Read South Giziga REV 16 Bible Online

REV 16 - South Giziga bible

REV 16

¹Akẽh na, i cin ˀay ka ngi mbur tir hay ngi Bumbulvuŋ, ara ɓa modro mitarnaˀhay tuwa ti gidaŋ: «A ram, paka himaˀ ngi Buymisemuŋ ngir sikiɗ mitarnaˀhay na asi ruwuy.»

²Modro mudumbuŋ a ru, a pa himaˀ ngir sikiɗ naŋ asi ruwuyo. Waˀa misi gweh gweh maji vu haɗa, a ngi avu mizli misi lammba ngi gwat misããmi, yo madilkam avu foto naŋ na.

³Modro mucuw naŋ, a pa himaˀ ngir sikiɗ naŋ ng'ar mubuliy. Yam ngir mubuliy a mbiɗi kaɓa pumbus ngi mbur mumucaŋ. Gwat misi titiri ngir mubuliy a micam gar.

⁴Modro mimakir taŋ, a pa himaˀ ngir sikiɗ naŋ ng'ar yam ngi mizaway, waɗ ng'ar miviɗiviɗi ngi yamay, dar a tiram pumbusu.

⁵I cine modro misi ti gidaŋ ngi tika ˀay da yama, ara ɓi: «Ka jeŋŋe, k'ada dana, k'ada zlezle, ka pal, asi ki sla kiita ɗike kahana vuna si.

⁶Naŋ kine, taŋ mipaka pumbus ngi mizli ɗikey ati ngi mijiviɗ ɗikey na, wurenna, ki vula taŋ pumbus ɓa a saka ya. A ndilaka le ngi lum naŋ.»

⁷Joˀ yi cin ˀay kaɓa ngi mbur tir li gi mikuli a mbuŋ Buymisemuŋ, a ɓi: «Haˀaw, Bumbulvuŋ, Buymisemuŋ, misi gidaŋ wãˀ, kiita ɗik, ka masla, naŋ kaslsla, naŋ jeŋŋe wãˀ.»

⁸Modro mumufaɗ taŋ, a pa himaˀ ngir sikiɗ naŋ ng'ar pasa, a vulakaŋ gidaŋ ngi wura mizli ti zlum naŋ muŋcoˀ ŋcoˀ na.

⁹Naŋ mazlum ŋcoˀ ŋcoˀ haɗi, mawura mizli tuwa na, dar mizli a zaka Buymisemuŋ misi ti gidaŋ ar bonoy tayna. Amma ko t'anta zilam marava a mevel taŋ, ɓa a vulaka dudok da Buymisemuŋ ta na si.

¹⁰Modro muzlum taŋ, a pa himaˀ ngir sikiɗ naŋ ng'ar li cifi ngi gwat misããmi tuwa. Luvuŋ a sirta li zumabuy naŋ timbiɗim wãˀ. Mizli a humbiɗam irne ti vu maja taŋ.

¹¹A zaka Buymuŋ, asi bonoy taŋ masaka, waɗ asi waˀa misi gweh gweh migi avu taŋ na. Amma, taŋ magam gwat malambaˀ na, ko a zilam marava vurˀe ta na si.

¹²Modro mimerkeɗ taŋ, a pa himaˀ ngir sikiɗ naŋ ng'ar mizaw Efrat. Yam ngi mizawa, a hisik kãk ɓa a pula jiviɗ da buy madiɗahay masoko tisi pas ngi miprike.

¹³Joˀ i pur setenehey makir, a bam vu ati gecey. A boko ti balam ngoŋngoŋ, yo ti balam gwat misããmi, waɗ ti balam mijiviɗ misi slir.

¹⁴Asi mike na, i ˀuf ngi Satanay, a gam cekenehey, ara lumaka buy madiɗa ngi duniyahaya cek gar, ɓa a kusoko taŋ ngi gi vurum ngi hin madiɗa ngi Buymisemuŋ, misi gidaŋ wãˀa.

¹⁵«Puraka, y'ani so kaɓa muhul, mbur mahinje ta, majigina zana naŋhay ɓa aru vu gulndiŋ kine ngi paŋ mesem ta na, naŋ ar wuya!»

¹⁶Setenehey tuwa, a kusoko buy madiɗahaya angi li purla. A zilaka li naŋ ti mi Hebere «Harmagedoŋ.»

¹⁷Modro mitarnaˀ taŋ, a pa himaˀ ngir sikiɗ naŋ a dadala muŋ. ˀAy kaɓa ngi mbur tir hay ngi Bumbulvuŋ, a cino tir janga ngi buyo, a ɓi: «A kiɗ mi le!»

¹⁸Dar vuŋ a wucuɗ, ˀay ka ngi mizli a cin, vuŋ a ndisl, hirwuy a wus hiɓik hiɓik haɗi wãˀ. Zle ti mbur mizla cifi a ruwuyo, a gi kanah ɗaˀ ta wãˀ si.

¹⁹Walahay madiɗa a wuh a wuzla makir, yo walahay madiɗa ngi si duniyahay cek gar a mbizlam rip rip. Dar Buymisemuŋ a wulka Babiloŋ, walahay madiɗa keŋ, ɓa a vulaŋ sikiɗ misi mbaazla ngi himaˀ naŋ mavuruɗ anga na, ɓa a saŋ.

²⁰Maturahay gar a susuymom, yo muwãhay anta mata.

²¹Slaslalay muloˀ loˀ, a gi kilo kukur mufaɗ, kukur mufaɗ a diɗoko paɗ ti muŋ ng'ar mizli. Joˀ mizli a zaka Buymisemuŋ, asi bonoy ngi yam tuwa, asi bonoy nah, naŋ kuy ta wãˀ.