Read South Giziga 1SA 10 Bible Online

1SA 10 - South Giziga bible

1SA 10

¹Dar Samuyel a zuɓa durum ngi mala, a paŋ di da Sawul a hirnga, a jaŋ kuɓuy. Akẽh na, a ɓaŋ: «Buymisemuŋ ti haŋ naŋ a cuw le, ki buy ngi mizli naŋhay.

²A dirbaka mapuliy ani dana na, kisara ji hirnga ti mizli cuw a ciki zivi ngi Rasel a Selsa, angi hirwuy Benjameŋ. Mizli tayna a sa ɓukuw na: zungu madiyahay, ka muru nga pur taŋ na, a lumaka taŋ le. Yoˀ wurenna bunuk a puyuko hirnga ngi ɓi ngi zunguhoyo le, mazluwunaŋ i ɓi ɗik muduba. Bunuk ara ɓi ti kwacaya: I gi mbri ɓa nga lumo mangal ɗu naka?

³Akẽh na, zar neˀ avu li nah ma na, kisa ndil avu widis madiɗa ngi Tabor. Ki sa ji hirnga ti mizli makir a diga maram nga gi mikuli da Bumbulvuŋ a Betel. Mbur mekeleme, naŋ ti ziri ˀaway makir a haŋ, mbur numuŋ naŋ ti ɗafahay makir, yo mimakir taŋ, naŋ ti kwenekwene ngi mbaazla.

⁴A sa jukuw haŋ, waɗ a sa vulukuw ɗaf cuw, yo kisa tiɓa taŋ tisi haŋ taŋ.

⁵A dirba nah, kisa ndil a Gibeya Elohim, buy miwi li ngi Filistihey misi a diga na. Ti ka misa ci le ng'ar walahaya a diga na, kisa ji hirnga ti mijiviɗ ngi Bumbulvuŋhoy hiɗim hiɗim mapoko sar tir li miɗingir magam mikuli a diga. Mikiɗa gujuvuroy ati gangaŋhay, mifi bozlorohoy ati mikiɗa kããkuhoy sek a mbuŋ taŋ, taŋ kaɓa mizli maɓam ɓi Bumbulvuŋ manjika taŋ di.

⁶Akẽh na, musuwun ngi Buymisemuŋ a sa so cici ar ka, kisa ɓi ɓi Bumbulvuŋ manjikuw di, yo kisa mbiɗi, ki tiri mbur mekelem pal.

⁷Daka misa pura le gwat tayna gar ara gam avu ka na, gwat ka masa luuma ngi gi gar na, gaŋ, asi Bumbulvuŋ naŋ da ati ka.

⁸Ki sa ru dumbuŋ ar ya nga Gilgal. Ya na, yi sa ra lumuw, ɓa ngi gi mikuli mizlam zlam wãˀ ati mikuli ngi vula zuy. Ki sa kutukuy hin tarnaˀ, hã da ya mira lumuw le. Akẽh na, yi sa buguw gwat ɓa sey ka masa ga.»

⁹Sawulo, zle ti naŋ mimi, mupula Samuyele si na, Bumbulvuŋ a mbiɗaŋ mevele, yo gwat Samuyel miɓa miɓa gar na, a gam ava angi hin nah vuna si.

¹⁰Ti taŋ mandilam nga Gibeya na, mijiviɗey a soko kaw kaw hiɗim hiɗim a soko jam di hirnga. Joˀ a gi ka mijiviɗey jom ati taŋ. Akẽh na, ˀUf ngi Buymisemuŋ a ci a hur Sawulo, a zla a ɓi ɓi ngi Bumbulvuŋ manjikaŋ di, jom ati taŋ.

¹¹Mizli misin naŋhay zlezle zleˀe gara, a puraka ara gi ka mijiviɗ ngi Bumbulvuŋhoy, jom ati mijiviɗeye ya na, a cufuɗam a kwacay taŋ: «Mindilawa avu mangal ngi Kis i mike? Sawul a tiri mijiviɗ ngi Bumbulvuŋ le wurenna ya kwa gawlay?»

¹²Mbur pal a wuzla mizli ngir li nah tuwa, a ɓi: «Na mekelemey na, cine taŋ i waka?» Vurˀe, mizli a ɓam di mi ngi wuya: «Sawul a tiri mijiviɗ ngi Bumbulvuŋ le ya kwa gawlay?»

¹³Sawul tuwa, lesle mumo nga naŋ nga naŋ a muŋ na, aru ng'ar li miɗingir.

¹⁴Jamba naŋ a ɓaŋ, naŋ ati gawla naŋ tuwa: «Ki roko zleˀe amaka?» A mbiɗaŋ di: «I ram a pura zungu madiyahay mizizam zleˀe tuwa. Amma ko i lumaka taŋ ta, i ram ngi hay Samuyel.»

¹⁵Sawulo, jamba naŋ tuwa, a ɓaŋ na: «Ambuh, slufiy ɓi ngi Samuyel muɓuw di na ta kwa.»

¹⁶Sawul a ɓa jamba naŋ: «A ɓa ndra di le kuy kuy, a lumaka zunguhoyo le.» Amma ɓi Samuyel miɓaŋ di vur buy naŋ na, Sawul a slufaŋ ɓi ngi naŋ ta ɓula.

¹⁷Samuyel a zila mizli gar ng'ar hay ngi Buymisemuŋ a Mispa.

¹⁸A ɓa Israyeleye na: Naŋ kine, Bumbulvuŋ Buymisemuŋ, ngi Israyele a ɓi na: «Mubo ti Israyel baɗ ti Ezipte i ya, yo mutuɓukum tisi haŋ ngi Eziptehey waɗ ti vu buy ngi ruwuy mekelemey muguzuvurukum zleˀe na gar i ya.

¹⁹Na kumo, dana, ki pulaka Bumbulvuŋ kumo le avra. Naŋ muluhukum angi bonoy kumoy ati gir kumoy gar, yo wurenna ki ɓakaŋ: ‹Vula ndra buy.› Wurenna, soko bigaka vu kum a mbuŋ Buymisemuŋ, vur sukwi, vur sukwi, yo vur muy vur muy.»

²⁰Samuyel a kiroho sukwi ngi Israyele gar, a gam ceregezleŋ ar taŋ, amma ceregezleŋ a diɗ ar sukwi ngi Benjameŋ, a wunam di i sukwi naŋ.

²¹Samuyel a kiroho sukwi ngi Benjameŋ, muy vur muy, ceregezleŋ a diɗ ar muy ngi Matrihey, yo ar muy nah ma na, ceregezleŋ a diɗ ar Sawul, mangal ngi Kis. A sipaka akẽh, a lumakaŋ ta.

²²A cufuɗaka Buymisemuŋ ava ma: «Mbur nah vuna a so le aka kwa?» Buymisemuŋ, a ɓa taŋ: «Nˀani ɗum a ciki gwatay akẽh.»

²³Mizli a kilam, ara supoko di, a bugo vu a wuzla mizli. Kpak naŋ i mezle, yo a gil cõht fineˀ mizli gar.

²⁴Samuyel a ɓa sukwi Israyelehey gar: «Hana i mbur Buymisemuŋ muwunaŋ na, kum ada puraka ya? Mbur misi kaɓa naŋ anta a wuzla mizli ta.» Zigiduw gar a zluzluɓ ti ji salalay, a ɓi: «Buymisemuŋ a vula siifa da buyo.»

²⁵Ɓimuɗuva ati gidaŋ ngi buyo, Samuyel a slufa taŋ gar da zigiduwo. A toho ɓi nah toh toh ar ɗerewol waɗ a ka ɓaˀ a mbuŋ Buymisemuŋ. A dirba nah, Samuyel a ɓula mizli gar, mbur gar aru ngi hay naŋ.

²⁶Sawulo kwana, aru ngi hay naŋ a Gibeya. Mizli gambarahay misi Bumbulvuŋ muwusa taŋ le a mevele na, a kisakaŋ.

²⁷Amma mizli ngi pula giray ta na, a ɓam: «Mbur nah a sa laha ndra gu mbri mbrike?» A hirsakaŋ, yo taŋ anta sakaŋ ti gwat ngi vuloyo ta. Amma Sawulo, ko anta puraka ɓi ta.