Read South Giziga 1SA 21 Bible Online

1SA 21 - South Giziga bible

1SA 21

¹Dar Davit a zuɓa jiviɗ a ru, yo Zonataŋ kwana a mi ng'ar walahay.

²Davit a ndil a Nobi, a hay Ahimelek masay. Ahimelek a so ji hirnga ti Davite ti jijik, a ɓaŋ: «Ka pal ɗike, ko mikis ɗik anta vur mike?»

³Davit a ɓa Ahimelek, masay tuwa: «Buy a ɗuviy ɓi, a ɓiy: ‹Slra ya maslinuw vurˀe na, anja ko mbur a si na ta.› Vurˀe, gawla ɗuwoyo kwana, i wa taŋ haŋ ar li kahana.

⁴Davit a ɓaŋ: Misi avu ka ngi zum i mike? Vuliy ɗaf zlum so malla gwat mekelem ka malum gar.»

⁵Masay a mbiɗa da Davite: «Y'anta ti ɗaf hõy gara ta ɓula, sey ɗaf muvulahay le da Bumbulvuŋ, ɓa yi vuluw na, sey da gawla ɗikey, a hinam ti ngwasay wureˀ ta far.»

⁶Davit a mbiɗa da masay: «I mitika ndra le avu ngwasaya ar ɓi hana, kaɓa zleˀe, ya maru ng'ar vurum a ɓuh. Wãˀ naŋ ma na, da ya mira bi ng'ar vurum na, gwat ngi vurum ngi gawla ngisi yahaya i muvula taŋ le da Bumbulvuŋ. Yo ko da bo ɗu hana, i Bumbulvuŋ miɓiy ta tekeɗe kwana, kite a ɓiy le tisi gwat ngi vurumoy muvulahay le da Bumbulvuŋ na.»

⁷Masay a vulaŋ ɗaf muvulahay le da Buymisemuŋ tuwa so, asi ɗaf mekelemey anta, sey i ɗaf muvula le da Buymisemuŋ, ɓa a pam mida wureˀ ar li taŋ.

⁸Tapas nah vuna, mbur pal asi gawla ngi Sawuloyo naŋ da angi hay ngi Buymisemuŋ akẽh. A zilaka Doˀek, mbur Edom, yo i madiɗa ngi mijigin ngi Sawuloy.

⁹Davit a ɓa Ahimeleke, «ziwit malla maslalam ada avu ka aka kwa? Maslalam ɗu malla ko gwat ngi vurum ɗuwoyo, yi zuɓo a haŋ ta, asi mislin ngi buyo naŋ gurjiki.»

¹⁰Masay a ɓaŋ: «Misi aka i maslalam ngi Goliyat, mbur Filisti, ka mikiɗa ar sozo ngi widis madiɗahay tuwa. N'ada mbizeˀ mbizeˀ ti zana a duba zana ngi gi mezegwel na. Da ki wuɗ le ɓa ki zuɓa da ka na, zuɓaŋ, asi mekelem anta aka ta.» Davit a ɓaŋ: «Mifineˀ naŋ anta, vuliy di.»

¹¹Tapas nah vuna si na, Davit ara kil nga mbuŋ ava kileŋ avu Sawulo. A ndil a hay Akis, buy ngi Gat.

¹²Akise, gawla naŋhay a ɓakaŋ na: «Davit hana i buy ngisi ruwuy tuwa ta kwa? Mahunumakaŋ ti dimis, ti ɓuruk aseˀe, Sawul a kiɗ asi mesene naŋhaya durmuku, Davit a kiɗ nga naŋ durmuk mbeˀmbeˀ tuwa» na, i naŋ vuna ta kwa?

¹³Davite, mingiɓi misenna a caŋ le a mevele haɗa, hã a zluwun ti Akis, buy Agada.

¹⁴Dar a zla a gi kaɓa mibirnga a mbuŋ taŋ akẽh, a ɓi lambaˀ lambaˀ a wuzla taŋ, a tuh gwatay avu miviŋheye, yo a ɓulo tazlay lololo avu mazlamaya.

¹⁵Dar Akis a ɓa gawla naŋhaya: «Ki puraka le kuy kuy i mibirnga takwa? Ki sikiy di ngi gi mike?

¹⁶Mibirngahay a kicam le avu ya aka kwa, hã ki sikiy ti misenna ɓa a ga birnga naŋ a mbuŋ ɗu vur mike? Kay, naŋ anta sa ci ngi hay ɗu ta.»