Read South Giziga REV 7 Bible Online

REV 7 - South Giziga bible

REV 7

¹A dirba nah na, i pur modro ngi Buymisemuŋhoy mufaɗ, dedeŋ ar zlirɗiy ngi hirwuy mufaɗ taŋ gar. A tikaka himiɗ mumufaɗ ngi si duniya gar, ɓa a gi asi ruwuyo ta. Ko angi mubuliy, malla ko angi widis pal tekeɗe, a gi ta.

²Waɗ i pur modro mekelem ma, ara bo tisi pas ngi mipriki. Naŋ kaw ti gwat ngi ɗuva haŋ ngi Buymisemuŋ misi ti siifa. A tila mi ti gidaŋ da modro mumufaɗ mulumam gidaŋ ɓa a hiryaka hirwuy ati mubuliy tuwa,

³a ɓa taŋ: «Jam lesl, hirwuy, mubuliy malla ko widiseye, ki hiryaka taŋ ta, sey da ndra muɗuvaka haŋ le a midibiɗ gawla ngi Buymisemuŋ ndraˀahaya.»

⁴Dar a ɓikiy taˀ ngi mizli muɗuva taŋ haŋ le a midibiɗ tuwa, taŋ durmuk skat ti kukur mufaɗ nga mufaɗa. A boko ti ngi sukwi ngi Israyeley mitaˀ taˀ kuruˀ nga cuw na.

⁵Angi sukwi ngi Zuda, mizli muɗuva haŋ a midibiɗ taŋhaya, taŋ durmuk kuruˀ nga cuw. Angi sukwi ngi Rubene, durmuk kuruˀ nga cuw. Angi sukwi ngi Gata, durmuk kuruˀ nga cuw.

⁶Angi sukwi ngi Asere, durmuk kuruˀ nga cuw. Angi sukwi ngi Neftali, durmuk kuruˀ nga cuw. Angi sukwi ngi Manase, durmuk kuruˀ nga cuw.

⁷Angi sukwi ngi Simeyoŋ, durmuk kuruˀ nga cuw. Angi sukwi ngi Levi, durmuk kuruˀ nga cuw. Angi sukwi ngi Isakara, durmuk kuruˀ nga cuw.

⁸Angi sukwi ngi Zabuloŋ, durmuk kuruˀ nga cuw. Angi sukwi ngi Zozefe, durmuk kuruˀ nga cuw. Angi sukwi ngi Benjameŋ, durmuk kuruˀ nga cuw.

⁹A dirba nah na, i pur zigiduw haɗi, ko a sluf ta. A boko ti ngi sukwi gar, ti ngi sukwi mitaˀ taˀ gar, tir lihey wal wal ati li maɓam mi wal wal gar. A cicam dedeŋ a mbuŋ janga ngi buyo, a mbuŋ tumuŋ. A kam jibe babarahay waɗ mihaŋ ngi dibinojehey kaw kaw a haŋ taŋhaya.

¹⁰A tilam mi ti gidaŋ, a ɓam: «Buymisemuŋ ndra, muangi janga ngi buyo, malaha ndra, i naŋ ati tumuŋ.»

¹¹Dar modrohoyo gar, a gunoko janga ngi buyo, mizli micawwahay waɗ gwat misããmi mumufaɗay tuwa. A hurkom huruk huruk a ruwuy, a mbuŋ janga ngi buyo, dar a putukulom a mbuŋ Buymisemuŋ,

¹²a ɓam: «Amin Buymisemuŋ ndra, anja mizli a hunumakaŋ, a gakaŋ dudok, a puraka, naŋ ti sinmijileŋ, a gakaŋ sise, a ɗuvakaŋ hirnga, a vulakaŋ madiɗa, yo a sinaka, naŋ ti gidaŋ, hã ngi sete! Amin.»

¹³Dar mbur pal a wuzla mizli micawwahaya, a ɓiy: «Mizli miki jibe babara tayna, i waniyka? A soko ti damaka?»

¹⁴Yi mbiɗaŋ di: «Buy ɗu, misina, i ka!» Dar a ɓiy: «Taŋ i mizli mucohoko baɗ tir bonoy madidiɗa. A bunaka jibe taŋhaya le, yo a pusluɗaka taŋ le angi pumbus ngi tumuŋ.

¹⁵Taŋ mideŋ deŋ a mbuŋ li cifi ngi Buymisemuŋ na vurˀe, yo a dilkam a mbuŋ naŋ duvuɗ ti papas gar angi hay naŋ. Buymisemuŋ muangi li cifi nga naŋ buy na, a sa jigina taŋ.

¹⁶May anta sa ja taŋ mata, yam anta sa ga taŋ mata, pas malla vu miwik wik anta sa wura taŋ mata.

¹⁷Asi tumuŋ misi a wuzla janga ngi buy na, a sa tiri mijigin taŋ, a sa ru ti taŋ ng'ar miviɗiviɗi ngi yam. Dar Buymisemuŋ a sa sohõ taŋ tuwuy ngivi hiri taŋhaya ceke.»