Read South Giziga RUT 4 Bible Online

RUT 4 - South Giziga bible

RUT 4

¹Boˀos aru ng'ar li mangilam wuy ngi mizli, a mizlingreŋ ngi walahay, a cifi a diga, keɗ na, mbur muzuma hay ngi Elimelek, Boˀos miɓa ɓi naŋ tuwa, ara cuhu. Boˀos a ɓaŋ: «Sawa cifi aka kwaɗay.» Mbur tuwa, a sawa, dar a cifi joˀ.

²Akẽh na, Boˀos a wuɗ mizli kuruˀ a wuzla mizli micawwa ngir walahaya, a ɓa taŋ: «Inga cifam aka takwa.» Joˀ a cifam so.

³A dirba nah, Boˀos a ɓa mbur mikasl ngi muzuma hay ngi Elimelek tuwa: «Ki si na le, Noˀemi a mo le tir prok ngi Moˀapa. Ani a wuɗ ɓa a hiɗika guva ngi sukum ndra Elimelek na, avra muŋ.

⁴Na yi wuluk le, ɓa ki hiɗika a mbuŋ mizli micawwahay ati mizli ɗuwoy misi aka gar. Da ki wuɗ hiɗika guva naŋ na, hiɗikaŋ. Amma da ki wuɗ ta na, ɓiy di, ɓa yi sinaŋ. Asi guva nah, mbur ɓa a hiɗika, mbak ka le na, anta, a dirba ɗike kwana, i ya ya.» Mbur tuwa, a ɓaŋ: «i hiɗikaŋ.»

⁵Dar Boˀos a ɓaŋ: «Tapas ka masa hiɗika guva avu Noˀemi na, kisa ngila Rut zuŋ Moˀap, ngwas ngi vagay sukum ndra na, wãˀ tapasa ya, ɓa guva a ndir asi haŋ ngi muy ngi zil naŋ mumuc na.»

⁶Akẽh muzuma hay tuwa, a ɓi: «Da kine na, i hiɗika ta, naɓa a sa giy ngaˀ ngi zlili ɗu. I vuluw gi modogom ɗu da ka, ngi mbiɗi hirnga ngi guva ar deɗe ɗu, asi yi mbiɗa gu ta.»

⁷A ruwuy Israyele zleˀe na, da mbur ara mbiɗi hirnga ngi gwat malla a mbiɗam vu ti mbiɗi kwana, ɓa ngi kiɗa mi naŋ wãˀ na, mbur purla asi taŋ a cuko ta raka, a vula da mbur numuŋ, mbiɗeˀvra angi hirwuy Israyele, ɓi nah a ɗiyi le.

⁸Vurˀe, mbur muzuma hay ngi Elimelek tuwa, a ɓa Boˀoso: «Hiɗika da ka !» Dar a cuko ta raka, a vulaŋ di.

⁹Joˀ, Boˀos a ɓa mizli micawwahay ati mizli gar misi akẽh: «Dana, kum i sedewohoy, gwat ngi Elimelek ati ziri naŋhay, Kiliyoŋ ati Maloŋ gar na, yi hiɗika taŋ.

¹⁰Yo ma na, i ngila Rut zuŋ Moˀap, ngwas ngi Maloŋ da ya ma, naɓa guva a sa ndir da muy ngi vagay Maloŋhoyo yo i sa yam ziri, ɓa a wuzla sukum naŋhaya, malla ar li ngila wuy ngi mizli a mizlingreŋ ngi walahay kwana, slimiɗ naŋ a kiɗ ta. Kum i sedewo ngi gwat tayna dana.»

¹¹Mizli micawwahay ati mizli micikilam akẽh gar, a mbiɗakaŋ di: «Haˀaw, ndr'i sedewohoy. Anja Bumbulvuŋ a ɗuwula mi da ngwas maci ngi hay ɗik vuna, a tiri kaɓa Rasel ati Leya, ngwas ngi Zakopoy mucuw tayna, miyaka sukwi Israyeley taˀ gar na. Anja zlili ɗik a gi haɗi a wuzla Efrataya, yo ɓa slimiɗ ɗik a zil a Beteleyeme!

¹²Anja Bumbulvuŋ a ga ɓa ngwas zuŋ zuŋ aruŋ hana, a yuw ziri haɗa, ɓa hay ɗik a tiri ka ngi Peres mangal ngi Zuda miya ti Tamar.

¹³Dar Boˀos a ngila Ruto, a tiri ngwas naŋ. Boˀos aru ng'avaŋ, Bumbulvuŋ a ɗuwulaŋ mi, a gi hur, a yi mangal mizile.

¹⁴Vurˀe, ngwasay a ɓaka Noˀemi: «Gukum sise da Bumbulvuŋ, asi dana, a vuluw mbur le, masa ki slimiɗ ar ka. Slimiɗ ngi dideˀ ɗik a sa zil asi ruwuy Israyele.

¹⁵Mangal nah, a sa vuluw gidaŋ ar siifa ɗike, yo a sa jinuw ar mandangwas ɗike. Asi ngwas ngi mangal ɗik hana, naŋ avu ka fineˀziri mizilehey tarnaˀ, asi ara wuɗuw, yo a yuw dideˀ le ma.»

¹⁶Dar Noˀemi a zuɓa mangala, a ja gumbuˀ a didaka, a gilaŋ.

¹⁷Ngwas midigwi naŋhay a tilam mi, a ɓam: «A ya ka mangal le da Noˀemi!» Dar a zilaka mangala Obet. Obet a yi Zese, cine ngi Davit.

¹⁸Slimiɗ ngi dideˀ ngi Davitey ani, zle avu Peres: Peres a yi Hesroŋ,

¹⁹Hesroŋ a yi Ram, Ram a yi Aminadap,

²⁰Aminadap a yi Nasoŋ, Nasoŋ a yi Salma,

²¹Salma a yi Boˀos, Boˀos a yi Obet,

²²Obet a yi Zese, yo Zese a yi Davit.