Read South Giziga REV 5 Bible Online

REV 5 - South Giziga bible

REV 5

¹Yo i pur ɗerewol mufuɗa faɗ faɗ, mutoho ti huroˀo, ti vra gar, kaw a haŋ hazum ngi Mbur muangi janga ngi buy tuwa, waɗ a gicaka mi naŋ sliraɓ, haŋ taˀ taˀ anga tarnaˀa.

²Waɗ i pur modro migidaŋ ngi Buymisemuŋ. A ra til mi ti gidaŋ, a ɓi: «Mindila ter ngi turo sluruɓ ngi ɗerewol hana ɓa a wuna, i waka?»

³Amma ko a muŋ, a ruwuy, waɗ angi li cifi ngi mumucahay kwana, ko mbur pal maturo ɗerewolo, malla maɗuva hiri ara gu na anta.

⁴Taŋ mulumam mbur mindila ter ngi wuna ɗerewolo, ɓa a pura mingiɓi mutohoko a huroˀo ta tuwa ta na, i tuwuy haɗa.

⁵Amma mbur pal a wuzla mizli micawwahay tuwa, a ɓiy: «Ki tuwuy ta, pura, mobor ngi si sukwi ngi Yuda, tizer ngi buy Davit, a cifi bugawla le. A sa turo sluruɓ mitaˀ taˀ tarnaˀ tayna, ɓa a wuna ɗerewolo.»

⁶Dar yi pur tumuŋ deŋ a wuzla janga ngi buyo, a wuzla gwat misããmi mumufaɗay, waɗ a wuzla mizli micawwahay kukur cuw nga mufaɗ tuwa. Tumuŋ nah, a pur kaɓa a kiɗaka le zleˀe vagay ɗaˀa. Naŋ ti durum tarnaˀ, hiri tarnaˀ. Tayna i ˀufoy tarnaˀ Buymisemuŋ mislino taŋ ng'asi ruwuy gar.

⁷Tumuŋ tuwa aru nga tiɓa ɗerewol misi tir haŋ hazum ngi Mbur muangi janga ngi buy tuwa.

⁸Naŋ mitiɓa ɗerewolo si na, gwat misããmi mumufaɗay ati mizli micawwahay tuwa a dilkam a mbuŋ naŋ. Mbur gar, naŋ ti gujuvur kaw a haŋ kaw a haŋ, waɗ sikiɗ ngi ɓiri tapasl tapasl, mbaf mbaf ti mukuturɓuy ngi zlum ti zlum. Tayna, i diradibiɗ ngi mizli ngi Buymisemuŋhoy.

⁹A zlam dimis nawaya ani: «Ki ndila le ter ngi tiɓa ɗerewolo, ɓa ngi turo sluruɓoyo. Asi a kuɗukuw le vagay zleˀe, yo ki mbiɗa hirnga ngi mizli le ti pumbus ɗiki, ɓa a ndiram da Buymisemuŋ. Mizli muboko tisi sukwi mitaˀ taˀ gar, maɓam mi wal wal ngi wuzla mizli, waɗ ngi wuzla sukwi ngi ruwuy gar.

¹⁰Ki vula taŋ mizli ngir zumabuy ngi Buymisemuŋ ndra le, yo ki tiri taŋ masayay le ngi gi slra da Buymisemuŋ ndra, a sa zumam buy a ruwuyo.»

¹¹I ra pur hiri ma na, i cin ˀay ngi modrohoy haɗi, gun hirnga janga ngi buy ati gwat misããmi mumufaɗay, waɗ mizli micawwahay kukur cuw nga mufaɗ tuwa. Taˀ taŋ na, a gi durmuk kukur mbeˀ mbeˀ, a sluf ta.

¹²A ra tilam mi ti gidaŋ, a ɓam na: «Tumuŋ mikiɗaka vagay zleˀe na, a ndila le ter ɓa mizli a vulakaŋ madiɗa, a gi zlili, a lum sinmijileŋ, a lum gidaŋ, a ɗuvakaŋ hirnga, a gakaŋ dudok waɗ a hunumakaŋ.»

¹³Gwat ngi muŋhoy gar, ngi ruwuyoy gar, ngir li cifi ngi mizli mumucahay, ngir mubuliyey, waɗ gwat Buymisemuŋ miga taŋ wal wal gar na, i cin, ara tilam mi, a ɓam: «Anja mizli a hunumaka, a ɗuvaka hirnga, a gaka dudok, waɗ a vulaka madiɗa, da Mbur muar janga ngi buyo, waɗ da tumuŋ hã ngi sete.»

¹⁴Dar gwat misããmi mumufaɗay tuwa a tiɓaka: «Amin!» Joˀ mizli micawwahay a dilkam, a hurkom a mbuŋ naŋ.