Read South Giziga 1SA 22 Bible Online

1SA 22 - South Giziga bible

1SA 22

¹Davit a bi ti kẽh, ara ɗum ar butum a Adulam. Sukum naŋhay ati muy naŋhaya, ti taŋ micinaka na, a ram, ara jumom ava.

²Mizli muroko ti gir, muroko ti duvus a hirnga taŋ, yo muroko ti ji mevel gar na, a kusom ng'avaŋ, joˀ naŋ a tiri buy taŋ. A gam le ava gwat ngi mizli skat skat mufaɗa.

³Davite, a bi ti kẽh nga Mispe, hirwuy Moˀap. A ɓa buy Moˀapa: «Pula jiviɗ da baha ati maha a soko cifam avu ka, hã tapas ya misina gwat Bumbulvuŋ masa ga vur ya na le.»

⁴Davit aru ti taŋ nga mbuŋ buy Moˀapa so, taŋ a ndiram avu buyo ar hin Davit muro ti ɗumo.

⁵Amma mijiviɗ Gad a ɓa Davite: «Ki ndir ar li ɗum ta. Mi nga hirwuy Zuda.» Davit a bi, aru ng'ar ɓuh mikip ngi Heret.

⁶Sawul a cine na, a lumaka Davit ati mizli ngi seˀeheye le. Sawul a cifi le ar miɗingir asi widis meciɗek ada a Gibeya. Ziwit naŋ kaw a haŋ, yo gawla naŋhay gar deŋ deŋ a cikeˀe.

⁷Sawul a ɓa gawla naŋhay mideŋ deŋ a cikeˀe tuwa: «Kum mizli Benjameŋhey, cinam kuy kuy! Guva ngi daw ati ngi gudubuno, ki waka na, mangal ngi Zese a sa vulukum gar kum aya kwa mbrike? Malla a sa cif ti kum madiɗa ngi sojehey durmuk durmuk malla skat skata ya kwa.

⁸Kum magam gidiɓi ar ya na, vurˀe sukwa? Mangal ɗu majam ngama ati mangal ngi Zese na, ko mbur purla mafiy ɓi nah anta, ko mbur purla malika ɓi ɗu anta. Mangal ɗu a cica gawla ɗu, ɓa a ziziy hirnga, kaɓa ɓi nah macuh ani dana na, ko mbur mafiy ɓi nah anta mbrike?»

⁹Doˀek, mbur Edom mideŋ a ciki gawla ngi Sawuloyo, a ɓa sawulo: «Yi pura mangal ngi Zese le ngi pas mekeleme, a ndil le a Nob, a hay Ahimelek, mangal ngi Ahitup.

¹⁰Ahimelek a cufuɗa Buymisemuŋ le vurˀeŋ. A vulaŋ gwat ngi zum le. A vulaŋ maslalam ngi Goliyat, mbur Filisti tuwa le.»

¹¹Dar buy Sawul a slin, ara ziloko Ahimelek, masay, mangal ngi Ahitup tuwa, naŋ ati mizli ngi hay naŋhaya gar, waɗ masay ngi Noboyo. Taŋ gar taŋ a soko ngi hay buyo.

¹²Sawul a ɓa Ahimeleke: «Mangal ngi Ahitup, cin kuy kuy so.» Ahimelek a mbiɗaŋ di: «Haˀaw, buy.»

¹³Sawul a ɓaŋ: «Ahimelek, ka ati mangal ngi Zese, ki gam gidiɓi ar ya vur mike? Ki vulaŋ gwat ngi zum waɗ maslalam, yo ki cufuɗa Bumbulvuŋ le vurˀeŋ, ɓa a slikiɗ ɓi avu ya, yo ɓa a pur jiviɗ ngi ziza hirnga ɗu, kaɓa ɓi nah macuh dana ani na.»

¹⁴Ahimelek a mbiɗa da buyo: «Mobor, ani a wuzla gawla ɗikey vuna gar na, mbur miteŋteŋ kaɓa Davit vuna ada kwa? I jomo ɗiki, yo i madiɗa ngi gawla mijigin ɗikey, yo i mbur hirnga a hay ɗike.

¹⁵Ya mizla cufuɗa Bumbulvuŋ vurˀe na, i hin hana tew kwa? Ĩˀĩ, ya kileŋ avu gidiɓi a hirnga ɗike. Haˀaw buy, anja ki pula ɓi hana ar ya gawla ɗike ta, malla ar mbur pal a wuzla mizli ngi hay ɗuwoyo ta, asi ɓi nah gar na, gawla ɗike sin ɓi neˀ ara ta wãˀ.»

¹⁶Buy a mbiɗaŋ di: «Ahimelek, ka ati hay ɗike gar, kisa micam.»

¹⁷Dar buy tuwa, a ɓa gawla mijigin naŋhay mideŋ deŋ a cikeˀe akẽh: «A ram, kiɗaka masay ngi Buymisemuŋhoy na gar vagay vagay, vur taŋ kwana a jinaka Davite le ya. Asi Davit a ro ar li kil na, a sinaka le ngbaŋ, ko a fikiy ɓi nah ta.» Amma gawla ngi buyoyo, ɓa a jaka haŋ avu masay ngi Buymisemuŋhoyo na, a ngumam ta.

¹⁸Dar buy a ɓa Doˀeke: «Ka, a ru, kiɗa masayay na.» Doˀek mbur Edomo, a mbiɗi hiri, a kiɗa masayaya ti haŋ naŋ. Ti di nah na, mizli miki zana ngi gi mezegweleye, Doˀek a kiɗ asi taŋ kukur dangafaɗ nga zlum.

¹⁹A Nob, walahay ngi masay tayna tuwa, Sawul a kiɗa ziley ati ngwasay, ziri memeɗehey ati ziri ngi dubahaya, slahay ati zunguhoy waɗ tumuŋhoyo. A nguma taŋ gar ti maslalam.

²⁰Ahimelek mangal ngi Ahitupo, mangal naŋ purla a lih le. A zilaka Abiyatar. A kil, a, ra luuma Davite.

²¹Abiyatar a fa ɓi nah da Davite, a ɓaŋ: Sawul a kiɗa masay ngi Buymisemuŋhoyo le.

²²Davit a ɓa Abiyatara: «Ngi pas numuŋ ada na, Doˀek, mbur Edomo naŋ da aka. I si na le a sa ra ɓa ɓi nah da Sawul zleˀe si. Mupo ɓi hana ng'ar mizli ngi hay bunukoy gar na, i ya.

²³Ki zluwun ta, cifi avu ya. Sawul a wuɗ di i ziza hutuŋ ndra, cuw ndra. Ka misi avu ya na, ka zuy zuy.»