Read South Giziga 1SA 2 Bible Online

1SA 2 - South Giziga bible

1SA 2

¹Akẽh na, Ana a dir dibiɗ, a ɓi: «Yira mumul haɗa a mevel ɗu, mbele Buymisemuŋ, ya hirnga paɗ a muŋ, mbele Buymisemuŋ. Yira ɓi kwala wuzlar ar mesene ɗuwoyo. Ka mitiri ti ya bugawla na Bumbulvuŋ, yira cin di ndum.

²Buymisemuŋ naŋ pal, misi kaɓa naŋ anta. Mbur mekelem pal misi kaɓa ka anta. Mijini ˀis misi kaɓa Bumbulvuŋ ndr'anta.

³Ɓi mi kum mukoloŋ koloŋ ngi huhumo vu kum na, ki maka hiri naŋ ava mata. Anja mi ngi sliŋ a bo ti balam kumo ta: asi Buymisemuŋ i Bumbulvuŋ misina gwataya le gar, gwat ngi gi ngi mizli gar na, ma sla ɓi nah i naŋ.

⁴Bugawlahaya, a puraka na, lek taŋhaya a ngilam le, amma hĩhĩyahaya, a lumam gidaŋ le ar deɗe ngi gabaga ngi juwa kwacaya.

⁵Mizli mimbamle ara gam slra ngi luuma gwat ngi zum, yo misi ti mayay ara muskam vu, naŋ kine aya, ngwas dirlaya a yi ziri tarnaˀa, amma ngwas miyi ziri haɗa, ara pusluɗ babara kpozloŋ kpozloŋ.

⁶siifa ati muco, taŋ asi haŋ ngi Buymisemuŋ, ci ng'ar li cifi ngi mizli mumucahay, yo slikiɗ tir li cifi ngi mizli mumucahay gar na, jiviɗ naŋ ava.

⁷Gi murga ati gi zlili gar na, taŋ asi haŋ ngi Buymisemuŋ, a vuso mburo, yo a ga zlili da mburo ma.

⁸A slikiɗa mbur hĩhĩya midiɗ le putukul ar lagwaɗa, yo a zuɓa mbur misi murga misi ar kitikile, ɓa ara cifa taŋ jom ati buyoy, yo ɓa a vula taŋ li cifi hirnga. Asi ɓamtal mijaha duniya, inga naŋhay, muɗuva duniya taˀ angi taŋ na i naŋ.

⁹Mizli miteŋteŋhey ava gar na, a jigina taŋ a jiviɗe. Amma misi moˀoreheye a sa micam ar luvuŋ, asi mike na, bugawla a lum ti gidaŋ ta.

¹⁰Mesene ngi Buymisemuŋhoy a sa ngizlam kap, Buymisemuŋ a sa ndislo vuŋ, paɗ a muŋ ng'ar taŋ, Buymisemuŋ a sa ga kiita da hirwuyo keɗeɗe gar. A sa vula gidaŋ da buy naŋ maɗiɗa, a sa slikiɗa buy naŋ muwunaŋ hirnga paɗ a muŋ.»

¹¹A dirba nah na, Elkana a mi ngi hay naŋ a Rama, amma Samuyel, mangal gawla, a ndir a Silo ngi ga slra da Buymisemuŋ a mihiri ngi Eli, masay.

¹²Ziri ngi Heliheye, i ziri mupuɗaway ta, t'anta kam slimiɗ ar Buymisemuŋ ta.

¹³I masayay ngbaŋ, amma gwat taŋ magaka avu mizli ni: kaɓa, da mbur mira gi mikuli na, gawla ngi mbur migi mikuli a ndilo kasl useˀ midi le si na. Naŋ kaw ti furset misi sliŋ makir.

¹⁴A zliga useˀ ng'ar digiɗime, ng'ar mejejeŋ, ng'ar misirgaɗ malla ng'ar gungwa. Useˀ, furset mubo di le gar na, naɓa masay a zuɓa da naŋ. Israyeley majidiko nga Silo a muwã a diga gar na, a gam avu taŋ kanah.

¹⁵Mifineˀ nah ma na, dumbuŋ ɓa taŋ masa zlumaka mungulo na, gawla ngi masay a sawa luuma mbur maga mikuli, a ɓaŋ: «Vula useˀ ngi tus da masay. N'anta ngum ɓa ki vulaŋ useˀ mida naŋ ti de ta, amma sey misi titiri naŋ si.»

¹⁶Da mbur a ɓaŋ le: «Mbak i zlumaka mungulo ɗagay, a dirba nah, useˀ ka mawuɗ gar na, kisa zuɓa na: Gawla ngi masay a mbiɗaŋ di: Kay, kanah ta, sey ki vuliy di wurenna, da kanah ta na, yi tiɓa ti gidaŋ.»

¹⁷Naŋ kine, mungra ngi ziri ngi Eli heya naŋ haɗa a mihiri ngi Buymisemuŋ, asi mizli tayna, mikuli magaka da Buymisemuŋ na, a gam di kaɓa gwat lambaˀa.

¹⁸Samuyel, mangal gawla, naŋ a ki jampa ngi gabaga mislirkeɗ, ara ga slra naŋ a mbuŋ Buymisemuŋ.

¹⁹Vur vi gar na, mumuŋ ara tufa jibe meciɗeke da Samuyele, da taŋ mira soko ati zil naŋ Elkana nga gi mikuli magaka ar vi gar na, a saŋ di a haŋ.

²⁰Dar Eli a ɗuwula mi da Elkana ati ngwas naŋ. A ɓa Elkana: «Anja Buymisemuŋ a vuluw ziriy mekelemey ti ngwas hana ar deɗe ngi mangal ka muvulaŋ di na.» Akẽh na, a mam ngi hay taŋ muŋ.

²¹Buymisemuŋ a jina Ana, Ana a gi hur, a yi ziri mizilehey makir waɗ ziri mongosohoy cuw. Samuyele, naŋ ara gil a mbuŋ Buymisemuŋ.

²²Eli a gi gal le haɗa wãˀ. Gi gwat ngi ziri naŋhay magaka da Israyeley gar, yo taŋ mahinam ti ngwasay macikilam a mizlingre guɗuk ngi zlir ti Buymisemuŋ, mizli ma slufaka ɓi nah na, a cine le.

²³Joˀ a ɓa taŋ: «Ki gam gwat kanah vur mike? Gwat malambaˀ kum magaka na, i ra cine. Mizli gar ara ɓaka ɓi nah.

²⁴Ki gaka mata ziri ɗuwoy. ƁI ya macina maslufaka a wuzla mizli ngi Buymisemuŋhoy na, naŋ kuyta wãˀ.

²⁵Da mbur a gi mungra le da mbur mekemelem na, Bumbulvuŋ a sa cici ar ɓi naŋ gu: Amma da mbur a gi mungra le avu Buymisemuŋ na, masa cici ar ɓi naŋ i waka?» Amma, ko a kam slimiɗ ar mingiɓi ngi cine taŋ na ta. Vurˀe, Buymisemuŋ a juwa le ɓa a ngizla taŋ.

²⁶Samuyel, mangal gawla ara gil, deŋ naŋ ati kuy naŋ Buymisemuŋ ara hĩyãŋ, yo waɗ mizli gar.

²⁷Mijiviɗ ngi Bumbulvuŋ ada, a so luuma Eli, a ɓaŋ: «Buymisemuŋ a ɓeˀ nihi: ti di dideˀ ɗikey misi i bekehey ngi buy madiɗa ngi Eziptehey a Ezipte na, yi biga taŋ vu le da taŋ gisiŋ.

²⁸A wuzla Israyeley gar na, yi wunaˀ dideˀ ɗik Aroŋ le ɓa a tiri masay ɗu, ɓa a jiɗ ng'ar li gi mikuli, ɓa ngi wura urdi, ɓa a ka jampa ngi mezegwel a mbuŋ ɗu. Waɗ ma na mikuli Israyeley magaka gar na, yi vula le da muy ɗike.

²⁹Mikulihey ati gwat ngi vuloy ya miɓi ɓa a gikiy taŋ, yo ɓa a vulikiy taŋ angi hay ɗu na, ki ra kirpaka asi sar. Ki cika hirnga da ziri ɗikeye fineˀ da ya le. Gwat ngi vul ngi Israyel, mizli ɗuwoy masikiy di gar na, ki ra zlumburam ti mimezle naŋ.

³⁰Vurˀe, ya Bumbulvuŋ Buymisemuŋ, ngi Israyel a ɓi na, yi ɓuw le zleˀeŋ: «Hay ɗik ati hay ngi dideˀ ɗike, kisa ndiram kum i masayay a mbuŋ ɗu, hã ngi sete. Ani wurenna i ɓuw na, a gi kanah mata. Asi, yi ɗuva hirnga da mizli maduvikiy hirnga, amma mizli mahirsikiy na, a sa hirsaka taŋ ya.

³¹Ani hin ara ndilawa, mizli ngi hay ɗikey ati muy ngi dideˀ ɗikeye, mizli musufa hirihey na yi sa ngizla taŋ, ɓa a lumam midigila a hay kumo ta wãˀ.

³²Ki sa pura na i mesene ɗu magi slra ar guɗuk ɗo, Israyeleye, taŋ a roko kuy kuy, amma a hay ɗike midigila anta sa gi mata wãˀ.

³³Amma a wuzla dideˀ ɗikeye, yi sa pul mbur pal asi taŋ, ɓa a ndir gweˀ avu li gi mikuli ɗu, ɓa hiri ɗik a sa gir ti tuwuy, yo kisa lik haɗa. Amma dideˀ ngi hay ɗikey, a sa micam ar gawla taŋ kine aruŋ.

³⁴Gwat masa buguw di na, i gwat masa ndilawa avu ziri ɗikey mucuw na, Hofni ati Pinas. Taŋ cuw taŋ, a sa micam pas purla.

³⁵A dirba nah na, i sa wini masay miteŋteŋ. A sa gi kaɓa mevel ɗu mawuɗo, yo kaɓa ya mahĩyã. I sa ndiraŋ hay masa ndir ngi wãˀ a sa ga slra naŋ ndrehhe a mbuŋ mesi ɗu.

³⁶Yo mizli masa ndiram ti siifa a hay ɗik gar na, a sa ra huruk hurukam a mbuŋ naŋ, ɓa ngi luuma sisi malla ɗaf hulngus ngi humbuɗu, a sa ɓakaŋ: Ambuh, vuliy slra ko wanaka gar a ciki masayay na, ɓa i lum gwat ngi zum takwa.»