Read South Giziga 1SA 19 Bible Online

1SA 19 - South Giziga bible

1SA 19

¹Sawul a juwa le a mevele ɓa a sa kiɗa Davite vagay, a ɓa ɓi nah da mangal naŋ Zonataŋ waɗ da gawla naŋhaya gar. Amma Zonataŋ mangal ngi Sawulo, naŋ ara wuɗ Davite haɗa.

²Zonataŋ a fa ɓi nah da Davite, a ɓaŋ: «Baha Sawul, ara wuɗ kiɗ ɗike vagay. Tiprik ti miprik na, wi vu, pur li ɓa ki ɗum ɗum araŋ.

³Ya na, yi sa bi, yi sa kisa baha ɗu ng'ar li ka masa ɗum anga na ta. I sa ɓa ɓi ɗik avu baha ɗu. Da a sa ɓi mbri gar na, yi sa ɓuw di.»

⁴Zonataŋ a ngilwuy ti Davit avu cine naŋ Sawulo, a ɓaŋ: «Ka buyo, anja ki gi mungra avu gawla ɗik Davite ta, asi a guw mungra ko neˀ ta, yo slra madiɗahay naŋ miga taŋ gar na, taŋ kuy haɗa vur ka.

⁵A vula hirnga naŋ ɓa ngi kiɗa mbur Filisti, yo Buymisemuŋ a ga Israyel a cifi bugawla madiɗa. Ki pura le, yo ki cin ndum le ta kwa! Davite migi gwat ta si na, ki wuɗ ki paŋ pumbuso, ki wuɗ kiɗ naŋ vagay ngatara vur mike?»

⁶Sawul a tiɓa mi ngi Zonataŋ le, a ɓi: «Kaɓa Buymisemuŋ misi ada ti siifa gisiŋ na, hadam! Davit anta sa muc ta.»

⁷Zonataŋ a zilo Davite, a ɓa ɓi tayna gar. Akẽh na, Zonataŋ aru ti Davite ng'avu cine naŋ Sawulo, joˀ Davit a ga slra naŋ ka misi zleˀe a muŋ.

⁸Vurum a zli le, Davit aru nga kiɗa vu ati Filistiheye. A gi kiɗa vu mukuyta wãˀ ati taŋ, joˀ Filistihey a kilam a mbuŋ naŋ mber mber.

⁹Musuwun malambaˀ, Buymisemuŋ mislino di, a so ar Sawulo. Naŋ ada a hay naŋ, ziwit kaw a haŋ, naɓa Davit ara kiɗa gujuvur naŋ tuwa.

¹⁰Sawul a wuɗ ɓa a cika Davite dar kap avu dalam ti ziwit naŋ tuwaŋ. Amma Davit a buˀ baˀ avu ziwite, a lumaŋ ta, jo ziwit ngi Sawul ara dir dar avu dalam. Davit a kil, ara ɗum ngi duvuɗ nah vuna.

¹¹Sawul a slin mijigina lihey ngi hay Davite, nga jiɗakaŋ ɓa a sa kiɗakaŋ put li naŋ muwun le. Mikal ngwas ngi Davite, a fa ɓi nah da Davite, a ɓaŋ: «Da ki laha hirnga ɗike ti duvuɗ hana ta na, a sa kiɗukuw vagay tiprike.»

¹²Mikal a pi sar ti Davite tir fenetir. Davit a kil a laha hirnga naŋ.

¹³Mikal a zuɓa kuli miciɗa ti ciɗ ngi haya, a ka ɓaˀ ar arngawo, yo a njir zana zuva mija ti ngwic ngi ˀaw a dudurumo, waɗ zana sirit ar kuli tuwaŋ.

¹⁴Sawul a slin mijigina lihey nga ji Davite. Mikal a ɓa taŋ: «Davite naŋ gu ta.»

¹⁵Sawul tuwa, a slina mijigina lihey tuwa ɓa ara puroko Davite. A ɓa taŋ: «Zuɓoko di, sikiy di ar arngawo naŋ vuna ɓa i kiɗa vagay.»

¹⁶Mijigina liheye micam kula ngi haya na, misi ar arngawo i kuli waɗ zana zuva mija ti ngwic ngi ˀaw njar a dudurumo.

¹⁷Akẽh na, Sawul a ɓa Mikala: «Ki tikiniy kahana vur mike? Ki pula mesene ɗu a sumuɗ, aru mbrike?» Mikal a ɓa Sawulo: «Miɓiy i naŋ: Puliy i ru, da kanah ta na, i kiɗuw vagay.»

¹⁸Davit musumuɗ mikil kanah tuwa na, ara ndil a hay Samuyel a Rama. Gwat, Sawul migaŋ di gar na, a ɓaŋ di. Dar naŋ ati Samuyele, ara cifam ti haya a Nayot.

¹⁹Mizli a soko ɓaka Sawulo: «Davite naŋ da a Nayot, gweˀ avu Rama.»

²⁰Sawul a slin ɓa ara joko Davite. Mizli mindilam a diga na, a puram mijiviɗ ngi Bumbulvuŋhoy taˀ ar jum taŋ, ara ɓam ɓi ngi Bumbulvuŋ manjika taŋ di, waɗ Samuyel deŋ a mbuŋ taŋ. ˀUf ngi Buymisemuŋ a ci ar mizli mijigina lihey, Sawul mislino taŋ tuwa, joˀ taŋ tuwa, a ɓam ɓi ngi Bumbulvuŋ manjika taŋ di ya.

²¹A ra ɓaka ɓi nah da Sawulo, jo a slin mijigina li mekelemey ma, taŋ kwana a zlaka ara ɓam kanah ya. Sawul a slin mizli mijigina lihey sar mimakir naŋ ma, taŋ vuna kwana ara ɓam kanah ma ni.

²²Naŋ ti hirnga naŋ vuna, aru nga Rama, a ndil ami futuŋ madiɗa a Seku. A cufuɗ, a ɓi: «Samuyel ati Davit na taŋ amaka?» Mizli a ɓakaŋ: «Taŋ a Nayot, gweˀ a Rama.»

²³Naŋ aru nga Nayot, hirwuy Rama. ˀUf ngi Buymisemuŋ a ci angi naŋ, joˀ naŋ tuwa, aru bal ti ɓi ɓi ngi mijiviɗey ngi Bumbulvuŋ, hã ara ndil a Nayot, gweˀ avu Rama.

²⁴Naŋ tuwa ya kwana, a cuko zanahaya, a ɓi ɓi ngi mijiviɗey a mbuŋ samuyele. Akẽh na, a diɗ kipiyah, gulndiŋ kine, naŋ da hiipas, yo hã duvuɗ, li daŋ daŋ. Vurˀe, mizli a ɓam: «Sawul a tiri mijiviɗ ngi Bumbulvuŋ le ya kwa mbrike?»