Read South Giziga REV 12 Bible Online

REV 12 - South Giziga bible

REV 12

¹Dar gwat mabigi gwat mekelem a bugo vu a muŋ: i ngwasa. Pas ɓaˀ avu vu, kiya asi sar naŋ waɗ loppol ngi wurzlaŋ a hirnga, wurzlahay kuruˀ nga cuw.

²Naŋ ti hur, gweˀ ngi yi. A ra widi ti bonoy ngi kwacay majaŋ ngi yi.

³Akẽh na, gwat mekelem mabigi gwat a bugo vu a muŋ ma: i ngoŋngoŋ madiɗa, gagaza ka vu. Naŋ ti hirngahay tarnaˀ, durumoy kuruˀ, waɗ loppol a hirnga naŋhay tuwa purla purla gar.

⁴Wurzlaŋ ngi muŋhoy muwuɗka taˀ taˀ makire, a fuca taˀ purla a wuzla taŋ ti dangwal. A cici zlak a mbuŋ ngwas mawuɗ a yi tuwa, ɓa a humbuɗa mangala zle ti naŋ masa bawa si.

⁵Ngwas tuwa a yi mangal mizile. I naŋ masa jigina sukwi ngi mizli ngi ruwuyoy gar ti ganday ngi ɓiri. Amma a zuɓaka mangal naŋ tuwa ng'avu Buymisemuŋ, angi janga ngi buy.

⁶Dar ngwas tuwa a kil nga wuzlaɓuh mikirɗak kirɗak, angi li Buymisemuŋ miɗiyaŋ di, ɓa a lum gwat ngi zum a diga, hã hin durmuk ti skat cuw ti kukur merkeɗe.

⁷Akẽh na, vurum a muŋ. Misel ati modro naŋhay a kiɗam vu ati ngoŋngoŋ. Ngoŋngoŋ ati modro naŋhay kwana, a kiɗam vu ati ngi Miseley aya.

⁸Amma Misel ati modro naŋhay a paka hirnga le da ngoŋngoŋ ati modro naŋhaya. Ngoŋngoŋ ati modro naŋhaya, a lumam li cifi a muŋ mata.

⁹A hizigiɗoko ngoŋngoŋ madiɗa, kaw mivi misi zlezle tuwa avra, mazilam «Milyam,» yo «Satan» na, i naŋ, mitikina mizli ngi duniya kurzluˀ gar. A hizigiɗoko di nga ruwuy, jom ati modro naŋhaya.

¹⁰Joˀ i cin ˀay ka ngi mbur maɓo paɗ ti muŋ ti gidaŋ: «Wurenna, i hin ngi lahavu ngi Buymisemuŋ, ngi biga gidaŋ ati zumabuy naŋ, yo ngi biga madiɗa ngi Mesi naŋ. Asi a hizigiɗoko Satan, mukupa ɓi da sukum ndrahay na le paɗ ti muŋ. I naŋ makupa taŋ ɓi a mbuŋ Buymisemuŋ ndra, duvuɗ ti papas gar.

¹¹Amma taŋ a pakaŋ hirnga le, mbele pumbus ngi tumuŋ, yo mbele mingiɓi, taŋ migaka sedewo naŋ na ma. A tiɓaka le ɓa a vulaka hirnga taŋ, hã a micam.

¹²Vurˀe, ka muŋ ati kum mizli micifam anga, mumulom. Amma ka hirwuy, mubuliy, kay! Kum ar bonoy, asi Satan a pi sar le ng'avu kum akẽh. A slikiɗ himaˀ le haɗi, asi a si na le, a ndiraŋ hin neˀkini.»

¹³Ti ngoŋngoŋ mupura a hizigiɗakaŋ le nga ruwuy tuwa na, a zla a kil, a sipa ngwas miyi mangal mizile tuwa.

¹⁴Amma a vulaka kirpaslay cuw da ngwas tuwa, kirpasl ngi mulu madiɗa, ɓa a slikiɗ di nga wuzlaɓuh mikirɗak kirɗaka, li muwakaŋ di vu ɓa ngi zum a diga, hã vi makir ti reta, kileŋ a mihiri ngi kawa.

¹⁵Dar kaw a vunoho yam ti balama ti dirba ngwasa, kaɓa mizaw ɓa a kil di.

¹⁶Amma hirwuy a so jina ngwasa, hirwuy a wuna mi, a sa yam, ngoŋngoŋ muvunoho di tuwa sõt.

¹⁷Ngoŋngoŋ a slikiɗ himaˀ a hirnga ngwasa, dar ara gi vurum ti dideˀ naŋhay mindirama. Taŋ i mizli masipaka ɓimuɗuva, yo sedewo Yesu minjika taŋ di na, ara jaka a hirnga.

¹⁸Dar ngoŋngoŋ a cici deŋ ar muyuŋ ngi mi mubuliy.