Read South Giziga REV 17 Bible Online

REV 17 - South Giziga bible

REV 17

¹Akẽh na, pal a wuzla modro ngi Buymisemuŋhoy mitarnaˀ misi ti sikiɗey kaw kaw tarnaˀ tuwa, a so ngavi ya, a ɓiy: «Sawa, yi sa buguw kiita ngi ngwas sulome madiɗa micifi a mi mubuliy madiɗa na.

²Buy madiɗa ngi si ruwuyoy a gam madama le ati naŋ, yo mizli ngi si ruwuyoy a wam le duwlak duwlak ti madama naŋ.»

³Dar ˀUf Mipal a ci angi ya, waɗ modro a zuɓiy ng'ar li papala. Keɗ na, ngwas a duba gwat misããmi gagaza ndezze, slimiɗ ngi zi Buymisemuŋ toh toh avu vu naŋ gar, yo naŋ ti hirngahay tarnaˀ, waɗ durumoy kuruˀu.

⁴Ngwas tuwa, a ki zana miwilik wilik, gagaza tezze, vu ɗiyeˀ ɗiyeˀ ti gwat ngi wuya ngi ɓiri tapasl tapasl, yo ti ɗugur mupuɗaw puɗaway, waɗ ti virzle hiri paatu mupuɗaw puɗaway. Naŋ kaw ti sikiɗ ngi ɓiri tapasl tapasl, peɗepeɗe ti gwat malambaˀhay: i dili ngi sulome naŋ vuna.

⁵Slimiɗ manja sin toh toh a midibiɗ naŋ. A tohoko na: «Babiloŋ madiɗa, mumuŋ ngi sulomehey ati ngi gwat malambaˀ ngi si ruwuyoy.»

⁶Keɗ na, ngwas tuwa a wi le ti pumbus ngi mizli ngi Buymisemuŋhoy, waɗ ti pumbus ngi migi sedewo ngi Yesuhoy. Ya mupura keɗ na, a giy welele teˀe.

⁷Dar modro tuwa a ɓiy: «Ki gi welele vur mike? Ngwas ati gwat misããmi misi ti hirngahay tarnaˀ, waɗ durumoy kuruˀ na, i sa ɓuw mbiɗeˀvra naŋ muɗum na.

⁸Gwat misããmi ka mupura na, naŋ da zleˀe, amma naŋ anta mata. A sa bo tir vigiɗ mijileŋ ɓa aru nga zizi. Mizli ngi ruwuyoy, misi slimiɗ taŋ manja tuh angi ɗerewol ngi siifa, zle ti ɗuvavirzi ngi duniya na, taŋ masa puraka gwat misããmi na, a sa zuma taŋ hirnga, asi naŋ da zleˀe, ani naŋ anta mata, amma a sa mawa a muŋ ma.

⁹Ɓa ngi sla wala ngi ɓi hana na, wurenna sey mbur a ndir ti lesl ati sinmijileŋ. Hirngahay mitarnaˀ na, i muwãhay tarnaˀ, ngwas micifi angi taŋ. Yo i buy madiɗahay tarnaˀa ma.

¹⁰Zlum a wuzla taŋ a ndilam le. Mimerkeɗ taŋ ara zum buy. Mitarnaˀ taŋ a so taruŋ. Amma ti naŋ misa so le na, a sa zik neˀkini si.

¹¹Buy madiɗa midangafaɗ taŋ na, i gwat misããmi misi naŋ da zleˀe, yo naŋ anta mata tuwa. Naŋ a wuzla mitarnaˀhay na, amma ara ru nga zizi.

¹²Durumoy mukuruˀ, ka mupura taŋ na, i buy madiɗahay kuruˀ mazumam buy t'aruŋ. Amma a sa wunkaka zuma buyo, ati gwat misããmi angi pas purla si.

¹³Taŋ kuruˀ taŋ gar, wuluk taŋ purla ɓa a vulaka gidaŋ taŋ ati madiɗa taŋ ngi gi slra ngi gwat misããmi.

¹⁴A sa gam vurum ati tumuŋ, amma tumuŋ a sa pa taŋ hirnga. Asi tumuŋ i Bumbulvuŋ mifina kulihey, yo i Buy madiɗa ngi buy madiɗahay. Mizli, naŋ mizila taŋ, naŋ muwuna taŋ, yo miteŋteŋ naŋhaya, jom ati naŋ, a sa paka taŋ hirnga ma.»

¹⁵Joˀ modro tuwa a ɓiy ma: «Yam ka mupura, ngwas sulome muanga na, i mizli gar, i zigiduw, i sukwi ngi si ruwuy, yo i mizli maɓam mi wal wal gar.

¹⁶Durumoy mukuruˀ ka mupura taŋ, waɗ gwat misããmi na, a sa hirsaka ngwas sulome, a sa pulakaŋ ɗoɗok pal naŋ, gulndiŋ kine. A sa zumaka ˀuse naŋ, yo a sa wuraka angi vu.

¹⁷Asi i Buymisemuŋ mica wuluk naŋ a mevel taŋ, ɓa a gaka gwat naŋ mujuwa ngi gi na, ɓa a vulaka zumabuy taŋ ngi gi slra ngi gwat misããmi, hã gwat Buymisemuŋ miɓa gar na a gi ɗagay.

¹⁸Yo ngwas ka mupura na, i walahay madiɗa mazum buy a hirnga buy madiɗa ngi si ruwuyoy gar.»