Read South Giziga REV 11 Bible Online

REV 11 - South Giziga bible

REV 11

¹Dar a vulikiy lavaɗ, a bam vu ati ganday ngi wi gwat, a ɓikiy: «Slikiɗ ɓa ki wa hay ngi Buymisemuŋ ati li gi mikuli a mbuŋ Buymisemuŋ, yo slufa mizli misi ara, madilkam a mbuŋ naŋ na.

²Amma pula mivay ngi hay ngi Bumbulvuŋ, ki wa ta, asi a vulaka le da mizli duniyahay. Taŋ a sa kirpaka walahay madiɗa mipala asi sar, hã kiya kukur mufaɗ nga cuw.

³I sa slina migi sedewo ɗuwoy mucuw na, hin durmuk ti skat cuw ti kukur merkeɗe, zana ngi vagay ɓaˀ ɓaˀ avu vu, ɓa a ɓaka ɓi ngi Buymisemuŋ minjika taŋ di na.»

⁴Migi sedewo tayna, i widis tutumburoy cuw, yo i li ɗuva lampehey cuw midedeŋ a mbuŋ Bumbulvuŋ miwa hirwuy.

⁵Da mbur ara wuɗ a ga taŋ malambaˀ na, vu a bo ti balam taŋ, a zuma mesene taŋhaya. Gisiŋ, da mbur a wuɗ le ɓa a ga taŋ malambaˀ gar na, a sa kiɗakaŋ vagay kanah.

⁶Taŋ ti gidaŋ, ar hin taŋ manjikaka ɓi ngi Buymisemuŋ da mizli na, ɓa ko vuŋ a gi ta. Taŋ ti gidaŋ ngi mbiɗa yama, a tiri pumbusu, yo taŋ ti gidaŋ ngi so ti hiryi wal wal asi ruwuyo haɗa, ka taŋ muwuɗam le.

⁷Amma ti taŋ misa kiɗaka mi ngi ga sedewo taŋ le na, gwat misããmi masa bo tir yam mijileŋ ngi ruwuy tuwa, a sa gi vurum ati taŋ, a sa tika taŋ ˀay, yo a sa ngizla taŋ kuɗup.

⁸Vagay taŋhay a sa ndiram a jiviɗ ngi walahay madiɗa midiraka Bumbulvuŋ taŋ a diga angi dum mizlira. Walahay madiɗa nah, a zilaka ti slimiɗ «Sodom » malla «Ezipte. [3].»

⁹Mizli ngi si ruwuyoy gar, sukwi gar, mizli maɓam mi wal wal gar ati ngir lihey gar na, a sa soko puraka vagay taŋhay a jiviɗ madiɗa hã hin makir ti reta. Ko a pulaka taŋ jiviɗ ngi dik taŋ ta.

¹⁰Mizli ngi si ruwuyoy gar a sa mumulom haɗi asi migi sedewo tayna mumicam na. A sa gam muguzlum vurˀe, yo a sa slinam ti gwat ngatarahay ar wala taŋ, asi mijiviɗ mucuw tayna, a gaka taŋ bonoy le haɗa.

¹¹Amma, a dirba hin makir ti reta na, musuwun ngi siifa a sa so tivu Buymisemuŋ, a sa ci a hur taŋ, a sa slikiɗam dedeŋ. Dar mizli masa puraka taŋ gar tuwa a zluwunam haɗi.

¹²Mijiviɗ mucuwoy tuwa, a sa cinam ara ɓoko taŋ paɗ a muŋ ti gidaŋ: «Jiɗoko nga ka.» Dar a sa jiɗam nga muŋ angi gazlavay, a mihiri ngi mesene taŋhaya.

¹³Hirak ti pas nah na, hirwuy a wus ti gidaŋ haɗi hiɓik hiɓik. Walahay muwuɗka a wuzla kuruˀ na, pal a mbizli. Mizli durmuk tarnaˀ a micam angi walahay mimbizli vuna. Mizli mindiram ti siifahaya, a zluwunam haɗi, a gaka dudok da Buymuŋ.

¹⁴Kay! Bonoy mucuw naŋ, a cuh le. Ani, bonoy mimakir taŋ, ara so gweˀ ma.

¹⁵Modro mitarnaˀ taŋ, a fa tulum naŋ. ˀAy ka ngi mizli a cin ti gidaŋ a muŋ, a ɓam: «Wurenna, zumabuy ngi ruwuyo i ngi Bumbulvuŋ ndra ati Mesi naŋ muduba, yo zumabuy nah a sa ndir hã ngi sete.»

¹⁶Mizli micawwahay kukur cuw nga mufaɗ mujoˀ ar janga ngi buyoy a mbuŋ Buymisemuŋ tuwa, a dilkam, midibiɗ a ruwuy a ruwuy, dar a putukulom a mbuŋ Buymisemuŋ,

¹⁷a ɓam: «Aw Bumbulvuŋ, Buymisemuŋ, Misi gidaŋ wãˀ, k'ada dana, yo k'ada zleˀe. I gukuw sise, asi ki gi slra le ti gidaŋ ɗik mihaɗi na, yo ki zla zumabuy ɗike le.

¹⁸Sukwi ngi mizli a slam himaˀ le avu ka, amma hin a ndila le ɓa mazuɓ himaˀ, i kaha. I hin ngi ga kiita da mizli mumucahay, hin ngi wurka migir ngi mijiviɗ, gawla ɗikey, ngi wurka mizli ɗikey, waɗ ngi mizli muzluwun ti kahay, ko mizli mizlewey malla ko mizli madiɗahay gar. I hin ngi ziza mizli mahiryaka hirwuy na.»

¹⁹Dar hay ngi Buymisemuŋ a wun a muŋ, hã akoti ngi jumoˀaya, a pur ar hay naŋ. Ar nah na, vuŋ a wucuɗ a wucuɗ, ˀay ka ngi mbur a cin, vuŋ a ndisl a ndisl, hirwuy a wus hiɓik hiɓik waɗ yam a po ti gidaŋ.