Read South Giziga REV 8 Bible Online

REV 8 - South Giziga bible

REV 8

¹Ti tumuŋ muturo sluruɓ mitarnaˀ naŋ na, muŋ a cifi siriw, a gi gwat ngi reta ler.

²Dar i pur modrohoy tarnaˀ dedeŋ a mbuŋ Buymisemuŋ. A vulaka taŋ tulumoy tarnaˀ.

³Modro mekelem a so cici gweˀ avu li gi mikuli a mbuŋ Buymisemuŋ. Naŋ kaw ti gandaf ngi ɓiri tapasl tapasl ngi zluma mukuturɓuy, yo a vulakaŋ mukuturɓuy ngi zlum ti zlum haɗi ɓa a vula da Buymisemuŋ jom ati diradibiɗ ngi mizli ngi Buymisemuŋhoy gar angi li gi mikuli, mindira ti ɓiri tapasl tapasl misi a mbuŋ janga ngi buyo.

⁴Dar cunju ngi mukuturɓuy tuwa a bi sẽwwe ti haŋ modro tuwa a mbuŋ Buymisemuŋ jom ati diradibiɗ ngi mizli ngi Buymisemuŋhoyo.

⁵Modro a zuɓa gandaf ngi zluma mukuturɓuy tuwa, a naha ti zayvu ngir li gi mikuli a mbuŋ Buymisemuŋ, a hiziga nga ruwuy. Angi nana, vuŋ a ndisl, ˀay a cin, vuŋ a wucuɗ, hirwuy a wus hiɓik hiɓik.

⁶Modrohoy mitarnaˀ misi ti tulumoy tarnaˀ tuwa, ara wam vu ɓa a faka taŋ.

⁷Modro mudumbuŋ, a fa tulum naŋ tõõt. Slaslalay waɗ vu milihiɗa jom ati pumbus a diɗoko nga ruwuy. Hirwuy muwuɗka a wuzla taˀ taˀ makir na, purla a wur. Widisey a wuram, waɗ giziŋ tukuzohoy kwana, kanah ya.

⁸Yo modro mucuw naŋ a fa tulum naŋ. Gwat mubam vu ati muwã madiɗa, ara tiɓi vu, a diɗo ng'ar mubuliy. Mubuliy muwuɗka a wuzla makire, purla a tiri pumbusu.

⁹Gwat misi titiri ngir mubuliy muwuɗka taŋ taˀ taˀ makir na, ngir mupurla asi taŋ a micam ceke. Palalam madiɗahay muwuɗka taŋ taˀ taˀ makire, taˀ purla asi taŋ a zizi kuɗup.

¹⁰Yo modro mimakir taŋ, a fa tulum naŋ. Wurzlaŋ madiɗa matiɓi vu kaɓa daliivu a ndilawa paɗ a muŋ ng'ar pal ngi mizaway ati miviɗiviɗi ngi yamay muwuɗka taŋ taˀ taˀ makire.

¹¹A zilaka wurzlaŋ nah na, «Ɗalak.» Yam ngi raˀa, a tiri ɗalak. Mizli haɗi masam yam nah, a micam asi yam nah a tiri le ɗalaka.

¹²Modro mumufaɗ taŋ, a fa tulum naŋ. Pas, kiya waɗ wurzlaŋhay, muwuɗka taŋ taˀ taˀ makir, taˀ taˀ makire, pal asi taŋ gar a kiɗ, a go luvuŋ. Papas ati duvuɗo, li minjahha taŋhay muwuɗka taŋ a wuzla taˀ taˀ makir, taˀ taˀ makire, pal asi ngi papasa, a kiɗ, yo ngi duvuɗo kwana, kanah ya.

¹³Dar i pur hiri na, i cine mulu maslikiɗ a dadala muŋ. A til mi ti gidaŋ: «Kay! Bonoy, bonoy, bonoy, avu mizli ngi ruwuyoyo, asi modrohoy mindiram makir masa faka tulum taŋhay ti fi aruŋ na.»