Read South Giziga REV 19 Bible Online

REV 19 - South Giziga bible

REV 19

¹A dirba nah ma na, i cin ˀay kaɓa ngi zigiduw haɗi wuwwo a muŋ, ara ɓam: «Haleluya ! Hunumaka Buymisemuŋ ndra, naŋ ti dudok, naŋ gidaŋ, ara laha ndra!

²Asi kiita naŋ miga na, naŋ ti jiviɗ naŋ kaslsla, jeŋŋe. A sla kiita le da ngwas sulome madiɗa mihirya hirwuy ti sulome naŋ na. Yo a pul di i cuwal ngi pumbus ngi gawla naŋhay.»

³Joˀ a ɓam ma: «Haleluya! Cunju ngi walahay madiɗa ara ngis nga muŋ hã ngi sete.»

⁴Mizli micawwa mizli ngir cuw nga mufaɗ ati gwat misããmi mumufaɗay tuwa a dilkam, a putukulom a mbuŋ Buymisemuŋ muangi janga ngi buyo, a ɓam: «Amin ! Haleluya!»

⁵Dar ˀay kaɓa ngi mbur a cino tir janga ngi buyo, a ɓi: «Kum gawla ngi Buymisemuŋhoy gar, kum mizli mazluwunam di gar, kum mizli mizlewey ati mizli madiɗahay! Hunumaka Buymisemuŋ ndra.»

⁶Yo i cin ˀay kaɓa ngi zigiduw haɗi wuwwo, kaɓa hurum ngi yam ngir mubuliy, kaɓa vuŋ mandisl ti gidaŋ haɗi, a ɓam: «Haleluya! Bumbulvuŋ, Buymisemuŋ ndra, misi gidaŋ wãˀa, a biga zumabuy naŋ le.

⁷Mumulukum, zluzluɓukum, i gakaŋ dudoko! Asi hin ngi vula ngwas ngi tumuŋ a ndilo le. Ngwas naŋ a juw vu le.

⁸A vulakaŋ ngi ki, i zana ngi gabaga mislirkeɗ slirkeɗ, ngilew ngilew, hetette. Asi gabaga hana, i slra mijeŋŋe ngi mizli ngi Buymisemuŋhoy.»

⁹Modro ngi Buymisemuŋ a ɓiy: «Toho na: Mizli mazilaka taŋ nga zuma ɗaf ngi vula ngwas ngi tumuŋ na, taŋ ar wuya!» A ɓiy ma: «Hana i mingiɓi ngi Buymisemuŋ vuna si.»

¹⁰Dar i huruk huruk ɓa yi putukul a mbuŋ naŋ, amma a ɓiy na: «Ji lesl, ki ga ta, yi cil ɗik gawla ngi Buymisemuŋ, kaɓa ka vuna ati sukum ɗikey majaka ɓi mijeŋ ngi Yesu minjika na ya. Anja sey ki putukul a mbuŋ Buymisemuŋ jaka. Asi ɓi mijeŋ Yesu Kristu minjika na, i ˀUf naŋ manjika ɓi da mijiviɗey na.»

¹¹Akẽh na, i pura muŋ a wucuh wucah, keɗ na, pilis babara a bawa. Mbur gilaˀ anga, a zilaka «Teŋteŋ», yo «Kaslsla.» A gi kiita, yo a gi vurum ti jiviɗ naŋ jeŋŋe.

¹²Hiri naŋhaya, njilim njilim kaɓa irne ngi vu madiɗa. Loppoloy mbeˀ mbeˀ a hirnga, yo slimiɗ toh toh a hirnga, sey naŋ pal naŋ misinaŋ.

¹³A ki jibe mujuguɓo le jugoɓ angi pumbusu. A zilaka mbur nah«Mingiɓi ngi Buymisemuŋ.»

¹⁴Vurum ngi muŋ ara sipaŋ, taŋ ar pilis babarahay. A kam zana ngi gabaga mislirkeɗ slirkeɗ, ngilew ngilew, hetet hetet.

¹⁵Maslalam mazum raɓ raɓ, misi mi puyoŋ puyoŋ a bo ti balama ngi kiɗa sukwi ngi mizli ngi ruwuyo gar. A sa ra jigina taŋ ti ganday ngi ɓiri. A sa ɗuco yi ngi gudubun angi magayak, himaˀ ngi Buymisemuŋ, misi gidaŋ wãˀ mavuruɗ araŋ.

¹⁶Avi jibe naŋ, waɗ avu tuwal naŋ na, a tohom slimiɗ anihĩ: «Buy madiɗa ngi buy madiɗahay, Bumbulvuŋ mifina kulihey.»

¹⁷Dar i pur modro deŋ angi pas, a tila mi ti gidaŋ da ɗiyuwoy maslikiɗam a dadala muŋ gar, a ɓa taŋ: «Soko, kusom ngi zuma ɗaf madiɗa ngi muguzlum ngi Buymisemuŋ.

¹⁸Ɓa ngi zuma ˀuse ngi buy madiɗahay, ngi buy ngi sojehey, ngi pilisey ati ngi mizli ngi raˀahay, ngi mizli gar, diimuhoy, bekehey, yo ngi mizlewey ati ngi mizli madiɗahay.»

¹⁹Akẽh na, i pur gwat misããmi, buy madiɗa ngi si ruwuyoy ati soje taŋhay, a kusom le ɓa ngi gi vurum ati mbur misi angi pilis waɗ ati soje naŋhay tuwa.

²⁰A jaka gwat misããmi waɗ mijiviɗ misi slir magi cekenehey a mbuŋ naŋ ngi tikina mizli mulumam lammba ngi gwat misããmi, yo midilkam a mbuŋ foto naŋ tuwaŋ. A hizigaka taŋ cuw taŋ titiri ng'ar mubuliy ngi vu ngi baruudu mawur njilim njilime.

²¹Maslalam mabo ti balam mbur misi angi pilis tuwa, a kiɗa mizli mekelemeye vagay vagay, joˀ ɗiyuwoy gar a mbam ti ˀuse taŋhaya.