Read South Giziga REV 18 Bible Online

REV 18 - South Giziga bible

REV 18

¹A dirba nah ma na, i pur modro mekelem ma, ara po sar paɗ ti muŋ. Naŋ ti gidaŋ haɗi ngi wi mizli. Dudok naŋ a pusluɗa hirwuyo gar.

²A til mi ti gidaŋ, a ɓi: «A diɗ le! Babiloŋ, walahay madiɗa, a diɗ le, a diɗ le! A tiri hay ngi milyamay le, li cifi ngi setenehey, waɗ ngi ɗiyuw ngi zum tahay ati ngi hirisey gar.

³Asi a vula mbaazla ngi sulome naŋ mukuy ta wãˀ na le da sukwi ngi mizli ngi si ruwuyoy gar, a sam le. Buy madiɗa ngi si ruwuyoyo, a gam madama le ati naŋ. Migi terere ngisi ruwuyoyo, a gam zlili le ti gidaŋ ngi wuya naŋ na.»

⁴I cin ˀay kaɓa ngi mbur paɗ ti muŋ ma, a ɓi: «Aw mizli ɗuwoy, bam tir walahay madiɗa ng'avra. Vur kum masa cam ar mungra naŋ na, yo vur kum masa lumam bonoy muɗuvaka hĩˀĩ vur naŋ na.

⁵Asi mungra naŋ a cikil le haɗa hã a muŋ. Yo Buymisemuŋ a wuluk le keŋ angi gwat ngi gi naŋ mijeŋ ta na.

⁶Gam ti naŋ kaɓa naŋ migi ti kum zleˀe na ya. Gwat naŋ miga na, wurkakaŋ di makaw cuw. Sikiɗ naŋ milihiɗ di mbaazla naŋ na, lihiɗakaŋ di da naŋ hã makaw cuw.

⁷Gakaŋ bonoy, yo gakaŋ ɓa a tuwuy ngi vagay, weˀe avu naŋ mulum dudok ati wuya zleˀe na ya.Vur a ɓi a mevele na: «Yi maˀãy, y'ani ani. Yi wudiga ta wãˀ. Y'anta sa tuwuy tuwuy ngi vagaya ta ndiɗaˀ wãˀ»

⁸Vurˀe, bonoyoy muzuwulakaŋ taŋ na, a sa lumakaŋ angi hin purla: Muc, tuwuy ngi vagay, may, waɗ vu a sa zumaŋ. Asi Bumbulvuŋ, Buymisemuŋ mislaŋ kiita na, naŋ gidaŋ.»

⁹Buy madiɗa ngi ruwuyoy migam madama ti naŋ, yo mulumam wuya naŋ na, taŋ misa puraka cunju ngi vu masa wuraŋ na le na, dar a sa tuwam, a sa niˀicam anga.

¹⁰A sa cicam zar kileŋ ti zluwun ngi bonoy, naŋ masa na, a sa ɓam: «Bonoy! Bonoy! Babiloŋ, walahay madiɗa, walahay migidaŋ! A gukuw kiita si na, ar pas purla si!»

¹¹Joˀ migi terere ngi si ruwuyoyo, a tuwam aseˀe, hã a likakaŋ. Asi ko mbur pal mahiɗik gwat ngi terere taŋhay anta mata.

¹²Gwat ngi terereheye: i ɓiri tapasl tapasl ati ɓiri bara , ɗugur mupuɗaw puɗaway ati virzle hiri paatuhoy , turmi ngi gabaga mislirkeɗ slirkeɗey, ati miwilik wilikey, gabaga ngi gugumay ngi mumuyuŋhoy, zana gagaza mitezzehey, dum ngi zĩˀĩhey, gwat miɗiya ti sliŋ ngi begenehey, dum mupuɗaw puɗaway, ɓiri gazahay ati ɓiri titra , ɗugur barahay, ko mbur pal mahiɗika taŋ anta.

¹³Sukwi ngi gwat ngi luguɗo laray wal wal ati sukwi ngi urdihey wal wal, mukuturɓuy mazilaka mir ati mukuturɓuy ngi zlum ti zlumoy, mbaazlahay, malay, hapa mezlehey ati alkamari, slahay ati tumuŋhoy, pilisey ati mota ngi pilisey, bekehey ati mizli mijaka taŋ ti jihey, ko mbur pal mahiɗik anta mata.

¹⁴Joˀ misi zlilihey a ɓaka walahay tuwa: «Gwat, ka misi ti may naŋ haɗi zleˀe tuwa, a cuh le kileŋ avu ka. Zlili ɗik ati wuya ɗik gar, a susuymom le avu ka. Mbur masa luuma anta mata ndiɗaˀ wãˀ.»

¹⁵Migi tererehey, naŋ miga taŋ zlili ti terere nah na, a sa cicam zar kileŋ ti zluwun ngi bonoy, naŋ masa sa na, a sa tuwam tuwuy ngi vagay.

¹⁶A sa ɓam: «Bonoy! Bonoy! Walahay madiɗa! Miki zana mislirkeɗ slirkeɗ ati zana miwilik wilik ati gagaza mitezze, miɗiya vu ti gwat ngi wuya ngi ɓiri tapasl tapasl ati ngi ɗugur mupuɗaw puɗaway ati virzle hiripaatu mupuɗaw puɗaway!

¹⁷Walahay madiɗa a ziza zlili naŋ mihaɗi na, angi pas purla si.» Mukukuro palalam ngi yamay ati muzuɓa mulak ti palalamay gar, migi slra ngir yamay ati mizli mazumam ti slra taŋ ngir mubuliy gar na, a cicam zar kileŋ.

¹⁸Ti taŋ mapuraka cunju ngi naŋ mawur na, dar a wudam: «Walahay madiɗa mekelem ada ngi wi ati walahay madiɗa hana ma kwa?»

¹⁹A pam murɓuk a hirnga, a wudam widi ngi vagay: «Kay! Bonoy! Bonoy! Walahay madiɗa! Mizli misi ti palalam madiɗahay ar mubuliy gar, a gam zlili le ti zlili naŋ, ɓa a zizi si na, ar pas purla si!»

²⁰Haya muŋ, ka mumul, asi naŋ mitiri diŋ na! Kumo kwana, mizli ngi Buymisemuŋhoy, kum mislin ngi Kristuhoy, kum mijiviɗey, kum mumulom! Buymisemuŋ miga kiita da walahay hana, asi malambaˀ naŋ mugukum di na.

²¹Modro migidaŋ a zuɓa ɗugur mududok ka ngurvuŋ, a hiziga dizlim ti gidaŋ ng'ar mubuliy, a ɓi: «A sa hizigaka Babiloŋ, walahay madiɗa, ti gidaŋ, kanah ya, anta sa lumaka mata wãˀ.

²²Mikiɗa gujuvuroy ati migi dunguroy, mifi bozlorohoy ati mifi tulumoy gar na, mizli anta sa cinam ˀay taŋ a hay ɗike mata, anta sa lumam misina ɗiya gwat ko wanaka pal a hay ɗike mata, anta sa cinam hurum ngi ngurvuŋ a hay ɗike mata.

²³Anta sa puram lampe njahha a hay ɗike mata. Anta sa cinam ˀay ngi gawla ati ngwas naŋ nga hay ɗike mata. Asi migi terere ɗikeye, i mizli migidaŋ ngi si ruwuyoy. Ani ki tikina mizli ngi si ruwuyoyo le gar ti sin ngi gi cekene ɗik na.

²⁴Yo a lumam pumbus ngi mijiviɗeye le a hay ɗike, ati ngi mizli ngi Buymisemuŋhoy, waɗ ngi mizli mikiɗaka taŋ asi ruwuy gar.»