Read South Giziga 1SA 11 Bible Online

1SA 11 - South Giziga bible

1SA 11

¹Nahas, buy ngi Amoŋhoyo, a go vurum nga Yabes, hirwuy Galaˀat, a ndahaka walahaya. Mizli ngir walahay Yabese gar a ɓaka buy Nahasa na: «Jumˀay ati ndra sini, ɓa ndr'i tiram gawla ɗikey.»

²Nahas, buy Amoŋ a ɓa taŋ: «Ɓa i jumˀay ati kumo na, gwat ya masa ga ani: mbur gar a wuzla kumo, i nduzoŋ hiri vay hazumo ndoz le ndoz le far, ɓa ngi pa mesem da Israyeleye gar.»

³Mizli micawwa ngi Yayesey a ɓakaŋ na: «Pula ndra ngi hin tarnaˀ ɗagay. I sa slinam ng'avu mizli angi hirwuy Israyel gar, yo da mbur pal mikilo widi ndr'anta na, i sa bam, i ram ng'avu ka.»

⁴Misliney a ndilam a Gibeya, walahay ngi Sawulo, a ɓaka ɓi nah da mizli gar a cinakaŋ, mizli gar a zlaka tuwuy ngirzliŋŋe.

⁵Kasl ti nah na, Sawul ara so ti ɓuh, ɓaˀ a dirba sla naŋhay. Sawul a cufuɗu: «Mizli gar a tuwam ngirzleŋŋe vur mike?» A ɓakaŋ ɓi ngi mizli ngi Yabesey tuwaŋ.

⁶Ti Sawul micina ɓi nah tuwa na, musuwun ngi Buymisemuŋ a diɗ vu kpis ar naŋ, a zla a zuɓ himaˀ ti gidaŋ.

⁷A hil slahay zlaɓ cuw, a suwutaka taŋ waɗ a sla useˀ taŋhaya laŋ laŋ, yo a slin mizli ti useˀ məlaŋ laŋhay tuwa, asi hirwuy Israyel gar, ti mi ngi ɓi aseˀe anihĩ: «Mbur mubo asi Sawul ati Samuyele ng'ar vurumo ta na, a sa gam ti sla naŋhaya kahana.» Buymisemuŋ a vula zluwun haɗa da sukwi Israyele, a bam ng'ar vurumo fuyõ ar li purla.

⁸Sawul a slufa taŋ a Bezek: Sukwi ngi mizli vay ngi muŋhoyo, taŋ durmuk skat skat makir, yo sukwi ngi Zudahaya, taŋ durmuk kukur makir.

⁹Mizli musoko ti mislin ti Yabes tuwa na, mizli a ɓaka taŋ: «A ra ɓaka mizli ngi Yabesey ar hirwuy Galaˀata na: «Tiprik ti wuzla papas na, naɓa ki lumam kila widi kumo le.» Misliney a soko faka ɓi nah da mizli ngi Yabeseye. Mizli gar ara mumulom.

¹⁰Yabesey a ɓaka Amoŋhoyo: «Tiprike, i sa bam i ram ng'avu kum, ɓa kisa gam ti ndra kaɓa kum muwuɗam le gar.»

¹¹Ngi li naŋ muwun so na, Sawul a ngica mizli naŋhaya li taˀ taˀ makir. Ngi taklumu na, a cam mbilimit ng'ar li taŋ mipam sara, a kiɗaka taŋ a kiɗaka taŋ vagay vagay hã ng'avu wuzla papasa. Mizli milahamaya, a zliɗam hirnga mber mber, mbak ɓa mizli a ndiram ani cuw arleˀe na, anta.

¹²Sukwi Israyel a ɓa Samuyele na: «Mizli miɓam zleˀe: ɓa Sawul a zum buy ar ndra kwa tuwa taŋ amaka? Anja a vulam ndra mizli tayna, ɓa i kiɗaka taŋ vagay vagay.»

¹³Amma Sawul a ɓi na: «Anta ngi kiɗa mbur vagay ar hin misi kahana ta, asi mike dana, Buymisemuŋ a vula luuma bugawla le da hirwuy Israyele.»

¹⁴A dirba nah, Samuyel a ɓa mizli: «Soko, a kum nga Gilgal, ɓa i ra maka hiri ngi ci buy ngi Sawul a muŋ.»

¹⁵Akẽh na, sukwi Israyel gar a ram nga Gilgala. A caka buy da Sawul a diga angi hay ngi Buymisemuŋ a Gilgal. A gam mikuli ngi vula zuy a mihiri ngi Buymisemuŋ. Sawul ati mizli Israyeleye gar, dar a mumulom haɗa teˀe.