Read South Giziga 1SA 20 Bible Online

1SA 20 - South Giziga bible

1SA 20

¹Davit a slikiɗ baɗ a Nayot, li migweˀ avu Rama, a so luuma Zonataŋ, a cufuɗaŋ: «I gi gwat mike? I gi malambaˀ malla i gi mungra mi da bunuko, ɓa a kiɗiy vagaya ka?»

²Zonataŋ a mbiɗaŋ di: «Kay, anta sa gi ta, k'anta sa muc ta. Pura ɗi, baha, ɓa a ga gwata na, sey da a fiy ɓi nah le feˀ le. Baha a ɗumo ɓi hana avu ya vur mike? Kay anta gi ta wãˀ.»

³Davit a ɓi ti hudum: «Bunuk a si na le kuy kuy wãˀ, ki ra jini ˀis asi ya. Vurˀe, a ɓi a kwacay naŋ: Anja Zonataŋ a si na neˀ ta, vur naŋ masa giraŋ ar wuluko. Kaɓa Buymisemuŋ misi ti siifa gisiŋ, yo kaɓa ka vuna, ka misi ti siifa gisiŋ aya na, naŋ kanah ya, hin ngi muc ɗu a ndir dusl kini.»

⁴Zonataŋ a mbiɗa da Davite: «I sa guw gwat ka mawuɗo.»

⁵Davit a ɓa Zonataŋ: «Tiprike, i kiyakaˀ, kiya ngi muguzlum. Anja zleˀe na, i sa cifi ngi zuma ɗaf ati buyo. Amma kisa puliy i ra ɗum a duba gala, sar mimakir naŋ ma, hã duwul pastaˀ.

⁶Da bunuk a sa pura le y'anta na, kisa ɓaŋ: «Davit a hurdum le hirdam hirdam ɓa a lum jiviɗ ngi ru nga Betelyem, walahay naŋ, asi a hay taŋ, ara gam mikuli magaka vi gar na.

⁷Da buy a ɓi le naŋ kuy na, naɓa gawla ɗike, a cifi setette. Amma da a slikiɗ himaˀ le na, si na sin le, naɓa a juwa le ɓa a ziziy.

⁸Biga gi mezle vur ya gawla ɗike, asi mike na, i jumomˀay le ngi ngama ar slimiɗ ngi Buymisemuŋ. Na zle, ko da i gi malambaˀ le na, zuwen ka vuna makiɗiy, a funa ka mavuliy da bunuk na le ta kwa!»

⁹Zonataŋ a ɓi: «Kay, a gi kanah ta wãˀ. Da i si na le gisiŋ baha a juwa le, ɓa a kiɗuw vagay na, hadam, anja i ɓuw di.»

¹⁰Davit a ɓa Zonataŋ: «Da bunuk ara mbuɗuw di ti buc na, masa fiy ɓi nah i waka?»

¹¹Zonataŋ a ɓa Davite: «So, bukum nga duba gala.» Dar taŋ cuw taŋ a bam nga duba gala so.

¹²Zonataŋ a ɓa Davite: «I ra ɓuw ti slimiɗ ngi Buymisemuŋ Bumbulvuŋ ngi Israyeley, tiprik malla duwul angi pas hana, i sa jiɗa wuluk ngi baha ngi sar mimakir naŋ ma. Da baha naŋ ti ɓi mezle vur ka na, y'anta sa ɓuw ɓi neˀ ta.

¹³Amma da baha a juwa le ɓa a zizuw na, yi sa ɓuw ɓi nah, yi sa puluw ki cuh, ki ra cifi setette gwaɗ ɗiki. Da i ɓuw di ta na, anja Buymisemuŋ a kutiy ti bonoy mukuyta wãˀ. Yo anja Buymisemuŋ naŋ da ati ka kaɓa naŋ misi ada zleˀe ati baha vuna ya.

¹⁴Da kaɓa yi sa ndir le ti siifa na, kisa giy mezle ngi Buymisemuŋ, naɓa yi muc ta.

¹⁵K'anta sa pula gi mezle ɗik da dideˀ ɗuwoyo ta, ko da Buymisemuŋ misa kiɗa mi ngi mesene ɗikeye le purla purla gar asi ruwuyo kwana, kanah ma.»

¹⁶Dar Zonataŋ a jam ngama ati Davite waɗ ati hay naŋ, a ɓi: «Anja Buymisemuŋ a pula cuwal naŋ ar Davit malla ar mesene ngi Daviteye.»

¹⁷Akẽh na, Zonataŋ a hudumo Davite ma ti slimiɗ nga naŋ mawuɗaŋ haɗa na, asi a wuɗaŋ haɗa kaɓa naŋ mawuɗ hirnga naŋ vuna.

¹⁸Zonataŋ a ɓaŋ: «Tiprike, i kiyakaˀ ngi muguzlum, a sa puraka k'anta, asi li ɗik a sa ndir njoŋ kine.

¹⁹Duwul na, kisa pi sar kutum ng'ar li ka muɗum anga zleˀe ngi hin mekelem ada tuwa ma, yo kisa cifi gweˀ avu ɗugur Ezel.

²⁰Ya i sa mula luvuto kaˀ kaˀ makir ti ciki ɗuguro, kaɓa gwat ada ngi mul a diga.

²¹Akẽh na, yi sa slin mangal: «A ra hiliy luvutoy na.» Da yi ɓa mangal vuna le: «Luvutoy vuna t'ani nga dirba ɗik, inga hilo taŋ» na, akẽh ki sawa, ki zluwun ta, naɓa ɓi anta, ya maɓuw na, ar slimiɗ ngi Buymisemuŋ.

²²Amma da yi ɓa mangala le: «Luvutoyo t'ani nga mbuŋ ɗik a diga» na, a ru, asi i Buymisemuŋ maɓuw a ru.

²³Hana i ɓi ndra majuwaka ar wala ndra, Buymisemuŋ naŋ da i sedewo ar wala ndra ati ka caˀa.

²⁴Dar Davit a ɗum a duba gala so. Kiya ngi muguzlum a slo le. Buy a cifi le ɓa ngi zuma ɗafa.

²⁵Buy a cifi le ar janga naŋ, kaɓa hõyyõ zleˀe, ar janga mi jah da dalam. Zonataŋ a cifi tumbuŋ Sawul. Abner a cifi ti ciki naŋ. Li cifi ngi Davit a ndir njoŋ.

²⁶Tapas nah na, ko Sawul a ɓi ɓi neˀ ta, asi a ɓi ti kwacay na: «Davit muso ta na, a ro gwat mugurjik a lumaŋ le, malla naŋ ti dili kwani.

²⁷Amma put ngi li naŋ muwun mekelem, hin mucuw naŋ ngi kiya tuwa kwana, li cifi ngi Davite naŋ njoŋ na si. Sawul a ɓa mangal naŋ Zonataŋ: «Ngi daambu ati nga dana gar na, mangal ngi Zese a so ar li zuma ɗafa ta vur mike?»

²⁸Zonataŋ a mbiɗa da Sawulo: «Davit a cufuɗiy hirdam hirdam ɓa aru gbaˀ nga Betelyem.

²⁹A ɓiy zleˀe na: ‹Ambuh, puliy yi ru takwa, asi mike na, muy ɗuwoy ara gam mikuli ar walahaya, yo i sukum ɗu vuna miɓiy ɓa yi ru. Da ki hiyĩy le na, puliy ɓa i lih sar nga pura sukum ɗuwoyo. Naŋ muso ar li zuma ɗaf a hay ɗike ta na, aseˀeŋ.›

³⁰Sawul a slikiɗ himaˀ ar Zonataŋ, a ɓaŋ: «Kiri ka munuku, yi si na le, ki ngama ngi mangal ngi Zese, hana i mesem ar ka, yo ar munuko.

³¹Asi da mangal ngi Zese na, naŋ da ti siifa a ruwuyo aruŋ na, k'anta sa cifi zuy zuy ta, yo k'anta sa zum buyo ta ma. Wurenna, ara jo di, anja a sikiy di, asi a ndila le ngi kiɗ vagay.»

³²Zonataŋ a mbiɗa da cine naŋ Sawulo: «Ki wuɗ kiɗ naŋ vuna vur mike? A gi gwat mike?»

³³Sawul tuwa, a puka ziwite ng'ar Zonataŋ, ɓa a kiɗaŋ. Ar nah na, Zonataŋ a si na le, cine a juwa le a mevele gisiŋ ngi kiɗa Davite vagay.

³⁴Ar hin mucuw naŋ ngi kiya nah na, Zonataŋ a ji mevel, a slikiɗ tir li zuma ɗafa, a zum ɗaf ngi muguzlumo mata, asi ara lika Davite, vur cine a zaŋ le.

³⁵Amma, put ngi li naŋ muwun na, Zonataŋ a bi nga duba gala, ng'ar li wi haŋ taŋ ati Davite. Naŋ ti mangal gawla ɓaˀ aseˀeŋ.

³⁶Zonataŋ a ɓa mangal tuwa: «Kil nga mbuŋ kisa hiliy luvutoy ya masa mula taŋ na.» Mangal tuwa, ara kil, joˀ Zonataŋ a mula luvuto tuwuɗeˀ hirnga naŋ le.

³⁷Mangal a ndil angi li Zonataŋ mumula luvut ng'ara tuwa, joˀ Zonataŋ a tila mi da mangala, a ɓaŋ: «Luvuto, n'ani tuwuɗeˀ hirnga ɗike nga diga takwa?»

³⁸Zonataŋ ara til mi a dirba mangala: «Kutum, wus vu, ki cici ta.» Mangal gawla ngi Zonataŋ a zuɓo luvuto, a mo di da buy naŋ.

³⁹Mangal a sla wala nah ta, amma Zonataŋ ati Davit a slaka wala nah le.

⁴⁰Zonataŋ a vula gwat ngi vurum naŋhaya da mangal tuwa, a ɓaŋ: «Ani, aru ti taŋ ng'ar walahay.»

⁴¹Mangal a mi, joˀ Davit a bo tir li ɗum naŋ, kini tir vay ngi ruwuy ngi ɗugur tuwa. A huruk huruk, hã midibiɗ durus durus a ruwuy is makir a mbuŋ Zonataŋ. Akẽh a jam vu kuɓuy, dar taŋ cuw taŋ a tuwam, Davit a tuwuy haɗa fineˀ Zonataŋ.

⁴²Zonataŋ a ɓa Davite: «Aru ti zuy, asi mike na, ndra ar wala ndra, i hudumom le ti slimiɗ ngi Buymisemuŋ, i ɓam na: «Anja Buymisemuŋ a ndir sedewo ar wala ndra, yo ar wala ngi dideˀ ɗikey ati dideˀ ɗuwoyo hã ngi caˀa.»