Read South Giziga REV 20 Bible Online

REV 20 - South Giziga bible

REV 20

¹Akẽh na, i pur modro ngi Buymisemuŋ mapo sar paɗ a muŋ, naŋ ti lakle ngi vigiɗ mijileŋ kaw a haŋ, waɗ celelu mududok dudoko.

²Ngoŋngoŋ, kaw mivi, mbiɗeˀvra: Milyam, malla Satan tuwa na, modro tuwa a jaŋ, a juwa ngiriɗ ngiriɗ ngi vi durmuk.

³A hiziga n'gar vigiɗ mijileŋ, waɗ sliraɓ sliraɓ mi naŋ, ɓa a tikina sukwi ngi mizli mata, sey da vi durmuk mikiɗ mi le. A dirba nah, a sa pulaka ɓa a zik neˀkini.

⁴Waɗ i pur janga ngi buyoy. Mizli masoko ngi cifi angi taŋ na, a vulaka taŋ jiviɗ ɓa a gam kiita. Waɗ ma na, i pur musuɗuk ngi mizli mikiɗaka taŋ zleˀe asi taŋ migam sedewo ngi Yesu ati ngi mingiɓi ngi Buymisemuŋ, waɗ musuɗuk ngi mizli midilkam a mbuŋ gwat misããmi ta, malla ko a mbuŋ foto naŋ ta, mulumam lammba a midibiɗ taŋ ta, malla ko avu haŋ taŋ ta. A moko ti siifa taŋ a muŋ, a zumam buy ati Kristu hã vi durmuk.

⁵Mumuca mekelemey anta moko ti siifa ta, sey da vi durmuk mikiɗ mi le. Nah na, i slikiɗ ti wuzla mumucahay mudumbuŋ dumbuŋ naŋ.

⁶Mizli masa slikiɗam ti wuzla mumucahay ar slikiɗ mudumbuŋ na, taŋ ar wuya, taŋ i mizli ngi Buymisemuŋhoy. Muc mucuw naŋ anta lum gidaŋ ar taŋ gu mata. A sa tiram le i migi mikuli ngi Buymisemuŋ, waɗ ngi Kristu, yo a sa zumam buy ati naŋ angi vi mudurmuk na.

⁷Da vi durmuk a kiɗ mi le na, a sa pulaka Satana tir dangaya.

⁸Joˀ a sa ra tikina sukwi ngi mizli ngi si gazlavay kuɗgulum gar, mbiɗeˀvra: Gog ati Magog. A sa kuso taŋ ngi gi vurum. Taŋ haɗi kaɓa muyuŋ ngi mizaw.

⁹A ra ram asi hirwuy zlar gar, yo ara ndahaka li ngi mizli ngi Buymisemuŋhoy mipam anga ati walahay madiɗa Buymisemuŋ mawuɗo. Amma vu a po sar paɗ ti muŋ, a zuma taŋ kap.

¹⁰Milyam, mitikin taŋ tuwa, a hizigaka ng'ar mubuliy ngi vu ati ngi baruudu , aciki gwat misããmi ati mijiviɗ misi slir tuwa. A sa sam bonoy duvuɗ ti papas hã ngiset ngi samadin.

¹¹Yo i pur janga madiɗa ngi buy, naŋ babara, mbur ara. Hirwuy ati muŋ a kilam kileŋ ti mihiri naŋ, ko baraf taŋ anta.

¹²Waɗ ma na, i pur mumucahay, mizli madiɗahay ati mizlewey deŋ deŋ a mbuŋ janga ngi buy tuwaŋ, waɗ ɗerewol muwunahay wun wun. A wunam ɗerewol mekelem ma na, i ɗerewol ngi siifa. Dar a gaka kiita da mumucahaya weˀe avu gwat ngi gi taŋ, kaslsla avu taŋ mutohoko ɓi naŋ angi ɗerewoloy vuna.

¹³Mubuliy a pulo mumuca naŋhaya. Yo muc ati li cifi ngi mumucahaya, a puloko nga taŋhay aya. Joˀ a gaka kiita da mbur gar weˀe avu gwat ngi gi nga naŋ nga naŋ.

¹⁴Dar a hizigaka muc ati li cifi ngi mumucahaya ng'ar mubuliy ngi vu. Mubuliy ngi vu hana na, i muc mucuw naŋ.

¹⁵Yo ko wa gar misi slimiɗ naŋ manja tuh angi ɗerewol ngi siifa gar na, a hizigiɗakaŋ ng'ar mubuliy ngi vu.