Read South Giziga RUT 3 Bible Online

RUT 3 - South Giziga bible

RUT 3

¹Ti di numuŋ ada na, Noˀemi a ɓa dideˀe: «Zuŋ ɗu, sey i lum jiviɗ, ɓa tumbuŋ ki ndir ar wuya.

²Boˀos mupuluw ki gi slra ati ngwas migi slra naŋhay na, i muy ndra mikasl wãˀ. A ra ru nga ɗugo daw naŋ a məlaŋ ti hiikuɗ dana.

³Bun, gi urdi, ka zana ɗik mezleheye, aru nga məlaŋ. Amma ki bigaŋ vu daf ta, sey a zum, yo a si gwat kpeˀ ɗagay.

⁴Naŋ masa ru nga hin so na, pura li naŋ masa ra hin ara kuy kuy, kirih ng'avaŋ, ngwaˀa borgo ti dasar naŋ ngwaˀa, hin tup avu sar naŋ. Naɓa a sa ɓuw ɓi ngi gwat ka masa ga vuna si.»

⁵Rut a mbiɗaŋ di: «I sa ga gwat ka miɓi di na cek.»

⁶Rut aru nga məlaŋ tuwa, a ga kaɓa dideˀ naŋ miɓaŋ di tuwa gar.

⁷Boˀos a zum, a si gwata, mevele a hin le, a so hin tup a ciki daw mukos kos tuwa. Dar Rut tuwa, a so yaŋ yaŋ, a ngwaˀa borgo ti dasar naŋ ngwaˀ, a hin tup.

⁸Yo ngi wuzla duvuɗo, Boˀos tuwa, himiɗ a gaŋ, a puɗuk puɗuk. A mbiɗi pulaˀ ngir ti mbuŋ na, keɗ na, ngwas tup a dasara.

⁹Boˀos a cufuɗaŋ: «I ka waka?» Rut a mbiɗaŋ di: «I ya Rut beke ɗiki, ɓul jijiwiɗ ar ya takwa, asi ki muzuma hay.»

¹⁰Akẽh Boˀos a ɓaŋ: «Anja Bumbulvuŋ a ɗuwuluw mi zuŋ ɗu! gi teŋteŋ ka mibiga hana, i gwat madiɗa haɗa, fineˀ ka mibiga mudumbuŋ na ma. Asi ki sipi di gawla misi zlili malla misi murgahay ta.

¹¹Wurenna so na zuŋ ɗu, ki zluwun ta. Gwat ka mucufuɗ le gar na, i sa guw di. Asi mbur ngi hay ndra aka gar na, a si na le ki ngwas mupuɗaw.

¹²Naŋ kanah gisiŋ, yi muzuma hay gwaɗ naŋ, na mbur migweˀ ngi zuma hay mifineˀ ya ada.

¹³Wun li aka kwaɗay. Ti miprike, i sa puraka ɓi nah, da a ngiluw na kuy, amma da a wuɗ ngiluw ta na, hadam ti Bumbulvuŋ misi ti siifa, naɓa yi sa ngiluw! Wun li aka ɗagay.»

¹⁴Rut a wun li a dasar Boˀoso. Amma a slikiɗ ngi li guv guv vur taŋ masinakaŋ. Naŋ kine, ngwas hana aru le a məlaŋ na, Boˀos anta wuɗ ɓa a sinaka ta!

¹⁵Boˀos a ɓaŋ: «Njira zana ngi hirnga ɗike, jakaw.» Rut tuwa, a jakaw, dar Boˀos a waŋ daw giziŋ kilo kuruˀ nga zlum, a zuɓaŋ nga hirnga. Dar Rut a mi ng'ar walahay.

¹⁶A ci ng'avi dideˀe, a ɓaŋ: «Ki gi na mbri ska zuŋ ɗu?» Joˀ Rut a slufaŋ gwat Boˀos migaŋ taŋ na cek.

¹⁷Rut tuwa, a ɓaŋ ma: «A vuliy daw giziŋ ani kilo kuruˀ nga zlum, asi a ɓiy na: anja ki mi kavbar kine ng'avi dunuko ta.»

¹⁸Noˀemi a ɓaŋ: «Ka cifi joˀ, kutuko zuŋ ɗu, ɓa ki pura, da ɓi nah ara kiɗ mi mbrike na. Da Boˀos a ɗiya ɓi naŋ dana dana vuna ta na, mevele anta sa hin ta.»