Read South Giziga REV 6 Bible Online

REV 6 - South Giziga bible

REV 6

¹Dar i pur hiri ma na, tumuŋ a turo sluruɓ mudumbuŋ ngi wuzla mitarnaˀhay tuwa. I cin na, a wuzla gwat misããmi mumufaɗaya, mudumbuŋ a til mi kaɓa ndisl ngi vuŋ, a ɓi: «Sawa!»

²Keɗ na, pilis babara, mbur muanga, lek kaw a haŋ. A vulakaŋ loppol ngi tuwuɗa hirnga, a bi put kaɓa bugawla ɓa ara zuma li gar.

³Tumuŋ muturo sluruɓ mucuw naŋ ma na, i cine gwat misããmi mucuw naŋ, a ɓi ti gidaŋ: «Sawa!»

⁴Dar pilis mekelem a bo njukuɗok, naŋ gagaza ka vu. Mbur muanga na, a vulakaŋ gidaŋ ɓa a susuyumo ɓi ngi zuy asi ruwuyo, ɓa mizli a kiɗam vu vagay vagay ar wala taŋ, a vulakaŋ maslalam madiɗa kaw a haŋ.

⁵Tumuŋ muturo sluruɓ mimakir naŋ na, i cine gwat misããmi mimakir naŋ, a ɓi ti gidaŋ: «Sawa!» Keɗ na, pilis titra. Mbur muanga na, naŋ kaw ti kilo a haŋ.

⁶Dar yi cin kaɓa ˀay ngi mbur ti wuzla gwat misããmi mumufaɗay tuwa, a ɓi: «Alkamari kilo purla na, suloy pal, yo daw gisin kilo makir na, suloy pal, amma mal ati mbaazla na, ki wusa taŋ ta ɓula.»

⁷Ti tumuŋ muturo sluruɓ mumufaɗ naŋ na, yi cine gwat misããmi mumufaɗ naŋ, a ɓi ti gidaŋ: «Sawa!»

⁸Keɗ na, pilis muˀufroho. Mbur muanga na, a cakaŋ slimiɗe «Mucu», waɗ li cifi ngi mizli mumucahay ɓaˀ aseˀeŋ. Hirwuy muwuɗka a wuzla mufaɗ na, a vulaka taŋ gidaŋ ɓa a gam slra angi vay purla, ɓa a kiɗaka mizli vagay vagay ti maslalam, ti may, ti jiji, waɗ ti gwat muzuma vu ngi ɓuhoy.

⁹Ti tumuŋ muturo sluruɓ muzlum naŋ na, yi pur musuɗuk ngi mizli mikiɗaka taŋ vagay vagay zleˀe, asi ɓi ngi Buymisemuŋ waɗ asi sedewo taŋ migakaŋ. Taŋ asi virzi ngi li gi mikuli a mbuŋ Buymisemuŋ.

¹⁰A roko tilam mi ti gidaŋ, a ɓam: «Buymisemuŋ, ka mipal, yo ka mikaslsla na, kisa muro kiita ngi mizli ngi ruwuyoy pula cuwal ngi taŋ mikiɗam ndra na, hã ti vunaka?»

¹¹Dar a vulaka taŋ jibe babarahay purla purla gar. Yo a ɓaka taŋ, anja a ɓusaka neˀ ava ɗagay, sey da cil taŋhay, taŋ migam slra bumoˀ, yo sukum taŋ mitiɓihey, masa kiɗaka taŋ vagay vagay ka taŋ na, a ndilaka le gucuˀo ya.

¹²Dar ya mupura tumuŋ muturo sluruɓ mimerkeɗ naŋ na, hirwuy a wus hiɓik hiɓik haɗi. Pas a tiri titra ndel kaɓa gabaga muluso. Kiya zlar gar, a mbiɗi gagaza ndez ka pumbusu.

¹³Wurzlaŋhay a diɗoko paɗ a muŋ nga ruwuy, kaɓa burkataŋ gambara mahiro yi ngi ˀuruf magalaŋ.

¹⁴Muŋ a susuyum avra kaɓa mbur mafuɗ ɗerewol ngi garaka. Muwãhay ati maturahay gar, a wusam hiɓik hiɓik.

¹⁵Buy madiɗa ngi ruwuyoy, mizli madiɗahay, buy ngi sojehey, misi zlilihey ati misi gidaŋhay, mizli gar, bekehey ati mizli diimuhoyo, a ɗumom angi butumoy waɗ ar wala muwãhay.

¹⁶Joˀ a ɓaka muwãhay ati gidigil muwãhaya: «Mbuzloko ng'ar ndra, ɗumom ndra kileŋ a mihiri ngi mbur muangi janga naŋ ngi buy na, yo kileŋ avu himaˀ ngi tumuŋ na.

¹⁷Asi hin madiɗa ngi zuɓa himaˀ taŋ na, a ndilo le. Macici zlak gu, i waka?»