Read South Giziga REV 15 Bible Online

REV 15 - South Giziga bible

REV 15

¹Dar i pur gwat mekelem a muŋ ma, i gwat mabigi gwat. Naŋ madiɗa, yo i gwat ngi zuma hirnga. I modro ngi Buymisemuŋhoy tarnaˀ ti bonoyoy tarnaˀ kaw kaw a haŋ. I bonoy ngi dirbahay wãˀ, asi himaˀ ngi Buymisemuŋ na, i taŋ masa kiɗaka mi naŋ.

²Waɗ ma na, i pur gwat kaɓa mubuliy ngi dorogal lahaɗ ati vu. Mizli mipaka hirnga le da gwat misããmi, da foto naŋ, waɗ da lammba ngi slimiɗ naŋ tuwa na, taŋ dedeŋ a hirnga mubuliy ngi dorogal tuwa, gujuvur ngi kiɗ, kaw kaw a haŋ taŋhaya, i Buymisemuŋ muvula taŋ di.

³A ra zlam dimis ngi Moyis, gawla ngi Buymisemuŋ, waɗ dimis ngi tumuŋ. A zlaka na: «Bumbulvuŋ Buymisemuŋ, misi gidaŋ wãˀ, slra ɗike naŋ haɗa, i ngi pur hiri ngal ngal. Aw Buy madiɗa ngi sukwi ngi mizli ngi si ruwuyoy gar, gwat ɗikey, ka miɗiya jiviɗ taŋ gar na, taŋ kasl kasl, taŋ jeŋŋe.

⁴Aw Bumbulvuŋ, mazluwun ti ka ta, i waka? Mavuluw dudok ta, i waka? Asi mipal i ka tewle. Sukwi ngi mizli gar a sa soko, a dilkam a mbuŋ ɗiki, asi gwat ngi gi ɗikey gar na, a njikam le ti jiviɗ naŋ kuy kuy.»

⁵A dirba nah, keɗ na, hay ngi Bumbulvuŋ a muŋ, guɗuk ngi Buymisemuŋ a wun le baŋ.

⁶Joˀ modro mitarnaˀhay, mikaw kaw ti bonoyoy tarnaˀ tuwa ara boko ti raˀa. A kam zana babarahay njezlezl njezlezl, wilik wilik. A ngirɗaka vu ti kanda ngi ɓiri tapasl tapasl.

⁷Pal a wuzla gwat misããmi mumufaɗaya, a vula sikiɗ tarnaˀ da modro mitarnaˀhay tuwa, i sikiɗ ngi ɓiri tapasl tapaslay, peɗepeɗe ti himaˀ Buymisemuŋ misi ti siifa hã ngi sete.

⁸Joˀ dudok ngi Buymisemuŋ ati gidaŋ naŋ a go cunju tirslik haɗi, a naha hay ngi Bumbulvuŋ tuwa. Ko mbur maci ng'ara gu anta, sey da modro mitarnaˀhay na, mikiɗaka mi ngi bonoy mitarnaˀhay na le far.