Read South Giziga 1SA 12 Bible Online

1SA 12 - South Giziga bible

1SA 12

¹Samuyel a ɓa Israyeleye gar: «Naŋ kuy, ar gwat kum mucufuɗam avu ya gar na, yi vulukum di le: Yi cukum buyo le.

²Wurenna, buy, kum muwunaka, n'ani. Masa kukum mbuŋ i naŋ muduba. Asi mike na, ya yi gi gal le, yo ya hol tullo, yo ziri ɗuwoyo, t'ani ati kumo. Muko kum mbuŋ i ya zle ti zuŋ hã ndilo dana.

³Naŋ kine, y'ani deŋ ani a mbuŋ kum, a mihiri ngi Buymisemuŋ waɗ a mbuŋ mbur naŋ muwunaŋ: wudam ti ya, da kum ada ti ɓi ngi widi ti ya. Yi tiɓi sla ngi mbur le ɗaˀ kwa? Malla zungu ngi mbur? Yi zum gwat ngi mbur le ɗaˀ kwa? Malla yi gi bonoy le da mbur ɗaˀ kwa? Yi tiɓi gwat ngatara le avu mbur ɓa i tiɗi kalaf ar ɓi naŋ kwa? Da ada na, yi sa mukum di a muŋ.»

⁴Israyeley a mbiɗakaŋ di: «Ki tiɓi gwat ɗaˀ avu ndra ta, ki zluɓ ɓi ɗaˀ avu ndra ta, yo ki tiɓi gwat ngatara ɗaˀ avu mbur ta.»

⁵Samuyel a ɓi: «Buymisemuŋ ati mbur naŋ muwunaŋ na i sedewohoy dana, kum anta ki mbiɗiy hirnga neˀ ta.» Mizli a mbiɗakaŋ di: «Naŋ kaslslakanah.»

⁶Joˀ Samuyel a ɓa mizli: «Buymisemuŋ i naŋ migi ti Moyis ati Aroŋ ɓa ngi bo ti dideˀ kumoy baɗ ti Ezipte.

⁷«Na, wurenna, cicam dedeŋ akẽh a mbuŋ Buymisemuŋ kaɓa cici a mbuŋ kiita: slra mijeŋŋe Buymisemuŋ mugukum di, yo waɗ da dideˀ kumoy na, yi sa slufa taŋ.

⁸Ti Zakop mindil a Ezipte na, dideˀ kumoy a wudam ng'avu Buymisemuŋ, joˀ Buymisemuŋ a slino Moyis ati Aroŋ ɓa a bam ti dideˀ kumoyo, yo ɓa a soko pam ti taŋ angi li hana.

⁹Amma a puykam hirnga ngi Bumbulvuŋ Buymisemuŋ, taŋ le, dar naŋ kwana, a vula taŋ asi haŋ ngi Sisra, buy ngi soje ngi Hasoroy, asi haŋ ngi Filistihey, yo waɗ a haŋ buy Moˀap, a kiɗaka taŋ ar vurum.

¹⁰Akẽh na, a tilam mi ng'avu Buymisemuŋ, a ɓam: «I gam mungra le, asi ndra mupulaka Buymisemuŋ, yo ndra mihuruk hurukam a mbuŋ Baˀalay ati Astartehey na. Wurenna, laha ndra ti haŋ mesene ndraˀahaya, ɓa i sa huruk hurukam a mbuŋ ɗiki.»

¹¹Akẽh na, Buymisemuŋ a slino Zedeyoŋ, Bedaŋ, Zefte, yo waɗ ya Samuyel ɓa ngi lihukum tisi haŋ ngi mesene kumoy mugun hirnga kum na, ani ki cifam le setette asi ruwuyo.

¹²Amma ti kum mupuraka Nahas buy Amoŋ maso nga zlukum ngi kiɗa vu na, ki ɓikiy: «Kay! Vula ndra buy ɓa a zum buy ar ndra.» Kaɓa Buymisemuŋ naŋ anta i buy kum ta.

¹³Wurenna so na, buy kum muwunaka n'anihĩ, buy kum mucufuɗama. Yo Buymisemuŋ a vulukum buyo le, anihĩ.

¹⁴Da ki ra zluwunam ti Buymisemuŋ, da ki ra huruk hurukam a mbuŋ naŋ, da ki ra cinakaŋ mi, ɓi Buymisemuŋ muɗuvukum di le na, da kum anta slikiɗam ɓi vurˀe ta na, naɓa kum vuna ati buy mazum buy ar kumo, kisa sipaka Bumbulvuŋ Buymisemuŋ, kumo nga mbuŋ nga mbuŋ.

¹⁵Amma da kum anta cinaka mi da Bumbulvuŋ ta, ɓi Bumbulvuŋ muɗuvukum di le na, da ki ra slikiɗam ɓi vurˀe na, naɓa Bumbulvuŋ a sa biga gidaŋ naŋ ar kumo, kaɓa naŋ mibiga zleˀe da dideˀ kumoy na ya.

¹⁶Yo wurenna, cicam aka ma, ɓa ki puraka gwat madiɗa Buymisemuŋ mara ga a mihiri kumo.

¹⁷Wurenna i hin ngi sifi ngi alkamari takwa? I sa tumbulo Buymisemuŋ, a sa ga vuŋ a ndisl, yo ɓa vuŋ a gawa. Naŋ kine, kisa puraka malambaˀ madiɗa kum migaka avu Buymisemuŋ ti cufuɗa buy da kum vuna a muŋ na.»

¹⁸Samuyel a tumbulo Buymisemuŋ, ar hin nah vuna, Buymisemuŋ a ga vuŋ a ndisl, yo vuŋ a gi, joˀ sukwi ngi Israyeley gar a zluwunam haɗa ti Buymisemuŋ waɗ ti Samuyele.

¹⁹Sukwi gar a ɓaka Samuyele na: «Tumbulo Bumbulvuŋ Buymisemuŋ, ɗike vur ndra, ɓa anja i micam ta, asi ndra mucufuɗam buy da ndra vuna a muŋ na, i goko di i ɓesde ng'ar mungra ndrahay na gar ma.»

²⁰Samuyel a ɓa mizli: «Ki zluwunam ta. Malambaˀ nah gar na, ki gaka le gisiŋ gwat naŋ. Na so na, ki ra kiraham ti vu Buymisemuŋ ta, amma huruk hurukam a mbuŋ Buymisemuŋ ti mevel purla.

²¹Da kisa kiraham le avu Buymisemuŋ na, naɓa i ngi sa huruk huruk avu gwat lambaˀ ngataraŋ, mapulam gir ta, yo malaham mbur gu ta, asi mike i gwat lambaˀhay ngataraŋ.

²²Buymisemuŋ naŋ anta sa pulukum ta, asi muwuɗ tiri ti kum sukwi naŋ na i naŋ vuna, vurˀe, slimiɗ naŋ mupuɗaw haɗa na, naŋ anta hirya ta.

²³Nga ya kwana, ɓa i pula tumbulo Buymisemuŋ vur kumo na, i mungra mukuyta wãˀ avu Buymisemuŋ. Jiviɗ mezle, yo mikaslsla na, yi sa bugukum di nga mbuŋ nga mbuŋ ava.

²⁴Kum aya kwana, zluwunam ti Buymisemuŋ, yo huruk hurukam a mbuŋ naŋ kaslsla ti mevel purla. Naŋ kine, puraka gwat madiɗahay naŋ miga taŋ vur kum na.»

²⁵Amma da ki ra gam malambaˀ na, kum ati buy kumo, kisa ngizlam kuɗup.