Read South Giziga REV 21 Bible Online

REV 21 - South Giziga bible

REV 21

¹Akẽh na, i pur muŋ nawayaŋ waɗ hirwuy nawayaŋ. Asi muŋ mudumbuŋ ati hirwuy mudumbuŋ a susuymom le, yo mubuliy anta mata.

²Keɗ na, walahay madiɗa mipal, Zeruzalem nawaya, ara po sar paɗ a muŋ ti ciki Buymisemuŋ. A juw vu le kaɓa ngwas miɗiya vu naŋ le ngi kutuko zil naŋ ngi sliˀi.

³Waɗ i cin ˀay kaɓa ngi mbur paɗ tir janga ngi buyo, ara ɓi ti gidaŋ: «Puraka, hay ngi Buymisemuŋ n'ani, naŋ a wuzla mizli, a sa cifi ati taŋ. Taŋ a sa tiram mizli naŋhay, yo naŋ a sa tiri Buymisemuŋ misi ati taŋ.

⁴A sa sõhõ taŋ tuwuy ngi hiri taŋhaya gar. Muc a sa gi anta mata, tuwuy ngi vagay, widi ati bonoy, a sa so anta mata. Asi gwat magalahay a susuymom le.»

⁵Mbur muangi janga ngi buy tuwa a ɓi: «Wurenna, i ra gi gwat nawayahay gar.» Waɗ a ɓi ma: «Toho na: Mingiɓi hana, naŋ jeŋŋe, yo naŋ kaslsla!»

⁶A ɓiy ma: «A gi le si. Yi Alfa, yi Omega. Yi zli virzi ngi gwat, yi kiɗa mi ngi gwat. Mbur, yam magaŋ gar na, i sa vulaŋ yam ngatara angi miviɗiviɗi ngi yam ngi siifa.

⁷Bugawla gar na, gwat ya masa vulaŋ di, i nah. Yo i sa tiri Buymisemuŋ naŋ, naŋ kwana, a sa tiri mangal ɗu.

⁸Amma muzluwunoy, mizli miteŋteŋhey ta, mizli magam lambaˀ lambaˀ, mikiɗa hirngahay, migi madamahay, mizli misi ti sin ngi gi cekenehey ati madilkam a mbuŋ kulihey, waɗ migi slirey gar na, a sa lumam li cifi taŋ angi mubuliy ngi vu, waɗ ngi baruudu. Nah na, i muc mucuw naŋ.»

⁹Modro mitarnaˀhay misi kaw kaw ti sikiɗ mipeɗepeɗe peɗepeɗe ti bonoy ngi dirbahay tarnaˀ tuwa, pal ngi si taŋ a sawa, a ɓiy na: «Sawa, i sa buguw meketeŋ ngi tumuŋ na.»

¹⁰ˀUf Mipal a ci angi ya, a zuɓiy faw nga hirnga muwã madiɗa, migilaŋ. Joˀ a bigiy Zeruzalem, walahay mipal, ara po sar ti muŋ, ti ciki Buymisemuŋ.

¹¹A ra wucuɗ ti dudok ngi Buymisemuŋ vuna. A wucuɗ kaɓa ɗugur mupuɗaw, kaɓa ɗugur kalaf kalaf, gagaza zlopzlop, njazl kaɓa dorogal.

¹²Mohol nah, naŋ ɓiɓir ɓiɓir, a gil le haɗi. Mizlingre kuruˀ nga cuw ava, modrohoy kuruˀ nga cuw avu mizlingreheye. Slimiɗ ngi sukwi ngi Israyeley mukuruˀ nga cuwo toh toh avu mizlingreheye.

¹³Tisi pas ngi miprike, mizlingre makir, tir vay ngi muŋ, mizlingre makir, tir vay ngi ruwuyo, mizlingre makir, waɗ tisi pas ngi pastaˀa, mizlingre makir.

¹⁴A ɗuvaka virzi ngi moholo angi ɗuguroy kuruˀ nga cuw, waɗ slimiɗ ngi mislin ngi tumuŋhoy mukuruˀ nga cuwo toh toh angi ɗuguroy tuwa.

¹⁵Modro maɓiy tuwa, naŋ ti gwat ngi wi gwat, i lavaɗ ngi ɓiri tapasl tapasl kaw a haŋ, ɓa ngi wa walahay madiɗa ati mizlingre naŋhay waɗ mohol naŋhaya.

¹⁶Mivay ngi walahay nah gar, taŋ rak raka, jek naŋ ati sliprik naŋ gar misi purla. Modro a wa ti lavaɗ tuwa, a wi kilometir kukur cuw. Jek naŋ, sliprik naŋ ati gil naŋ gar, taŋ purla.

¹⁷A wa moholo ma, gil naŋ metir kukur tarnaˀ, weˀ weˀ ti gwat, mizli mawam di gwata.

¹⁸A ndiraka mohol naŋ ti ɗugur kalaf kalaf gagaza zlopzlop, amma walahaya, a ndiraka ti ɓiri tapasl tapasl pal naŋ kine, njazl kaɓa dorogal.

¹⁹A gaka wuya da virzi ngi walahay madiɗa nah ti sukwi ngi ɗugur mupuɗaw puɗaway wal wal haɗa. Ɗugur mudumbuŋ ngi ɗuva virzi naŋ i ɗugur kalaf kalaf gagaza zlopzlop , mucuw naŋ i ɗugur mupuɗaw ngilngil , mimakir taŋ i ɗugur mupuɗaw wuy wuy , mumufaɗ taŋ i ɗugur mupuɗaw meɗelek meɗelek ,

²⁰muzlum taŋ i ɗugur mupuɗaw gagaza coy coy , mimerkeɗ taŋ i ɗugur mupuɗaw kakayak kakayak , mitarnaˀ taŋ i ɗugur mupuɗaw kalaf kalaf , midangafaɗ taŋ i ɗugur mupuɗaw cuhho , mungoltir taŋ i ɗugur tapasl tapasl , mukuruˀ taŋ i ɗugur mupuɗaw zay zuŋ kalaf kalaf , mukuruˀ ngaŋ kaˀ taŋ i ɗugur mupuɗaw virziŋŋe , mukuruˀ nga cuw taŋ i ɗugur miwitwit.

²¹Mizlingre mukuruˀ nga cuwoy na, i virzle hiripaatu mupuɗaw puɗaway kuruˀ nga cuw. Mizlingre purla gar na, a gaka ti virzle hiripaatu purla si. Jiviɗ madiɗa ngir walahaya, a ɗiyaka ti ɓiri tapasl tapasl, njazl kaɓa dorogal.

²²Amma i pur hay ngi Bumbulvuŋ ar walahay madiɗa ta wãˀ si. Asi hay naŋ i Bumbulvuŋ, Buymisemuŋ, misi gidaŋ wãˀ waɗ tumuŋ vuna si.

²³Walahaya, naŋ anta ti may ngi pas malla ngi kiya ɓa ngi pusluɗa li ta. Asi i dudok ngi Buymisemuŋ mapusluɗa walahaya, yo tumuŋ i lampe.

²⁴Sukwi ngi mizli ngi si ruwuyoy gar, a sa ram angi li minjahha naŋ na, yo buy madiɗa ngi si ruwuyoy a sa soko ti zlili taŋhay ng'ara.

²⁵Vurˀe, mizlingre naŋhaya, a sa ndiram baŋ baŋ, ndrehhe. Duvuɗ anta sa ji a diga mata wãˀ.

²⁶A sa ram ti dudok ngi sukwi ngi mizli ngi ruwuyoy ati zlili taŋhaya gar ng'ara.

²⁷Gwat misi dili anta sa ci angi walahay nah ta wãˀ. Ko mbur magi gwat ngi hirya li, magi slir gar na, anta sa ci anga ta. Masa cama, sey i mizli misi slimiɗ taŋ i mutoho le angi ɗerewol ngi siifa, ɗerewol ngi tumuŋ tuwa.