Read South Giziga REV 10 Bible Online

REV 10 - South Giziga bible

REV 10

¹Yo ma na, i pur modro mekelem ngi Buymisemuŋ ma, migidaŋ, ara po sar paɗ ti muŋ, gazlavay ɓaˀ avu vu ka zana, kwalay mogodonok gun hirnga, mihiri naŋ a wucuɗ kaɓa pas, yo saraya, taŋ kaɓa vu minjihhe.

²Naŋ kaw ti ɗerewol meciɗek a haŋ, i muwuna le wun. A ɗuva sar hazumo gak angi mubuliy, waɗ sar gula gak a ruwuy.

³Dar a widi ti gidaŋ kaɓa tuwuy ngi mobor. A dirba naŋ miwidi na, i ndisl ngi vuŋ tarnaˀ mimbiɗakaŋ di.

⁴A dirba ndisl ngi vuŋ mitarnaˀ tuwa na, i wuɗ ɓa i toho zleˀe, joˀ yi cin ˀay ka ngi mbur paɗ ti muŋ, a ɓiy: «Ɓi ngi ndisl ngi vuŋ mitarnaˀ miɓaka na, pula teˀ a kwacay ɗiki, ki toho ta.»

⁵Joˀ modro, ya mupura, sar taˀ angi mubuliy waɗ a ruwuy tuwa, a zuɓa haŋ hazumo paɗ nga muŋ.

⁶A hudum ti slimiɗ ngi Buymisemuŋ misi ti siifa hã ngi sete, miga muŋ, hirwuy, mubuliy ati gwat ngir taŋhay gar, a ɓi: «Hin ngi sli ti sli anta mata.

⁷Amma tapas mizli masa cinam modro mitarnaˀ naŋ masa zla fi tulum naŋ na, naɓa Buymisemuŋ a sa kiɗa mi ngi ɓi naŋ muɗum na, kaɓa naŋ mitil mi ti ɓi nah da mijiviɗ, gawla naŋhay zleˀe.»

⁸Joˀ ˀay ngi mbur ya micina tuwa, a ɓo paɗ ti muŋ, a ɓiy ma: «A ra tiɓa ɗerewol meciɗek, muwuna, mikaw a haŋ modro mideŋ angi mubuliy waɗ a ruwuy na.»

⁹Joˀ yi kirih ng'avi modro tuwa, i tumbulo ɓa a vuliy ɗerewol meciɗeke. Modro tuwa a ɓiy: «Ani, tiɓa, zumaŋ. A sa tiri ɗalak a kwacay ɗike, amma a balama, deɗek ka mam.»

¹⁰Yi tiɓa ɗerewol meciɗeke ti haŋ modro, i zumaŋ. A balam ɗu, naŋ deɗek ka mam, amma a dirba ya minda so na, a tiri ɗalak a kwacaya.

¹¹Dar a ɓikiy: «Ɓi Buymisemuŋ minjikuw di na, anja ki mahiri ngi ɓa ɓi nah ava da mizli haɗa, da sukwi haɗa, da mizli maɓam mi wal wal, waɗ da buy madiɗahay haɗi.»