ a pulaŋ ɓi nah ɓa a biga da gawla naŋhay. Kristu a slina modro naŋ ng'avi gawla naŋ Zaŋ, ɓa a bigaŋ ɓi nah.

²Gwat Zaŋ mupura gar na, a biga le njah kaɓa i ɓi ngi Buymisemuŋ, yo i sedewo Yesu Kristu minjikaŋ di.

³Mbur maslufa ɗerewol hana, kay, naŋ ar wuya! Mizli macinam ɓi Buymisemuŋ manjika hana na, waɗ mutohoko angi ɗerewol hana gar, a jaka a hirnga na, kay, taŋ ar wuya, asi hin a ndilo le gweˀe.

⁴I ya Zaŋ matoho ɗerewol hana da cikil ngi misikristuhoy ar lihey taˀ taˀ tarnaˀ angi hirwuy Azi. Anja ki lumam gimezle ati zuy tivu Buymisemuŋ misi dana, misi zleˀe, waɗ masa sawa. Yo tivu ˀuf mitarnaˀhay, misi aciki li cifi ngi zumabuy naŋ na.

⁵Waɗ tivu Yesu Kristu, mbur migi sedewo mikaslsla, modogom mislikiɗ dumbuŋ ti wuzla mumucahay, yo Buy miwi buy madiɗa ngi ruwuyoy. Kristu ara wuɗ ndra, a tuɓo ndra le tivu mungra ndraˀahaya ti pumbus naŋ.

⁶A vula ndra zumabuy, yo a tiri ti ndra masayay ngi gi mikuli da Cine naŋ Buymisemuŋ. Anja mizli a gakaŋ dudok, yo a sinaka, naŋ gidaŋ, hã ngi set, ngi samadin! Amin.

⁷Puraka, ara sawa a wuzla gazlavay. Mbur gar a sa puraŋ, ko mizli mizligakaŋ gor njoŋ na kwana, a sa purakaŋ. Haˀaw! Sukwi ngi mizli ngi ruwuyoy gar a sa tuwam tuwuy ngi vagay ˀirslik ˀirslik aseˀe. Amin!

⁸Bumbulvuŋ, Buymisemuŋ a ɓi: «Yi Alfa, yi Omega. Yi Buymisemuŋ misi dana, misi zleˀe, masa sawa, yo misi gidaŋ wãˀ.»

⁹Ya Zaŋ, sukum kum. Ar ya mujom ati Yesu Kristu na, y'ada ati kum angi bonoy, angi zumabuy, waɗ angi ɓusaɓi ma. Ya ar matura ngi Patmos, asi ɓi ngi Buymisemuŋ waɗ asi ya magi sedewo ngi Yesu.

¹⁰Ti hin ngi Bumbulvuŋ na, ˀUf Mipal a so angi ya, dar yi cin ˀay kaɓa ngi mbur maɓi ti dirba ɗu ti gidaŋ, a cin ka tulum,

¹¹a ɓi: «Gwat ka mapura na, toho angi ɗerewol, yo slin di da cikil ngi misikristuhoy misi ar lihey taˀ taˀ tarnaˀ: a Efez, Simirna, Pergam, Tiyatir, Sardes, Filadelfi, waɗ a Lawdise.»

¹²I mbiɗi hiri ɓa i pura, da maɓiy vuna i waka na, pulaˀ na, keɗ na, li ɗuva lampehey tarnaˀ, mipa taŋ ti ɓiri tapasl tapasl,

¹³waɗ mbur mubam vu ati Managal ngi mbur deŋ a wuzla li ɗuva lampehey mitarnaˀ tuwaŋ. A ki jibe silmir sesẽŋ a ruwuy. Kanda ngi ɓiri tapasl tapasl, hir a didaka.

¹⁴Hirnga naŋ ati himac hirnga naŋ, babara tullo ka ngwic ngi tumuŋ babara, naŋ ka gugumay. Hiri njilim njilim kaɓa vu.

¹⁵Saraya kaɓa ɓiri gaza mikuleɗ kuleɗ mupaka ti pi. ˀAy naŋ maɓi na, a cin kaɓa hurum ngi yam angi mubuliy madiɗa.

¹⁶Wurzlaŋhay tarnaˀ a hur haŋ hazum naŋ, yo maslalam muyoŋ mi, mazum ti ka ti ka, ara bo ti balama. Mihiri naŋ wilik wilik kaɓa pas mazlum ti wuzla papas.

¹⁷Ti ya mupura keɗ na, yi diɗ simtiraˀ asi sar naŋ ka mumuca. A buca haŋ hazumo bac angi ya, dar a ɓiy: «Ki zluwun ta, yi mudumbuŋ, yi ngi dirba,

¹⁸yo ya ti siifa. Yi muc le zleˀe, amma pura, y'ani ti siifa hã ngi sete. Lakle ngi muc ati ngi li cifi ngi mizli mumucahaya, naŋ asi haŋ ɗu.

¹⁹Gwat ka mupura ati ka mapura magi wurenna, waɗ masa gi a dirba gar na, tohoŋ.

²⁰Wurzlaŋhay mitarnaˀ, ka mupura taŋ a hur haŋ hazum ɗu, yo li ɗuva lampehey mitarnaˀ mipa taŋ ti ɓiri tapasl tapasl na, ɓi muɗum ngi raˀa n'ani: Wurzlaŋhay mitarnaˀ na, i modro ngi cikil ngi misikristuhoy ar li taˀ taˀ tarnaˀ, yo li ɗuva lampehey mitarnaˀ na kwana, i cikil ngi misikristuhoy ar lihey taˀ taˀ tarnaˀ.