Read South Giziga 1SA 18 Bible Online

1SA 18 - South Giziga bible

1SA 18

¹Davite mikiɗa mingiɓi ɓi ati Sawulo si na, Zonataŋ, mangal ngi Sawul a slurup ti Davite slirap, a wuɗaŋ kaɓa naŋ mawuɗ vu naŋ vuna.

²Ti nah na, Sawul a tika Davite tak avu naŋ, a pulaŋ ɓa a mi ngi hay cine naŋ mata.

³Dar Zonataŋ a jumˀay ati Davite, asi ara wuɗaŋ haɗa kaɓa naŋ mawuɗ vu naŋ vuna.

⁴Zonataŋ a cuko godo naŋ, naŋ maka avu vu, a vula da Davite, waɗ zana naŋ ngi sojeheye, yo ko maslalam naŋ ati lek naŋ waɗ kanda ngi duba naŋ tekeɗe kwana, a vulaŋ taŋ.

⁵Davite, ko Sawul mislinaŋ le ng'ar vurum ar li gar na, ara bo ti jiŋ. Vurˀe, Sawul a cifaŋ i madiɗa ngi vurum taˀa. Mizli gar ara hĩyãkaŋ, yo ko gawla ngi Sawuloy kwana, kanah ya.

⁶A dirba Davit mikiɗa Goliyat, mbur Filisti tapas soje ngi Israyeley mira mam le ngi hay na, ngwasay ar walahay Israyele, ko amaka gar na, a boko nga ji hirnga ti Sawulo, ti zli dimis, ti ɓuruk asi gangaŋ ati gwat ngi kiɗ mekelemey wal wal haɗa, yo a jam salalay ngi mumul.

⁷Ngwasay a tiɓaka dimise ti singir ar wala taŋ ti ɓi aseˀeŋ: «Sawulo, a kiɗ asi mesene naŋhaya durmuk. Davite, a kiɗ nga naŋ durmuk kukur mbeˀmbeˀe.»

⁸Sawul a ji mevel haɗa teˀe. A cin ndum ti dimis nah na ta. Joˀ a ɓi: «Durmuk kukur mbeˀmbeˀe, a vulaka da Davit, da ya jak na durmuk purla. Gwat mindiraŋŋa sey zumabuy tewle si ta kwa!»

⁹Zle tapasa, Sawul anta pura Davite avu hiri kuy mata.

¹⁰Put ngi li naŋ muwun na, musuwun malambaˀ Bumbulvuŋ mislino di tuwa, a diɗo kpis angi Sawulo, a ɓi lambaˀ lambaˀ a hay naŋ. Davit ara kiɗa gujuvuro kaɓa hõyyõ zleˀe tuwa ma. Dambalaka Sawul a ro ti ziwit naŋ kaw a haŋ.

¹¹Joˀ a ɓi a kwacay naŋ: «Sey i cika Davite dar avu moholo.» Waɗ a cika ziwite ng'ar Davite sar cuw, amma Davit ara lih, ara lih.

¹²Sawul a zluwun ti Davite, asi Buymisemuŋ naŋ da ti Davite, amma a pulaŋ naŋ le.

¹³Vurˀe, Sawul a kiraha Davite baɗ a cikeˀe, a caŋ i madiɗa a hirnga sojehey durmuku. Davite, i naŋ maka mbuŋ da mizli angi vurumo.

¹⁴Naŋ mibi le ng'ar vurumo gar na, naŋ ti jiŋ, yo Buymisemuŋ naŋ da ti naŋ.

¹⁵Sawulo mupura Davite mabo ti jiŋ kanah tuwa na, a zluwun di.

¹⁶Amma Israyeley ati Zudahay gar na, a wuɗam Davite, asi maka taŋ mbuŋ angi vurumo i naŋ.

¹⁷Sawul a ɓi a kwacay naŋ: «Y'anta zuɓa haŋ ngi kiɗa Davite ta, amma anja i Filistihey masa gaka slra nah.» Vurˀe, Sawul a ɓa Davite: «Merap, zuŋ ɗu modogom ani. I sa vuluw di, ki zuɓaŋ. Amma na, ndir wirwir ar slra ɗu, yo ga vurum ngi Buymisemuŋ.»

¹⁸Davit a ɓa Sawulo: «Yi waka, tizer ɗu ati hay ngi baha ar hirwuy Israyele i waniy, ɓa i tiri jomo ngi buyo gu naka?»

¹⁹Hirak ti hin ɓa Sawul a vula Merap tuwa da Davite, a zuɓa na, ara vula na, da Adriyel, mbur ngi hirwuy Abel-Mehola jak ma.

²⁰Zuŋ ngi Sawul mekelem ada, i Mikal. A sinam vu le ati Davite. Mizli a faka ɓi nah da Sawulo, amma ɓi nah a gaŋ le kuy.

²¹Joˀ Sawul a ɓi a kwacay naŋ: «I sa vulaŋ di ɓa a sa tiri i gwat ngi nduwaŋ sar jak so, yo ɓa Filistihey a sa kiɗakaŋ.» Naŋ kine, Sawul a ɓa Davite na, i sar mucuw: «Ki sa tiri jomo ɗu dana.»

²²Sawul a ɗuva ɓi da gawla naŋhaya, a ɓa taŋ na: «A ra ɓaka Davite ti mi yaŋ yaŋ, ɓakaŋ na: buy ara hĩyuw haɗa, yo ndra gawla naŋhay gar, i ra wuɗukuw. Anja ki tiri jomo ngi buyo so.»

²³Gawla ngi buyoy ara ɓaka ɓi nah da Davite, joˀ Davit a ɓa taŋ: «Tiri jomo ngi buy na, ki waka kaɓa i ɓi ngi sefel kwa? Na ya i mbur misi murga, yo yi mbur lambaˀ ngataraŋ.»

²⁴Gawla ngi Sawuloy a rakaŋ ti mingiɓi ngi Davite: «A ɓakaŋ: Davit a ɓi ani kahana kahana.»

²⁵Sawul a ɓa gawla naŋhaya: «A ra ɓaka Davit ani: Zlili mavulaka ar zuɓa ngwas hana, buy anta wuɗ ta, a wuɗ nga naŋ i mbuŋ ngi Filistihey buk buk skata, ɓa ngi pula cuwal ngi mesene naŋhay.» Sawul a wuluk kanah na, ɓa Davit a ci asi haŋ ngi Filistihey.

²⁶Gawla ngi Sawuloy ara ɓaka ɓi nah da Davite kanah. Davit a hĩyã ɓi nah le ɓa a tiri jomo ngi buyo. Dumbuŋ angi buy muɗuva hin nah vuna t'aruŋ si na,

²⁷Davit ati mizli naŋhay a bam vurum. A kiɗam a wuzla Filistiheye mizli skat skat cuw. Davit a so ti mbuŋ taŋhaya, a slufaka taŋ a mbuŋ buyo, ɓa Davit a tiri jomo ngi buyo. Dar Sawul a vulaŋ zuŋ naŋ Mikal, a zuɓaŋ.

²⁸Sawul a pura, a sla wala nah le, Buymisemuŋ naŋ da ati Davite. Yo Mikal, zuŋ ngi Sawulo, ara wuɗaŋ.

²⁹Sawul a zluwun ti Davite haɗa haɗa ava ma, a tiri mesene ngi Davite wãˀ.

³⁰Angi hin tayna, buy Filistihey a bam nga gi vurum ati Israyeley. Angi taŋ mubam vurum le gar na, Davit ara cifi bugawla fineˀ gawla ngi Sawul mekelemeye gar, vurˀe, hã slimiɗ naŋ a zil haɗa.