Read South Giziga 1SA 16 Bible Online

1SA 16 - South Giziga bible

1SA 16

¹Akẽh na, Buymisemuŋ a ɓa Samuyele na, «kisa kiɗa mi ngi lika Sawulo hã ti vunaka? Mihiziga avra na i ya vuna, yo naŋ anta i buy ngi Israyel mata. Naha durum ɗike ti mal ngi pi a hirnga, a ru. I slinuw ngi hay Zese a Betelyem, asi a wuzla ziri naŋhay na, yi wini mbur ngisi mevel ɗu le.»

²Samuyel a cufuɗa Buymisemuŋ: «I sa ru nga diga gu mbri mbrike? Da Sawul a cine le na, a sa kiɗikiy vagay.» Buymisemuŋ a ɓaŋ: «Ji zuŋ sla, ki ru di a haŋ. Ki sa ɓi na, yi so gi mikuli da Buymisemuŋ.

³Ki sa zila Zese ng'ar mezegwel ngi mikuli vuna ya. I ya vuna masa buguw gwat ka masa ga. Mbur ya masa buguw di na, kisa paŋ mal ngi vula slra.

⁴Samuyele, gwat Buymisemuŋ miɓaŋ di na, a ga kanah. Naŋ mindil a Betelyeme na, mizli micawwa ngir walahay a soko ng'ava ti zluwun, a cufuɗakaŋ: «Ki so ar jam aya?»

⁵Samuyel a mbiɗa taŋ di: «Hĩ i so gi mikuli da Buymisemuŋ. Bunaka vu kumoy ng'ar mezegwele, soko a kum bummoˀ nga gi mikuli.»

⁶Mizli, ti taŋ mira ndilam na, Samuyel mupura Eliyap keɗ na, a ɓi ti kwacay naŋ: «Ko mbri na, ngi diga na, i mbur Buymisemuŋ muwunaŋ na.»

⁷Amma Buymisemuŋ a ɓa Samuyele na: «Ki pur di i mihiri naŋ ati gil naŋ ta, asi yi wini di i naŋ ta. Y'anta pura gwata kaɓa ngi mizli mapuraka ta. Mizli a puram di i gwat misi hiri taŋ mapuraŋ, amma ya, yi pur hã sesẽŋ a hur mevel.»

⁸Akẽh na, Zese a zila Abinadap, a ɓaŋ ɓa a cuh a mbuŋ Samuyele. Samuyel a ɓi: «Mbur hana kwana, Buymisemuŋ a wini di i naŋ ta ma.»

⁹Zese a ɓi ɓa Samma a cuh, amma Samuyel a ɓi ma: «Kay, Buymisemuŋ a wini di i mbur hana ta.»

¹⁰Zese a cuh ti ziri naŋhay tarnaˀa mbuŋ Samuyele, amma Samuyel a ɓaŋ: «Ko Buymisemuŋ a wini mbur purla a wuzla taŋ ta.»

¹¹Akẽh na, Samuyel a ɓa Zese: «Zir ɗikey vuna wãˀ i hanayna si kwa?» Zese a mbiɗaŋ di: «Tuboˀ t'ada, aro jigina tumuŋhoy.» Samuyel a ɓa Zese, «Slin ara supoko di. Da a ndilo aka turuŋ na, ndr'anta zlaka zuma ɗaf ngi mikuli ta.»

¹²Zese a slin ara ziloko di, a ndilawa. Davite naŋ gagaza, naŋ kuy, yo mihiri naŋ a bun le. Dar Buymisemuŋ a ɓa Samuyele: «Hana i naŋ so, slikiɗ, paŋ mal ngi vula slra, ɓa a cifi i buy.»

¹³Akẽh na, Samuyel a zuɓa durum ngi mala, a paŋ mala a wuzla sukum naŋhaya. Zle tapasa, ˀUf ngi Buymisemuŋ a so angi Davite, naŋ da angi naŋ. Joˀ Samuyel a zuɓa jiviɗ a mi nga Rama.

¹⁴ˀUf ngi Buymisemuŋ a bi le tivi Sawulo si, joˀ Buymisemuŋ a slino musuwun malambaˀ, a so kicuwuraŋ hirnga.

¹⁵Sawulo, gawla naŋhay a ɓakaŋ na: «Ani, musuwun malambaˀ muso ti vu Bumbulvuŋ, ara kicuwuruw hirnga.

¹⁶Buy ndra, anja ki ɓi ɗaˀ ti haŋ ɗike. Gawla ɗikeye, taŋ na hĩˀĩ vur ka: a sa supoko mbur misina kiɗa gujuvur. Kanah na, da musuwun malambaˀ, Bumbulvuŋ mislino di na misa hizigiɗuw le na, mbur mikiɗa gujuvur tuwa, a kiɗa gujuvuro, dar kisa lum zuwene.»

¹⁷Sawul a tiɓa le, dar a ɓi: «A ram sipikiy mbur misina kiɗa gujuvuro so, sikiy di.»

¹⁸Mbur pal a wuzla gawla naŋhay a mbiɗaŋ di: «Kaslslakanah gisiŋ, yi sin mbur le, i mangal ngi Zese a beteleyem. A si na kiɗa gujuvuro le kuy kuy. I gambara, yo i soje ma, a ɓa ɓi ti wer, yo i mbur mukuy. Yo Buymisemuŋ naŋ da ti naŋ.»

¹⁹Sawul a slin mizli ng'avu Zese ɓa a ɓakaŋ: «Sliniy ti mangal ɗik Davit, majigina tumuŋhoy na.»

²⁰Zese a joˀ zungu, a juw gwatay araŋ: ɗaf, kwenekwene ngi mbaazla waɗ ˀaw minjaslsla. A vula taŋ da Davite ɓa aru di da Sawulo.

²¹Davite mindil ndil a hay Sawulo na, a ci ar slra naŋ. Sawul a wuɗaŋ haɗa, hã Davit a tiri gawla naŋ ngi jijiraŋ gwat ngi vurumoy.

²²Sawul a slin ng'avu Zese, ara ɓakaŋ: «Anja mbak Davite angi slra ɗu, vur a ciriy hiri haɗa.»

²³Naŋ kanah, da musuwun malambaˀ tuwa mihizigiɗa Sawulo le gar na, Davit a zuɓa gujuvuro, a kiɗa. Dar Sawul a cin zuwen, a tislaŋ, joˀ musuwun malambaˀ a pulaŋ.