Read South Giziga 1SA 15 Bible Online

1SA 15 - South Giziga bible

1SA 15

¹Samuyel a ɓa Sawulo: «Buymisemuŋ a slin di i ya ngi puw mal a hirnga, ɓa ki cifi ki buy ngi Israyel, mizli naŋhaya. Wurenna, mingiɓi ngi Buymisemuŋ, ya mara ɓuw di ani na, cine so:

²Naŋ kine, Buymisemuŋ misi gidaŋ wãˀ, a ɓi anihĩ: Israyeleye, ti di taŋ muboko ti Ezipte, gwat Amalekey migaka taŋ di, taŋ mitikaka jiviɗ a mbuŋ taŋ na, y'anta pula ɓi nah teˀ ta, sey i kutataŋ.

³Wurenna so na, ara kiɗa Amalekeye vagay vagay. Gwatay taŋ misi ti taŋ gar na, ki ngizla taŋ, ko ki ra pul ta. Ziley, ngwasay, ziri memeɗehey ati ziri ngi mi ɗuwahay, slahay ati tumuŋhoy, zlogomohoy ati zunguhoy gar na, ki kiɗa taŋ vagay vagay.

⁴Sawul a kuso mizli gar a Telem, a slufa taŋ. Soje misi saraya, taŋ durmuk skat skat cuw. Yo ngi Zudahaya, mizli durmuk kuruˀ.

⁵Sawul mindil ti taŋ gweˀ avu walahay Amalek na, a wam vu weˀ angi zlazlar mubo tir futuŋ.

⁶Sawul a ɓa mizli Keniteye: «Bam, kiraham, pulaka Amalekeye pal taŋ, vur ya masa gukum gwat ya masa gaŋ di na ya. Asi mike na, ti di Israyeley muboko ti Ezipte na, ki ga taŋ mezle le gar taŋ.» Dar Kenitey a bam, a kiraham ti wuzla Amalekeye.

⁷Akẽh na, Sawul a kiɗa Amalekeye, zle a Havila, sesẽŋ a Sur, tisi pas ngi miprik ngi ruwuy Ezipte.

⁸Agak, buy Amaleke, a jakaŋ naŋ ti ji, a kiɗa ta, amma a ngizlaka mizli gar ti maslalam.

⁹Sawul ati soje naŋhay a pulaka Agak manja kiɗ vagay, yo mimezle ngi wuzla gineweye, kaɓa slahay ati tumuŋhoy, gwat misãmi muzlumburahay ati tumuŋ madiyahay. Na zle, gwat misãmi mupuɗaw puɗuway gar si. A ngizl di i misi puɗaw puɗaway ta, yo misi ngi pula giray ta.

¹⁰Akẽh na, Buymisemuŋ a ɓa Samuyel anihĩ:

¹¹«Ya miga ɓa Sawul a cifi i buy na, yi ra likaŋ, asi a mbiɗi duba le avu ya, yo mingiɓi ɗu ya muɗuvaŋ di na, a ja a hirnga ta.» A ga Samuyele welele teˀ, a tumbulo Buymisemuŋ ngi duvuɗo, hã li daŋ daŋ.

¹²Ngi miprik prik ngi li naŋ muwun na, Samuyel a ɓi ɓa ara ji hirnga ti Sawulo. Mizli a soko ɓaka Samuyele: «Sawulo mindilo ndil a Karmel si na, a ngi ɗugur kaˀ ɓa ngi wulka ɓi tumbuŋ ava, yo akẽh, a zuɓa jiviɗ, aru nga Gilgal.»

¹³Samuyel aru ng'avu Sawulo, joˀ Sawul a ɓaŋ: «Anja Buymisemuŋ a ɗuwuluw mi. Ɓi Buymisemuŋ muɗuviy di gar na, yi ga le ka nah.»

¹⁴Samuyel a cufuɗaŋ: «Tumuŋhoy ati slahay, ya macina tuwuy taŋ tayna, a soko ti damaka?»

¹⁵Sawul a ɓaŋ: «A soko taŋ ti hay Amalekey. Tumuŋ mimezlehey ati sla mimezleheye, sojehey a pulaka tayna ngi gi taŋ mikuli da Buymisemuŋ. Amma mindiramaya, i ngizlaka taŋ le kap kap.»

¹⁶Samuyel a ɓa Sawulo: «Muk muduba. Ɓi Buymisemuŋ miɓiy di ngi duvuɗ nga dana, y'ani ɓuw di.» Sawul a ɓa Samuyele: «Ka ɓi.»

¹⁷Samuyel a ɓaŋ: «Da ko ki pura hirnga ɗike puɗaw ta zleˀe kwana, wurenna Buymisemuŋ a wunuw le, ki buy ngi Israyel ta ya kwa? I Buymisemuŋ mucufuw ki buy a hirnga Israyele!

¹⁸Buymisemuŋ a slinuw, a ɗuvuw ɓi ani: ‹a ra ngizla Amalekey, migi mungra tayna, ki ra kiɗa taŋ hã ki ngizla taŋ kap kap wãˀa.›

¹⁹Na, ki cine mi ngi Buymisemuŋ ta vur mike? Ki ci vu kpis ngi hila gwatay ar vurumo, yo ki gi gwat malambaˀ a mihiri ngi Buymisemuŋ vur mike?»

²⁰Sawul a ɓa Samuyele: «I cine mi da Buymisemuŋ le. Yi ru le ga gwat Buymisemuŋ miɓiy di kasl kasl ar li naŋ misliniy nga diga. Agak, buy Amaleke, yi jo naŋ ti ji kine, amma Amalekeye, taŋ yi ngizla taŋ le kap kap.

²¹Amma ginew mimezle ngi kiɗ tahay, tumuŋhoy ati slahay na, sojehey a hiloko taŋ ngi gi mikuli da Bumbulvuŋ Buymisemuŋ, ɗike, a Gilgal.»

²²Akẽh na, Samuyel a ɓaŋ: «Buymisemuŋ a wuɗ di i mikulihey mizlam zlam waɗ mikuli mekelem, mbak cinaŋ mi le jak kwa? Kanah ta, cine mi a funa mikulihey magakaŋ taŋ ti mal ngi tumuŋhoyo le.

²³Asi mike na, slikiɗa ɓi na, i malambaˀ kaɓa sipi ɓi ngi daˀasay, yo cin ta kwana, i malambaˀ kaɓa huruk huruk avu kulihey. Ka mihiziga Buymisemuŋ avra na, naŋ kwana a hiziguw le avra ya, yo k'anta ki buy ngi Israyel mata.»

²⁴Dar Sawul a ɓa Samuyele: «Yi gi mungra le, yi ngila ɓi ngi Buymisemuŋ le, yo waɗ ɓi ɗike. Asi mike na, yi zluwun di i sojehey, joˀ yi cin mi taŋ.

²⁵Wurenna, ambuh, mungra ɗu na, pula ɓi nah, yo sawa ɓa i ram bummoˀ, i ra huruk hurukam a mbuŋ Buymisemuŋ.»

²⁶Samuyel a mbiɗa da Sawulo: «Y'anta ru asi ka ta, asi ki hiziga mingiɓi ngi Buymisemuŋ le, yo Buymisemuŋ kwana, a hizuguw le avra aya, vurˀe k'anta ki buy ngi Israyel mata.

²⁷Ti Samuyel mambiɗi duba ɓa aru na, Sawul a jaŋ avu mi ngi zana naŋ waɗ digwaɗ.

²⁸Samuyel a ɓaŋ: «Buymisemuŋ a duguɗa zuma buyo le dana avu ka dugwaɗ, a vula le da mbur mimezle fineˀ ka.

²⁹Yo ma na, Buymisemuŋ, dudok ngi Israyele, naŋ anta gi slir ta, yo naŋ anta mbiɗa wuluko kaɓa mbur ta.»

³⁰Sawul a ɓaŋ: «Kay, i gi mungra le. Wurenna, ambuh ta kwa, gi ti ya yi mbur mupuɗaw a mihiri ngi mizli micawwahay ati Israyeleye. Mawa, i ram bummoˀ, i ra huruk huruk a mbuŋ Bumbulvuŋ Buymisemuŋ, ɗike.»

³¹Samuyel a kisa Sawulo, joˀ Sawul a huruk huruk a mbuŋ Buymisemuŋ.

³²A dirba nah, Samuyel a ɓi ɓa a sakaŋ ti Agak, buy Amaleke, Agak a so ng'avu Samuyele ti cine ndum. A ra ɓi ti kwacay naŋ: «Ko mbri na, y'anta lika ɓi ngi muco mata.»

³³Amma, Samuyel a ɓaŋ: kaɓa ka mupula ngwasay ɗoɗok ɗoɗok manja ziriy ti maslalam ɗik na, naŋ kine, munuk a sa ndir ɗoɗok, manja mangal a wuzla ngwasay aya. Joˀ Samuyel a kiɗa Agak a mbuŋ Buymisemuŋ a Gilgala.

³⁴Samuyel aru ngi hay naŋ a Rama, yo Sawulo kwana a mi ngi hay naŋ a Gibeya.

³⁵Ko Samuyel a pura Sawulo keɗ le mata, hã gbaˀ avu muc naŋ. Samuyel a tuwa Sawulo haɗa asi Buymisemuŋ, naŋ miwina Sawul ɓa a cifi buy ngi Israyele, naŋ vuna a lika le.