Read South Giziga 1SA 14 Bible Online

1SA 14 - South Giziga bible

1SA 14

¹Ngi hin mekelem ada na, Zonataŋ, mangal ngi Sawul a ɓa gawla naŋ majijiraŋ gwat ngi vurum naŋhaya na: «Sawa, akum ng'avu soje Filistehey mipam sar kip tir vay diga na.» Amma a ɓa ɓi nah da cine naŋ Sawulo ɗaˀ le ta.

²Sawul a cifi le ar maakway ngi hirwuy Gibeya, asi virzi ngi widis grenade [2] a ruwuy Migroŋ. Naŋ ti sojehey aseˀe skat skat merkeɗe.

³Migi mikuli mideŋ tapasa ti zana ngi gi mezegwel a mbuŋ Bumbulvuŋ na i Ahiya, mangal ngi Ahitup, yo i sukum ngi Ikabot, sukum naŋ ngi jamba. Ikabot i mangal ngi Pinhas, yo dideˀ ngi Eli, masay da Buymisemuŋ zleˀe a Silo. Zonataŋ aru le na, mizli a si na ka ta

⁴Ɓa nga luuma li soje Filistihey mipam sar a diga na, sey Zonataŋ a cuh tir wala ngi gidigil muwãhay ada yoŋ yoŋ cuw tika tika, a zilaka mekeleme Boses, yo numuŋ Senne.

⁵Gidigil muwã mudumbuŋ yoŋ kini ng'ar vay muŋ, hiri dac ng'ar Mikmas, yo mucuw naŋ yoŋ naŋ kini ng'ar vay ngi ruwuy hiri dac ng'ar Geba.

⁶Zonataŋ a ɓa gawla naŋ majijiraŋ gwat ngi vurumoyo, sawa akum sesẽŋ ng'avu Filistihey, manja ci mizaw tayna. Asinta Buymisemuŋ a sa jina ndra kwani. Naŋ kine, ko da ndra haɗa malla haɗa ta gar na, da Buymisemuŋ a ɓi le ɓa a jina ndra, i lumam bugawla na, ko gwat matikaŋ anta.

⁷Gawla naŋ a ɓaŋ: «Gakaɓa ka hĩhĩy le gar. Akum! Yo yi ra supuw kaɓa ka hĩhĩy le gar.»

⁸Zonataŋ a ɓi: «Wurenna, a kum hiri taˀ ng'ar taŋ, ɓa i ra bigaka vu ndra avu taŋ.

⁹Da ara ɓam ndra: Cicam! Sey i ram ng'avu kum ɗagay› na, ndr'i sa cicam dedeŋ ar li ndra, yo ndr'anta sa ram ng'avu taŋ ta.

¹⁰Amma da a sa ɓam le: Soko ng'avu ndra› na, i sa ram ɓula. Nah na, kite Buymisemuŋ a vula taŋ le asi haŋ ndra si. Gwat masa biga ndra di i nah.»

¹¹Joˀ Zonataŋ ati gawla naŋ a bigaka vu da soje Filistiheye ar li pi sar taŋ. Filistihey a ɓam: «Puraka Heberey maboko tir vigiɗey, taŋ muɗumom zleˀe tuwa ɗi.»

¹²Joˀ a ɓaka Zonataŋ ati gawla naŋ tuwa: «Jiɗoko ng'avu ndra aka, i wuɗam ɓa i ɓukum ɓi anihĩ.» Zonataŋ a ɓa gawla naŋ: «Jiɗawa a dirba ɗu. Buymisemuŋ a vula taŋ le asi haŋ ngi Israyeleye.»

¹³Zonataŋ ara jiɗ ti haŋ, yo ti sar ma gar, waɗ gawla naŋ tuwa ɓaˀ a dirba. Filistihey ara ndilam ɓaˀ ɓaˀ a mbuŋ Zonataŋ ti kiɗ naŋ makiɗa taŋ, yo gawla naŋ na kwana, ara kiɗa mi taŋ wãˀ wãˀ cici ti dirba naŋ.

¹⁴Kiɗ mudumbuŋ, Zonataŋ ati gawla naŋ mikiɗaka taŋ nah na, a kiɗam mizli mizilehey kukur cuw ar li njuk kini.

¹⁵Filistihey mindiram ar li pi sar taŋ, yo mizli ngir purok mugun hirnga taŋhay, yo waɗ mizli gar na, ara zluwunam. Jum ngi soje Filistehey misi ar li taŋ ati ngay ngi mingizla vuhoy gar na, zluwun ara ga taŋ haɗa ya. Yo ma na, hirwuy a zla ara wus, hana i zluwun madiɗa Bumbulvuŋ mugo di ar wala taŋ.

¹⁶Mizli ngi Sawuloy mijiɗa lihey ara puram hiri, keɗ na, zigiduw a zliɗ hirnga, ara kil tika tika.

¹⁷Sawul a ɓa mizli misi avaˀahaya, «zilaka slimiɗeye, yo puraka, muru tivi ndra tika nga diga i waka na.» A zilaka slimiɗeye na, Zonataŋ ati gawla naŋ taŋ anta.

¹⁸Sawul a ɓa Ahiya, masay da Buymisemuŋ: «Kiroho akoti ngi Buymisemuŋ ng'aka ɓa ki cufuɗa Bumbulvuŋ.» Asi mike, ar hin nah na, akoti ngi Buymisemuŋ naŋ da a wuzla Israyeleye.

¹⁹Hirak ti Sawul mira ɓam ati masay vuna na, ara cinam gwatay mahurumom ti gidaŋ ngom ngom ar li pi sar ngi Filistiheye. Sawul a ɓa masay: «Ki cufuɗa Bumbulvuŋ mata.»

²⁰Sawul a kuso mizli ngi vaˀahaya gar, ara ndilam ar li kiɗa vu. A ra lumam na i mesene taŋhay makiɗam vu ar wala taŋ, a gam ngom ngom lambaˀ manja sli wala.

²¹Heberey mizlizle angi slra ngi Filistihey ati mekelemey musoko ati Filistihey ng'ar li pi sar taŋ, taŋ tuwa jom gar taŋ, a jumom tir vay Israyel ng'avu Sawul ati Zonataŋ.

²²Mizli Israyeley gar muɗumom zleˀe a muwã Efrayim na, a cinaka Filistihey a kilam le. Taŋ kwana a zlaka sipi taŋ, ara kiɗaka taŋ.

²³Naŋ kine, ar hin nah na, Buymisemuŋ a vula luuma bugawla le da Israyele. Kiɗavu a ndih sesẽŋ tuwaɗ Bet-Aveŋ.

²⁴Ti hin nah na, Israyeley a sam bonoy le, asi Sawul a ɗuva taŋ ɓi ngi nis ani: «Da pastaˀ a gi t'aruŋ, yo yi pula cuwal ɗu ar mesene ɗuwoy na t'aruŋ, da mbur muzum ɗaf le na, a ndir i minisaŋ.» Vurˀe, a wuzla mizli, ko mbur mititil ɗaf neˀ anta.

²⁵Mizli gar a cam ng'asi dum a ɓuh. Adiga, mam ada a ruwuyo.

²⁶Mizli micam ng'asi dum a ɓuh tuwa na, keɗ na, mam ara ɓul a ruwuyo. Amma ko mbur loŋ maru ti haŋ ng'avu mi anta, asi mizli gar ara zluwunam vur hudum tuwa.

²⁷Amma, Zonataŋ, cine muɗuva ɓi ngi hudum nah da mizli na, dambalaka a cine ta. Ganday mikaw a haŋ naŋ tuwa, a tila til waɗ njof ar mam tuwa dar aru ti haŋ nga mi, a titila: ar nah na, hiri a wun kweleŋ.

²⁸Mbur pal a wuzla sojeheye, a ɓaŋ: Bunuk a ɗuv ɓi ngi hudum madiɗa le da mizli, a ɓi: «Mbur muzum ɗaf le dana na, i minisa le. Vurˀe, mizli gar gidaŋ taŋ a tikile.»

²⁹Zonataŋ a ɓi: «Baha a so ti bonoy le asi ruwuyo. Puraka ɗi, zle ti ya mi titila mam titileˀ neˀ na, gidaŋ a so le avu vu takwa!

³⁰Dana gwat ndra masa lumaka avu mesene ndrahay na, da ani mizli ra zumam i nah na, anja wurenna i ra ɓulaka Filistiheye fineˀ naŋ ta jak kwa?

³¹Angi hin nah na, a kiɗaka Filistiheye, zle a Mikmas hã sesẽŋ a Ayaloŋ. Mizli, gidaŋ taŋ a tiki le wãˀ.

³²A cam vu kpis avu gwat mitiɓa ar vurumoyo. A jam gwat misãmi meciɗekey, slahay, ziri slahay, a slakaˀay taŋhaya daˀ a ruwuyo, a humbuɗaka ar li pumbus maɓul vuna si.»

³³Mizli ara ɓaka ɓi nah da Sawulo: «Mizli ara gam gwat malambaˀ avu Buymisemuŋ ti humbuɗa gwatay daˀ ar pumbus maɓul vuna si.» Sawul a ɓi ti gidaŋ: «Kum anta teŋteŋ ta. Gidigiloko ɗugur madiɗa ng'avi ya aka, wureˀ wurenna.»

³⁴«Waham ng'avu mizli, ɓaka taŋ na: anja mbur gar na, a siy ti sla naŋ purla malla tumuŋ naŋ purla. Ki sa slaka ˀay taŋ, yo kisa humbuɗaka taŋ aka. Kanah na, kum anta sa gam mungra avu Buymisemuŋ ti humbuɗa useˀ daˀ ar pumbus na ta.» Ngi duvuɗ nah na, mbur gar a so ti sla naŋ, a sla ˀay naŋ ar li nah tuwaŋ.

³⁵naŋ kanah, Sawul miɗiya li gi mikuli da Buymisemuŋ. Nah na i li gi mikuli mudumbuŋ naŋ, naŋ miɗiyaŋ di.

³⁶Sawul a ɓi: «Akum ti duvuɗ hana, supukum Filistiheye. I sa tiɓaka gwat taŋhaya hã li a wun, yo ko ndr'anta sa pulam mbur loŋ a lih ta.» Sojehey a mbiɗakaŋ di: «Gwat ka mapura kuy gar na, gaŋ.» Masay a ɓi: «Sey i cufuɗaka Buymisemuŋ ɗagay.»

³⁷Dar Sawul a cufuɗa Bumbulvuŋ so: «Zliv i ra sipa Filistihey na kwa?» Ki sa vula taŋ asi haŋ ngi Israyeleye kwa? Amma ar hin nah na, Bumbulvuŋ a mbiɗaŋ di ta.

³⁸Akẽh na, Sawul a zilo buy ngi mizli gar ng'avaŋ, a ɓa taŋ: «Migi mungra wa dana aka na, puraka ɓi nah kuy kuy.

³⁹Yi hudum ti Buymisemuŋ, misi ti siifa, Milaha vu ngi Israyeleye, sey mbur miga mungra na, a mucu, ko da i mangal ɗu Zonataŋ.» A wuzla mizli gar, ko mbur mimbiɗaŋ di anta.

⁴⁰Dar Sawul a ɓa Israyeleye gar: «Kumo, cicam baˀ pal kum tir vay pal, yo ndra ati mangal ɗu Zonataŋ tir vay pala ya.» Mizli a ɓaka Sawulo: «Gwat ka mapura kuy na, gaŋ.»

⁴¹Joˀ Sawul a tumbulo Buymisemuŋ: «Bumbulvuŋ ngi Israyel, k'anta ki ziliy mi dana ta vur mike? Ɓi nah a diɗ ar Sawul ati Zonataŋ, amma mizli taŋ anta ar ɓi nah ta.»

⁴²Sawul a ɓa mizli: «Gam ceregezleŋ ar ya ati mangal ɗu Zonataŋ.» Ceregezleŋ a diɗ ar Zonataŋ.

⁴³Akẽh na, Sawul a ɓa Zonataŋ: «Slufiy ɓi ngi gwat ka miga na.» Zonataŋ a slufaŋ di, a ɓaŋ: «Naŋ kanah, yi titil mam le ti mi ngi ganday misi asi haŋ ɗu na. Y'ani, i juw vu le ngi muco.»

⁴⁴Sawul a ɓi: «Da ki muc ta na, anja Bumbulvuŋ a kutiy ti bonoy mukuyta wãˀ. Zonataŋ, ki muc gbaˀ cummo ɓula.»

⁴⁵Mizli a ɓaka Sawulo: «Zonataŋ, naŋ miga ɓa Israyel gar a lum bugawla na, a mucu? A gi ta wãˀ. Tisi Buymisemuŋ misi ti siifa na, ndr'anta pulaka jiviɗ nah ɓa ko ngwic hirnga naŋ purla a diɗ ta, gwat naŋ miga ngadana na, a ga ti jini ngi Bumbulvuŋ!» Naŋ kahana, mizli milahaka Zonataŋ ɓa a muc ta na.

⁴⁶Sawul a pula sipa Filistiheye, joˀ Filistihey a mam ng'ar hirwuy taŋ a muŋ.

⁴⁷Ti Sawul micifi buy madiɗa kulaˀ sina, a gi vurum ti mesene naŋhay mugun ngi vaˀahay na: i Moˀapay, Amoŋhoy, Edomoy, buy ngi Sobahay ati buy ngi Filistihey. Naŋ muɗuv sar le taˀ gar na, ara lum bugawla.

⁴⁸A biga gambara naŋ ti naŋ mikiɗa Amalekey, yo ti naŋ milaha Israyeley tisi haŋ ngi mbur matiɓaka gwat taŋhay na.

⁴⁹Zir ngi Sawuloy i ti: Zonataŋ, Isevi waɗ Malkisiwa. Yo waɗ ziri mongosohoy ada ma, i ti: Merap, zuŋ hiri madiɗaŋ ati Mikal, mijingaˀ naŋ.

⁵⁰A zilaka ngwas ngi Sawulo Ahinoˀam, yo i zuŋ ngi Ahimaˀas. Madiɗa ngi soje naŋhay, a zilaka Abner, Abner i mangal ngi Ner, jamba ngi Sawul.

⁵¹Asi mike na, Kis cine ngi Sawul, yo Ner cine ngi Abnere, i ziri ngi Abiyelek.

⁵²Sawulo, angi hin ngi zumabuy naŋ gar na, a gi vurum mutuwaˀ le ti Filistiheye. Vurˀe, naŋ mupur mbur gambara le keɗ si na, a zuɓaŋ paɗ le nga wuzla soje naŋhaya.