Read South Giziga REV 22 Bible Online

REV 22 - South Giziga bible

REV 22

¹Waɗ ma, modro ngi Buymisemuŋ a bigiy mizaw ngi yam ngi siifa. A wucuɗ wilik wilik kaɓa dorogal. A bo tir li cifi ngi zumabuy ngi Buymisemuŋ ati tumuŋ.

²A wuzla jiviɗ madiɗa ngir walahaya, waɗ a mivay ngi mizaw ti ka ti ka gar na, widis ngi siifa ada kaˀa. A yi vur kiya vur kiya, angi vi pal na, a yi is kuruˀ nga cuw. Kalaf naŋ a gi slra ngi mbulo sukwi ngi mizli ngi si ruwuyoy.

³Anta sa nisam vu a diga mata. Li cifi ngi zumabuy ngi Buymisemuŋ ati ngi tumuŋ a sa ndir angi walahay madiɗa, joˀ gawla naŋhay a sa dilkam a mbuŋ naŋ.

⁴A sa puraka mihiri naŋ, yo a sa tohoko slimiɗ naŋ a midibiɗ taŋhay.

⁵Duvuɗo anta ji a diga mata wãˀ. Ko mbur anta sa wuɗ li minjahha ngi lampe malla ngi pasa mata, asi Bumbulvuŋ, Buymisemuŋ a sa pusluɗa li minjahha naŋ ar taŋ, yo a sa zumam buy hã ngi set, ngi samadin.

⁶Joˀ modro tuwa a ɓiy ma: «Ɓi hana, naŋ kaslsla, yo naŋ jeŋŋe. Bumbulvuŋ, Buymisemuŋ mavulo ˀUf naŋ da mijiviɗ naŋhaya, a slino modro naŋ, ɓa a biga gwatay masa gam wureˀ wureˀ na da gawla naŋhay.»

⁷Yesu a ɓi: «Puraka ɗi, y'ani so wureˀ wurenna. Ɓi minjika angi ɗerewol hana na, mbur maja a hirnga na, naŋ ar wuya!»

⁸Ya Zaŋ, i cine ɓi nah le, i pura gwat nah le gar. Yo a dirba ya micina ati ya mupura gar na, yi huruk huruk a mbuŋ modro mabigiy di na, ɓa i putukul a mbuŋ naŋ.

⁹Amma a ɓiy: «Ji lesl, ki ga ta. Yi cil ɗik, gawla ngi Buymisemuŋ kaɓa ka, kaɓa sukum ɗik, mijiviɗey ati mizli majaka ɓimutohoko angi ɗerewol hana gar a hirnga na. Anja sey ki putukul na, a mbuŋ Buymisemuŋ jaka.»

¹⁰Waɗ a ɓiy ma: «Ɓi minjika angi ɗerewol hana na, anja ki ɗumo ta, asi pas ngi kiɗa mi ngi gwatay gar, a ndilo le gweˀe.

¹¹Mbur magi gwat mijeŋŋe ta na, anja a gi gwat mijeŋŋe ta ava. Mbur migi malambaˀ na, anja a ndir i migi malambaˀa. Amma mbur mijeŋŋe na, anja a gi gwat mijeŋŋe ava ma, mbur mipal, anja a ndir i mbur mipal ava ma.»

¹²Yesu a ɓi ma: «Cin ɗi, y'ani i ra so gweˀe. Yi ra so ti gwat ngi wurka vu kaw a haŋ, ɓa ngi vula da mbur gar, weˀe avu gwat ngi gi naŋ.

¹³Yi Alfa, yi Omega. Yi mudumbuŋ, yo yi ngi dirba. Yi zli virzi ngi gwat, yo yi kiɗa mi ngi gwat.»

¹⁴Mizli mabunaka jibe taŋhay ɓa a lumam jiviɗ ngi zuma yi ngi widis ngi siifa, yo ɓa a cam tir mizlingreheye ng'ar walahay madiɗa na, taŋ ar wuya.

¹⁵Amma mizli migi lambaˀhay ati misi ti sin ngi gi cekenehey, migi madamahay ati mikiɗa hirngahay, mihuruk huruk a mbuŋ kulihey, waɗ ko wa gar mawuɗ ɓi ngi slir malla magi slir na, a ndiram a duba gala.

¹⁶Ya Yesu, ya mislinukum modro ɗu na, ɓa ngi tila mi ti ɓi hana a wuzla mizli ɗuwoy. Ya, yi dideˀ ngi Davit, yi tizer naŋ, yi bangay ngi wuna li mawucuɗ wilik wilik.»

¹⁷ˀUf ngi Buymisemuŋ ati ngwas a ɓam: «Sawa!» Anja mbur macina ɓi hana kwana, a ɓi: «Sawa!» Mbur, misi yam ara gaŋ na, anja a sawa. Mbur mawuɗ yam ngi siifa na, anja a lum ngataraŋ.

¹⁸Ɓi minjika angi ɗerewol hana na, mizli micin naŋhay gar na, ya Zaŋ, i ra ɓa taŋ ɓi madiɗa ani, ɓa a kaka a slimiɗe: Da mbur a co ɓi mekelem le anga ma na, bonoy madiɗa mutohoko taŋ angi ɗerewol hana na, Buymisemuŋ a sa kaŋ taŋ nga mi nga naŋ ma.

¹⁹A wuzla ɓi minjika angi ɗerewol hana, da mbur a sli le avra na, widis ngi siifa, yo walahay madiɗa mipal mutohoko ɓi naŋ anga na, Buymisemuŋ a sa slaŋ mi nga naŋ avra.

²⁰Migi sedewo ngi ɓi hana, a ɓi: «Haˀaw, y'ani i ra so gweˀe.» Amin , Buy Yesu, sawa!

²¹Anja Buy Yesu a gukum mezle, gar kumo.