Read South Giziga REV 14 Bible Online

REV 14 - South Giziga bible

REV 14

¹Joˀ yi pur hiri ma, keɗ na, tumuŋ deŋ a muwã Siyoŋ. Mizli mudurmuk skat ti kukur mufaɗ nga mufaɗ, misi ti slimiɗ naŋ, waɗ ngi Cine toh toh a midibiɗ taŋhay tuwa, taŋ bumoˀ.

²I cin ˀay kaɓa ngi mbur paɗ ti muŋ, kaɓa hurum ngi mubuliy madiɗa, kaɓa vuŋ mandisl ti gidaŋ haɗi. Yo ˀay ya micina na, a cin kaɓa dimis mazlaka ti gujuvuroy.

³A ra zlam dimis nawaya a mbuŋ janga ngi buyo, a mbuŋ gwat misããmi mumufaɗay, waɗ a mbuŋ mizli micawwahay mizli ngir cuw nga mufaɗ tuwa. Ko mbur madubuna dimis nah gu anta, sey mizli mudurmuk skat ti kukur mufaɗ nga mufaɗ na tewle, taŋ mizli Buymisemuŋ mumbuɗo hirnga taŋ tir duniya.

⁴Mizli tayna, ko a hiryaka vu taŋ ti hin ti ngwasaya ta, taŋ ngbuˀo ngbuˀo kine. A ra sipaka tumuŋ ng'ar li naŋ maru gar. A mbuɗo hirnga taŋ le ti wuzla mizli, taŋ i muvula mudumbuŋ dumbuŋhoy da Buymisemuŋ, waɗ da tumuŋ.

⁵A lumam ɓi ngi slir ɗaˀ mabo ti balam taŋ ta, ɓi ngi mbiɗa taŋ hirnga anta avu taŋ ta.

⁶Dar yi pur modro mekelem ngi Buymisemuŋ, a slikiɗ hã a dadala muŋ. Naŋ ti Ɓimezle ngi sete, ɓa ngi til di mi da mizli ngi ruwuyoy: da sukwi ngi mizli ngi ruwuyoy gar, mizli mitaˀ taˀ gar, mizli maɓam mi wal wal gar, waɗ da mizli gar.

⁷Modro tuwa a til mi ti gidaŋ: «Zluwunam ti Buymisemuŋ, yo gakaŋ dudok, asi pas, naŋ masa sla kiita da mizli na, a ndilo le. Dilkam a mbuŋ Buymisemuŋ miga muŋ ati hirwuy, mubuliy ati miviɗiviɗi ngi yamaya.»

⁸Modro mucuw naŋ mekelem, ara sipa mudumbuŋ ɓaˀ a dirba, a ɓi: «Babiloŋ, walahay madiɗa, a diɗ le, a diɗ le! Naŋ muvula mbaazla ngi madama naŋ mukuy ta wãˀ da sukwi ngi mizli gar na.»

⁹Yo modro mekelem, mimakir taŋ, ara sipa taŋ ɓaˀ a dirba ma, a til mi ti gidaŋ: «Da mbur ara huruk huruk a mbuŋ gwat misããmi, waɗ a mbuŋ foto naŋ, yo da a lum lammba naŋ le a midibiɗ, malla avu haŋ na,

¹⁰naŋ vuna kwana, a sa si mbaazla ngi himaˀ ngi Buymisemuŋ ya, mbaazla manja lihiɗ, mipaka sek ng'ar sikiɗ ngi himaˀ ngi Buymisemuŋ. Yo a sa si bonoy angi vu ati baruudu a mbuŋ modro ngi Buymisemuŋhoy waɗ a mbuŋ tumuŋ.

¹¹Cunju ngi vu, taŋ masam bonoy anga na, a ngis nga muŋ hã ngi sete. Mizli madilkam a mbuŋ gwat misããmi, waɗ a mbuŋ foto naŋ gar, yo mbur gar muɗuvakaŋ lammba ngi slimiɗ naŋ le na, duvuɗ ti papas gar na, naŋ anta sa musk vu ta.»

¹²I pas ngi ɓusaɓi ngi mizli ngi Buymisemuŋhoy, mizli majaka ɓimujuwa a hirnga ati mitiɓaka Yesu le.

¹³Dar i cin ˀay ka ngi mbur paɗ ti muŋ, a ɓi: «Toho na: Mizli mumicam ar taŋ mujom ati Buymisemuŋ na, taŋ ar wuya zle wurenna!» ˀUf Mipal a mbiɗaŋ di: Kanah gisiŋ! A sa muskam vu avu slra taŋ mutuwaˀ haɗa na, asi a vulaka taŋ migir taŋ weˀe avu gimezle taŋ na.»

¹⁴Dar yi pur hiri ma, keɗ na, gazlavay babara, yo ar gazlavay tuwa ma na, kaɓa mbur anga, loppol ngi ɓiri tapasl tapasl tuwaɗ tuwaɗ a hirnga, waɗ slagway mazum raɓ raɓ kaw a haŋ.

¹⁵Yo modro mekelem ma, a bo tir hay ngi Bumbulvuŋ, a tila mi ti gidaŋ da mbur muar gazlavay tuwa: «Zuɓa slagwaya, ga sifi ngi ruwuyo. Pas ngi gi sifi a ndila le. Asi hirwuy a nih le ngi ga sifi naŋ muduba.»

¹⁶Mbur muar gazlavay tuwa a zuɓa slagwaya, a ga sifi ngi ruwuyo.

¹⁷Yo modro mekelem ma, a bo tir hay ngi Bumbulvuŋ a muŋ. Naŋ kwana, slagway mazum raɓ raɓ kaw a haŋ aya.

¹⁸Yo modro mekeleme, a bo tir li gi mikuli a mbuŋ Buymisemuŋ. Naŋ ti gidaŋ ngi tika ˀay da vu. A tila mi ti gidaŋ da modro mikaw ti slagway miraɓ raɓ tuwa, a ɓaŋ: «Zuɓa slagway ɗik muraɓ raɓ na, sla yi ngi gudubun ngi si ruwuyo. Asi yi taŋhay a naham le.»

¹⁹Dar modro tuwa a kirwa slagway a ruwuyo, a sla yi ngi gudubun ngi si ruwuyo, a pa taŋ ng'ar magayak madiɗa ngi ɗuco yi ngi gudubuno, i magayak ngi himaˀ ngi Buymisemuŋ.

²⁰A ɗucoko yi ngi gudubun ngir magayak tuwa a duba gala. Mizaw ngi pumbus a bo tir magayak tuwa, a ɓul hã kilometir skat makir, jileŋ naŋ a gi gbaˀ avu mi ngi pilisi.