Read South Giziga REV 13 Bible Online

REV 13 - South Giziga bible

REV 13

¹Dar yi pur gwat misããmi, ara bo tir mubuliy, durumoy kuruˀu, waɗ hirngahay tarnaˀ. Durum gar na, loppol tuwaɗ tuwaɗ. Slimiɗ ngi zi Buymisemuŋ toh toh avu hirngahaya pal pal gar.

²Gwat ya mupura nah na, a bam vu ati lungum, saray a bam vu ati luˀuf [4] naŋ, naŋ ka ngi mobor. Joˀ ngoŋngoŋ tuwa, a vulaŋ gidaŋ naŋ, li cifi naŋ ngi zuma buyo, waɗ dudok haɗi ma.

³Hirnga pal numuŋ, a pur kaɓa a gakaŋ waˀa madiɗa ngi muc le zleˀe ɗaˀa, amma waˀa naŋ vuna, a kuf le. A zuma hirnga le teˀ da mizli ngi ruwuyoy keɗeɗe gar, dar a sipaka gwat misããmi tuwaŋ.

⁴Mizli gar madilkam a mbuŋ ngoŋngoŋ na, asi naŋ muvula gidaŋ naŋ ngi zumabuy da gwat misããmi tuwa. Yo a dilkam a mbuŋ gwat misããmi tuwa ma, a ɓam: «Mbur ngi wi ati gwat misããmi nana, i waka? Yo magi vurum ati naŋ gu, i waka?»

⁵A pulaka jiviɗ da gwat misããmi ɓa a bo ti ɓi ngi huhumvu, waɗ ɓi ngi zi Buymisemuŋ. A vulakaŋ gidaŋ ngi ga slra naŋ, hã kiya kukur mufaɗ nga cuw.

⁶Dar a zla a ɓi ɓi malambaˀ ar Buymisemuŋ, a za Buymisemuŋ ati Hay naŋ, yo a za mizli ngi muŋhoyo gar ma.

⁷A vulakaŋ gidaŋ ɓa a gi vurum ati mizli ngi Buymisemuŋhoy, ɓa a tika taŋ ˀay. A vulakaŋ gidaŋ ɓa a zum buy a hirnga sukwi mitaˀ taˀ gar, ar mizli gar, mizli maɓam mi wal wal gar, waɗ ar sukwi ngi mizli ngi si ruwuy gar.

⁸Mizli ngisi ruwuyoy gar, misi slimiɗ taŋ manja tuh angi ɗerewol ngi siifa ngi tumuŋ mikiɗaka vagay tuwa, waɗ mizli, slimiɗ taŋ manja tuh zle ti ɗuva virzi ngi duniya na, a sa dilkam a mbuŋ naŋ.

⁹Mbur misi ti slimiɗ macin na, anja a cin.

¹⁰Da a zuwulaka mburo le zleˀe ngi ji ti ji ng'ar dangay na, a sa jakaŋ ti ji vuna si. Da a zuwulaka mburo ngi kiɗ ti maslalam zleˀe kwana, a sa kiɗaka cummo ti maslalam vuna si. Vurˀe, pas a gi le, ɓa sey mizli ngi Buymisemuŋhoy a bigaka ɓusaɓi ati tiɓi taŋ.

¹¹Dar yi pur gwat misããmi mekelem ma, ara bo ti ruwuy, durumoy a hirnga cuw kaɓa zlengerek. Amma da ara ɓi na, ka ngoŋngoŋ.

¹²A gi slra ti gidaŋ ngi gwat misããmi mudumbuŋ tuwa, daˀ a mihiri naŋ. A tika ˀay da mizli ngi si ruwuyoyo, ɓa a dilkam a mbuŋ gwat mudumbuŋ misi vivi ngi waˀa madiɗa ngi muc di zleˀe tuwa.

¹³Gwat mucuw naŋ vuna, a gi cekene madiɗahay, hã a ga ɓa vu a po sar paɗ ti muŋ nga ruwuy, a mihiri ngi mizli gar.

¹⁴A tikina mizli ngi ruwuyoy gar ti cekenehey muvulakaŋ jiviɗ naŋ ɓa a ga a mihiri ngi gwat misããmi mudumbuŋ tuwa. A pa mi da mizli ngi ruwuyoyo, ɓa a ɗiyam foto ngi gwat misããmi mudumbuŋ tuwa, ɓa ngi ɗuvaŋ hirnga. I gwat misããmi misi ti waˀa ngi maslalam zleˀe, mumo ti siifa ti mi a muŋ tuwa.

¹⁵A vulaka gidaŋ da gwat misããmi mucuw naŋ nah na, ɓa a ga hã foto ngi gwat misããmi mudumbuŋ a ɓi ɓi, yo ɓa a kiɗa mizli madilkam a mbuŋ naŋ ta gar.

¹⁶Mizli gar, mizlewey ati mizli madiɗahay, misi zlilihey ati misi murgahay, diimuhoy ati bekehey, a tika taŋ ˀay ɓa a ɗuva taŋ lammba avu haŋ hazum taŋhay, malla a midibiɗ taŋhaya.

¹⁷Ko mbur mahiɗik gwat gu anta, yo ko mbur mahiɗika gwat naŋ avra gu anta, sey da a ɗuvakaŋ lammba ngi gwat misããmi na le far. Mbiɗeˀvra: slimiɗ naŋ, malla lammba mizlir le kasl avu slimiɗ naŋ.

¹⁸Hana i pas ngi sli wala ngi gwat: mbur misi ti lesl na, a si na mbiɗeˀvra ngi lammba ngi gwat misããmi nah. Asi i lammba ngi slimiɗ ngi mbur, lammba naŋ na, naŋ skat merkeɗ ti kukur merkeɗ nga merkeɗe.