Read South Giziga REV 9 Bible Online

REV 9 - South Giziga bible

REV 9

¹Yo modro muzlum taŋ, a fa tulum naŋ. Keɗ na, wurzlaŋ a diɗo paɗ a muŋ nga ruwuy. Joˀ a vulakaŋ lakle ngi vigiɗ mijileŋ ngi ruwuy.

²Wurzlaŋ tuwa a wuna mi ngi vigiɗ mijileŋ ngi ruwuyo wun na, cunju a bo turliŋ ti ngaˀa, kaɓa cunju ngi vu madiɗa, a sirta pas ati muŋ timbiɗim.

³Jaray a bo ti wuzla cunju tuwaŋ, a wuh asi ruwuyo. A vulaka taŋ gidaŋ rakrak ka ngi ˀurucoy.

⁴A tikaka taŋ ɓa ko a gam malambaˀ da giziŋ ngi si ruwuyo ko neˀ ta, ko da kalaf malla ko da widisey, a gaka taŋ di neˀ ta. Amma sey da mizli manja ɗuva haŋ ngi Buymisemuŋ a midibiɗ taŋhay na si.

⁵A pulaka taŋ jiviɗ ɓa a kiɗaka mizli vagay vagaya ta, amma sey a gaka taŋ bonoy ngi kiya zlum. Bonoy, taŋ magaka taŋ di na, naŋ kaɓa ngi ˀuruc mumula mbur le.

⁶Angi hin nah na, mizli a sa puram jiviɗ ngi mucu, amma anta sa lumam muco ta. A sa hĩyãm mucu, amma muc a sa kil kileŋ avu taŋ.

⁷Jarayay a bam vu ati pilisey majuwaka taŋ le nga gi vurum, hirngahay tuwaɗ tuwaɗ ti gwat kaɓa loppol ngi ɓiri tapasl tapasl. Mihiri taŋhaya, a bam vu ati ngi mizli.

⁸Himac hirnga taŋ silip silip ka ngi ngwasay, yo sliŋ taŋhaya, kaɓa sliŋ ngi mobor.

⁹Didak taŋhaya, kaɓa a sirtaka taŋ le ti libiti. Da ara slikiɗam na, zlara taŋhay a hurmom kaɓa mota ngi pilisey, pilisey mbeˀ mbeˀ maɗiɗaka taŋ, makilam taŋ angi vurum.

¹⁰Taŋ ti dangwal diɓiliŋ diɓiliŋ ka ngi ˀurucoy. A vulaka taŋ gidaŋ avu dangwal taŋhaya, ɓa a gaka bonoy da mizli hã kiya zlum.

¹¹Taŋ ti buy taŋ madiɗa, i modro ngi vigiɗ mijileŋ ngi ruwuy. Slimiɗ naŋ ti mi Hebere: «Abadoŋ», ti mi Greke: «Apoliyoŋ», mbiɗeˀvra: «Mingizla gwat.»

¹²Kay! Bonoy mudumbuŋ a cuh le. Pura ɗi! Bonoy mekelemey cuw ara ndiloko a dirba nah ma.

¹³Modro mimerkeɗ taŋ, a fa tulum naŋ. ˀAy kaɓa ngi mbur a cino tir mivay ngi li gi mikuli misi ti ɓiri tapasl tapasl, misi a mbuŋ Buymisemuŋ.

¹⁴ˀAy macino tuwa, a ɓa modro mimerkeɗ naŋ misi ti tulum kaw a haŋ tuwa: «Pula modrohoy mumufaɗ mujuwahay ti celelu aciki mizaw Efrat na.»

¹⁵A pulaka modro mumufaɗ tayna, mujuwam vu kaˀ kaˀ ngi kiɗa taˀ purla a wuzla mizli titrahay muwuɗka taŋ taˀ taˀ makir na, angi ler nah, hin nah, kiya nah, yo angi vi nah.

¹⁶A ɓikiy na: taˀ ngi soje misi piliseye, taŋ miliyoŋ skat skat cuw.

¹⁷Buymisemuŋ mibigiy pilisey ati mizli mujoˀ angi taŋ, ya mupura taŋ na, a kam libiti , gagaza kaɓa vu, ngil ngil ka ɗugur safir , yo wuy wuy kaɓa baruudu. Hirnga ngi piliseye, taŋ kaɓa hirnga ngi mobor. Vu, cunju waɗ baruudu a boko ti balam taŋhaya.

¹⁸Vu, cunju ati baruudu, bonoy mimakir tayna muboko ti balam pilisey tuwa, a kiɗaka taˀ pal ngi mizli a wuzla mimakirey tuwa vagay vagay.

¹⁹Asi gidaŋ ngi piliseye, naŋ a balam taŋhay waɗ avu dangwal taŋhay. Naŋ kine, dangwal taŋhaya, a bam vu ati kaway, hirnga avu taŋ, a gaka bonoy da mizli ti taŋ.

²⁰Amma mizli mindiramay, bonoy mikiɗa taŋ vagay vagay ta gar na, t'anta zilam marava asi malambaˀ, taŋ migaka ti haŋ taŋ na ta ma. A ra dilkam a mbuŋ milyamay, kuli mipa ti ɓiri tapasl tapasl malla ti ɓiri bara, ti ɓiri gaza, ti ɗugur, malla miciɗa ti ciɗ na si. Gwat tayna, anta puram ta, anta cinam ta, yo anta ram ta ma.

²¹Taŋ makiɗam hirnga, taŋ magam sin ngi gi cekenehey, taŋ magam madama ati taŋ mahulom gar na, ko t'anta zilam marava aseˀe ta.