Read South Giziga 1SA 1 Bible Online

1SA 1 - South Giziga bible

1SA 1

¹Mbur ada a Rama, hirwuy Suf, a muwã Efrayim, a zilaka Elkana, mangal ngi Yeroˀam, naŋ vuna i dideˀ ngi Elihu, i dideˀ ngi poprok ngi Tohu, yo i dideˀ ngi mukutur ti kutur ngi Suf mbur Efrat.

²Elkana naŋ ti ngwasay cuw. A zilaka mekeleme Ana, yo mucuw naŋ, Penina. Penina naŋ da ti ziriy, amma Ana naŋ anta ti ziriy ta.

³Vi gar na, Elkana a slikiɗ baɗ ar walahay naŋ Rama, aru nga Silo ɓa a huruk huruk a mbuŋ Buymisemuŋ, misi gidaŋ wãˀ, yo ɓa a gaŋ mikuli. Zir ngi Elihey ada cuw, i masay migi mikulihey da Buymisemuŋ a diga, i ti Hofni ati Pinas.

⁴Tapas Elkana mira ga mikuli na, Penina ati ziri naŋ mizilehey waɗ mongosohoyo gar, a sirik le, ngi vula taŋ useˀ ngi mikuli laŋ laŋ.

⁵Buymisemuŋ a ga Ana le i dirlay ngbaŋ, amma Elkana a vulaŋ nga naŋ makaw cuw, asi a wuɗaŋ haɗa.

⁶Penina ati giseˀe naŋ Ana i misi suloŋhoy, Penina a jigin mi ndrehhe avu Ana, ɓa a tikaŋ ˀay asi Buymisemuŋ migaŋ i dirlay tuwaŋ.

⁷Naŋ kine, vur vi gar, tapas Ana muru le ng'ar hay ngi Buymisemuŋ gar na, Elkana ara ga kanah. Penina a zaŋ ɓa a tikaŋ ˀay. Dar Ana a zla a tuwuy, a ngum zuma gwata ta.

⁸Zil naŋ Elkana a cufuɗaŋ: «Ki tuwuy vur mike Ana? Ka malik na vur mike? Ya puɗaw avu ka fineˀ ziri mizilehey kuruˀo ta kwa?»

⁹A dirba taŋ muzumam gwat, yo taŋ misam gwat a Silo na, Ana a slikiɗi. Naɓa Eli, masay naŋ da ar gwat ngi cifi naŋ a miviŋ ngi hay ngi li ngi Bumbulvuŋ.

¹⁰Ɓi ara gira Ana haɗa teˀe a mevele. A tumbulo Buymisemuŋ ti tuwuy kol kol haɗa.

¹¹A ɓa Buymisemuŋ ɗaˀ le: «Buymisemuŋ, misi gidaŋ wãˀ, ambuh, pura bonoy ngi beke ɗike, wuluk keŋ ar ya, puriy ircece, da ki vuliy mangal mizile le na, yi sa vuluw di, ɓa a gi gawla ɗik ar hin ngi siifa naŋ gar, yi sa vula ɓa a gi slra ɗiki, yo sliwiɗ himac anta ɗuv avu hirnga naŋ ta.»

¹²Ana ara tumbulo Buymisemuŋ hã a zik di haɗa, Eli ara pura cum cum cum.

¹³Ana ara ɓi daˀ a kwacay naŋ. Sey mi mawus tewle si. ˀAy naŋ maɓi anta cin ta, Eli a wa na kaɓa a wi le ti wi.

¹⁴Eli a ɓaŋ: Wi ɗik a kiɗ mi ta, a kiɗ mi ta hã ti vunaka? A ra wuyaha mbaazla ɗik ar li mekelem.

¹⁵Ana a mbiɗaŋ di: «Kumani, yi wi ta. Yi si mbaazla ta, ko gwat mawi vu, yi si ta. Amma i ra vul di i gir ɗu da Buymisemuŋ.

¹⁶Ngwas migi slra ɗike, ki gi di kaɓa i ngwas malambaˀ ta. Ya mira ɓi hã wurenna na, asi wuluk ati bonoy a finiy gidaŋ le wãˀ.»

¹⁷Dar Eli a mbiɗaŋ di: «Aru zuy zuy, gwat ka mucufuɗ avu Bumbulvuŋ ngi Israyel na, anja a vuluw di.»

¹⁸Ana a ɓaŋ: «Puriy kuy avu hiri ɗike, ya ngwas migi slra ɗike.» Ana a ru, a ngum zuma gwata muduba, ndurɓo hiri anta mata.

¹⁹Ngi miprik prik na, Elkana ati hay naŋ a slikiɗam, a huruk hurukam a mbuŋ Buymisemuŋ, a mam ngi hay taŋ a Rama. Elkana, a sinam vu ati ngwas naŋ Ana. Buymisemuŋ a cine tumbul ngi Ana le.

²⁰Ana a gi hur, a yi mangal mizile. A caŋ slimiɗe Samuyel, asi a ɓi na: «I cufuɗa mangal misenna avu Buymisemuŋ.»

²¹Akẽh ma na, Elkana ati hay naŋ gar a ram nga gi mikuli da Buymisemuŋ a Silo, mikuli magaka ar vi gar, yo ɓa a ga gwat ngi ji mi, naŋ miɓi zleˀe a sa ga tuwa.

²²Amma, Ana, naŋ aru ta, asi a ɓa zile na, «Kutukukum di, mbak mangal a pula ɗuwa ɗagay. Dar yi sa ru di, a sa huruk huruk a mbuŋ Buymisemuŋ, yo yi sa pulaŋ mbak wãˀ a digaŋ.»

²³Zil naŋ Elkana a mbiɗaŋ di: «Naŋ kuy kaɓa ka mapura, cifi di aka hã tapas naŋ mupula ɗuwa le. Gwat Buymisemuŋ miɓa na, anja a ga ɓula.» Dar ngwas a cifi, a vula ɗuwa da mangala, hã hin naŋ mupula ɗuwa.

²⁴A dirba mangal mupula ɗuwa na, Ana aru di nga Silo waɗ gusoŋ ngi vi makir a haŋ, yo hapa gungwa, waɗ mbaazla kwenekwene. A ci di ng'ar hay ngi Buymisemuŋ a Silo, joˀ mangal a tiri gawla ngir hay ngi Buymisemuŋ.

²⁵A gam mikuli ti gusoŋ, a ram ti mangala nga mbuŋ Eli.

²⁶Ana a ɓa Eli: «Ambuh kumani, Kaɓa ka misi ti siifa gisiŋ na buy, naŋ kanah ya, yi ngwas micici ada deŋ zleˀe a ciki ɗik aka, ngi tumbulo Buymisemuŋ tuwaŋ.

²⁷Ya midir dibiɗ na, vur mangal hana, yo Buymisemuŋ a vuliy gwat ya cufuɗ ava le.

²⁸Ya kwana, yi vulaŋ da Buymisemuŋ. Naŋ da Buymisemuŋ wãˀ ar hin ngi siifa naŋ gar.» Dar Samuyel a huruk huruk a diga a mbuŋ Buymisemuŋ.