Read South Giziga 1SA 13 Bible Online

1SA 13 - South Giziga bible

1SA 13

¹Sawul mitiri buy na, naɓa naŋ ti vi... Yo a zum buyo vi cuw ar hirwuy Israyele.

²Sawul a wini sojehey durmuk makir angi hirwuy Israyele. Soje durmuk cuw na, a cifam ati sawul a Mikmas, angi hirwuy muwã Betel, yo mudurmuk purla na, a cifam ati mangal naŋ Zonataŋ a Gibeya, hirwuy Benjameŋ. A waha mizli Israyele mekelemeye, mbur gar ngi hay naŋ.

³Buy miwi li ngi Filistihey ada a Geba. Ngi pas numuŋ na, Zonataŋ a kiɗa vagay. Filistihey a cinaka ɓi nah le. Sawul a ɓi ɓa a fam tulum asi ruwuyo gar, asi a ɓi na: «Anja Heberey gar a cinaka ɓi nah.»

⁴Israyeley gar a cinaka na, Sawul a kiɗa buy miwi li ngi Filistiheye le, hã ɓi nah a slikiɗa mevel ngi Filistihey ar Israyeleye. Vurˀe, mizli Israyeley gar a kusom avu Sawul a Gilgal.

⁵Filistiheye kwana a juwam vu ngi kiɗa vu ati Israyeleye. Taŋ ti mota ngi vurumoy durmuk kukur makir, misi pilisey durmuk merkeɗ, yo waɗ sojehey zurnok zurnok haɗa kaɓa muyuŋ ngi mizaw. A ra pam a Mikmas tisi pas ngi miprik ngi Bet-Aveŋ.

⁶Israyeleye, a puraka na, ɓi mutuwaˀ a ndilo taŋ le, asi mizli taŋ ngasl ngasl haɗa. Vurˀe, Israyel ara ɗumom ar butumoy, ar vigiɗey, ar wala muwãhay, ar butumoy a ruwuy waɗ ar heleleŋhey.

⁷Mekelemey a wuzla taŋ, hã a tuwuɗam mizaw Zurdeŋ ɓa ara ɗumom angi hirwuy Gad ati Galaˀat. Tapas nah na, Sawul aro a Gilgal ɗagay. Mizli ngi cikeˀeheye gar ara jijaham ti zluwun.

⁸Sawul a kutuk hã hin tarnaˀ, asi Samuyel a waŋ haŋ le zleˀe, amma Samuyel tuwa, a ndilo a Gilgala ta. Joˀ sukwi ngi Israyel a zlaka a wuyaham, a pulaka Sawulo ɗoɗok pal naŋ.

⁹Dar Sawul a ɓi ɓa a gi mikuli da Buymisemuŋ, mikuli mizlam zlam wãˀ waɗ mikuli ngi vula zuy. Joˀ a ga mikuli mizlam zlam wãˀa.

¹⁰Kasl ti naŋ mira kiɗa mi ngi gi mikuli tuwa na, Samuyel a ndilawa. Sawul a bo nga ji di hirnga ɓa a jaŋ haŋ.

¹¹Samuyel a ɓaŋ: «Ki gi di i mi nah ka?» Sawul a ɓi: «Yi pura na, mizli ara waham le, ara pilikiy ɗoɗok, yo ka miwiy haŋ tuwa, k'anta so ta. Yo ma na, Filistihey a kusom le a Mikmasa.

¹²Dar yi ɓi a kwacay ɗu: Ani wurenna Filistihey a sa soko jikiy a Gilgala, manja ya mitisla mevel ngi Buymisemuŋ. Vurˀe, yi zuɓa zayɓi ngi ga mikuli da Buymisemuŋ, mikuli mizlam zlam wãˀa.»

¹³Akẽh na, Samuyel a ɓa Sawul tuwa: «Ki mibihirnga kwa? Ɓimuɗuva ngi Bumbulvuŋ Buymisemuŋ, ɗik, misi naŋ mutuhuw di na, ki ja a hirnga ta. Na, Buymisemuŋ a wuɗ le zleˀe, anja zumabuy ɗik a sa ndir caˀa.

¹⁴Amma wurenna, zumabuy ɗik anta sa zik mata. Buymisemuŋ a wini mbur ngisi mevele le, yo a cifa le i buy ngi sukwi naŋhay, asi ɓi Buymisemuŋ muɓuw di na, ki ja a hirnga ta.»

¹⁵Samuyel a pula Gilgala, aru nga Gibeya, hirwuy Benjameŋ. Joˀ Sawul a mahiri ngi slufa sojehey misi avaˀahaya: taŋ a gam gwat ngi skat skat merkeɗe.

¹⁶Sawul ati mangal naŋ Zonataŋ waɗ mizli mindiram avu taŋ akẽh, a cifam a Gilgal, hirwuy Benjameŋ, amma Filistiheye, taŋ a pam sar a Mikmas.

¹⁷Ngi pas mekelem ada na, mizli mingizla vuhoy a boko ti wuzla soje Filistiheye, ngaɓa taŋ taˀa. Ngay taŋ mitaˀ nah tuwa, a wunuk a wuzla taˀtaˀ makir. Ngaɓa mudumbuŋ aru kini ngir ti Ofra, angi hirwuy Suwal.

¹⁸Mucuw naŋ kini ngir ti Bet-Horoŋ, yo mimakir naŋ kini ngir ti maakway miɗingir misi a hirnga sozo ngi motokoyohoy, kini nga wuzlaɓuh mikirɗak kirɗaka.

¹⁹Ti di nah na, gudi ko pal anta asi ruwuy Israyele ta, asi Filistihey a ɓam na: «Anja Heberey a vuɗam maslalamay ati ziwiteye ta.»

²⁰Vurˀe, Israyeleye, da mbur gar a wuɗ ɗiya mi ngi gam ngi sla naŋ le, gam naŋ, zlimbe naŋ waɗ milngama na, sey aru ng'avu mbur gudi Filisti.

²¹Ɗiya mi ngi gam ngi slahay, ɓiri ngi li lihey, ngi ɓiri muwurkakka, ngi zlimbe malla lumbuɗa ɓiri miyoŋ avu ganday ngi ɓula gwat misãmi [1] gar na, suloy purla muwuɗka le a wuzla makir na, mbur a wurka cuw naŋ ngi ɗiya mi ngi gwat naŋ.

²²Vurˀe, tapas vurumo so na, soje ngi Sawuloy ati ngi Zonataŋhaya, taŋ manja maslalamay ati ziwitey. Sey avu Sawul waɗ avu mangal naŋ Zonataŋ tewle.

²³Soje Filistehey cah a bam, ara kutukuko jiviɗ ngi Mikmasa.