Read South Giziga 1SA 23 Bible Online

1SA 23 - South Giziga bible

1SA 23

¹Ngi pas mekelem ada na, mbur a so ɓa Davite: «Ani, Filistihey ara gam vurum a Keyla, ara tiɓaka daw taŋ misi a məlaŋ.»

²Davit a cufuɗa Buymisemuŋ: «Zliv ani i ru ɓa i kiɗa Filistihey na kwa?» Buymisemuŋ a ɓa Davite: «Aru, kisa tikaˀay da Filistiheye, ɓa kisa laha Keyla.»

³Davite, mizli naŋhay a ɓakaŋ na: «Ani, ar hirwuy Zuda aka, i roko zluwunam si. Da i sa ram le a Keyla ngi kiɗa vu ati Filistihey na, zluwun a sa ga ndra fineˀ ta jak kwa?»

⁴Davit a cufuɗa Buymisemuŋ sar pal ava ma. Buymisemuŋ a mbiɗaŋ di: «Zuɓa jiviɗ, aru nga Keyla, asi i sa vuluw Filistiheye, asi haŋ ɗiki.»

⁵Davit ati mizli ngi seˀehey a ram nga Keyla so, a zlaka kiɗa vu ati Filistiheye, yo a kiɗaka taŋ haɗa kuyta wãˀ. Davit a laha mizli Keylahayakahana.

⁶Abiyatar, mangal ngi Ahimeleke, ti naŋ mikil ng'avu Davit a Keyla na, dambalaka aru ti zana ngi gi mezegwel da Buymisemuŋ le a haŋ.

⁷A ɓaka Sawulo na, Davit a ci le a Keyla, joˀ Sawul a ɓi: «Bumbulvuŋ a vuliy di le asi haŋ ɗu muduba, asi naŋ mici ng'ar walahay na, kite a gica hirnga naŋ le ti haŋ naŋ, asi a ci na ng'ar walahay misi mizlingre magici kiɗasl.»

⁸Sawul a zila mizli migi vurum ngi Israyeleye gar, ɓa ara ndahaka Davit ati mizli naŋhaya gar a Keyla.

⁹Davit a si na le, Sawul ara juwo vu ngi so kiɗ naŋ, a ɓa masay Abiyatar na: «Zuɓa zana ngi gi mikuli.»

¹⁰Davit a ɓi: «Bumbulvuŋ Buymisemuŋ, ngi Israyel, sawul a juwa le a mevele ngi so ziza walahaya asi ɓi ɗu ya gawla ɗike, yi cine ɓi nah le.

¹¹Da a sa so le na, ani Keylahay a sa vulikiy asi haŋ naŋ kwa? Ani Sawul vuna a sa so kaɓa ya gawla ɗik micina ɓi naŋ na kwa? Bumbulvuŋ Buymisemuŋ, ngi Israyel, ambuh ɓa ɓi nah da ya gawla ɗike takwa! Buymisemuŋ a ɓaŋ: Sawul a sa sawa.»

¹²Davit a mbiɗaŋ di: «Ya ati mizli ngisiyahaya, ani mizli madiɗa ngi Keylahay a sa vulam ndra asi haŋ ngi Sawulo kwa mbrike?» Buymisemuŋ a mbiɗaŋ di: «Haˀaw, a sa vulukum asi haŋ ngi Sawulo.»

¹³Akẽh Davit ati mizli naŋhaya, a zuɓaka jiviɗe so. A gi gwat ngi mizli skat skat merkeɗe. A bam ti Keyla, a ram ng'ar li mekelem. Sawul micina, Davit a sumuɗ le ti Keyla na, a pula vurumo.

¹⁴Davit a cifi a wuzlaɓuh mikirɗak kirɗak ngi Zif, ar hirwuy muwãhay. Ti hin nah gar na, Sawul a ro ti sipi naŋ, amma Bumbulvuŋ a vulaŋ di asi haŋ naŋ ta.

¹⁵Davit a pura na, Sawul ara bi ti vurum aseˀe, ɓa a zizaŋ hutuŋ. Davit a cifi a Horsa a wuzlaɓuh ngi Zife.

¹⁶Zonataŋ, mangal ngi Sawul a zuɓa jiviɗ, ara luuma Davit a Horsa, a tuso mevel da Davite ti slimiɗ ngi Bumbulvuŋ.

¹⁷Zonataŋ a ɓa Davite: «Ki zluwun ta, baha anta lumuw ngi kiɗ vagaya ta. Masa zum buy a Israyel i kaha, yo yi sa cifi mucuw ɗiki. Ko baha Sawul vuna a si na le kuy kuy.»

¹⁸Dar taŋ cuw taŋ a jumomˀay a mbuŋ Buymisemuŋ. Davit a cifi a Horsa, joˀ Zonataŋ a mi ngi hay naŋ.

¹⁹Mizli Zifey ara lumaka Sawul a Gibeya, a ɓakaŋ: «Davite naŋ da ɗum tir vay ndra a Horsa, ar li mutuwaˀ ngi jiɗi, ar muwã Hakila, misi kini tir vay ngi ruwuy ngi li micay ngi papala mahuvaka ta na, ki si na ta kwa mbrike?

²⁰Haˀaw buy, da ki wuɗ le ɓa ki ra ja na, so ng'avu ndra, a ru. Masa jukuw di i ndra vuna buy.»

²¹Sawul a ɓa taŋ na: «Kum mupurikiy ircece na, anja Bumbulvuŋ a ɗuwulukum mi.

²²Wurenna, a ram, cufuɗakaŋ avu mizli ava, ɓa ki sinaka li naŋ misi anga kuy kuy: naŋ amaka? Yo mupura i waka? Asi mike na, a ɓikiy le, wer ava haɗa teˀe.

²³Lihey zliv naŋ maɗum ar taŋ gu na, ara puraka taŋ ɓa ki sinaka taŋ. Da kum misinaka li naŋ le gisiŋ so na, kisa soko ng'avi ya, ɓa i ram bummoˀ ati kumo. Naŋ kine, da naŋ da asi ruwuyo na, yi sa sipaŋ ar lihey gar misi asi ruwuy Zuda, ɓa yi lumaŋ.»

²⁴Mizli Zifey a pulaka Sawulo, a mam ngi hay taŋ so. Davit ati mizli naŋhaya, taŋ a wuzlaɓuh mikirɗak kirɗak ngi Maˀoŋ, kini tir vay ruwuy ngi li micay ngi papala mahuvaka ta na.

²⁵Sawul ati mizli naŋhay a bam nga sipa Davite. Mizli a faka ɓi nah da Davite. Davit a pi sar, ara cifi a muwã munjoˀnjoˀ mekelem ada a wuzlaɓuh mikirɗak kirɗak ngi Maˀoŋ. Sawul a cine le, a sipa Davite nga wuzlaɓuh ngi Maˀoŋ.

²⁶Sawul ati mizli naŋhaya, ara sipaka Davite ti ciki muwã vay ka, yo Davit ati mizli naŋhaya kwana, taŋ ti ciki muwã vay diga. Davit ara wus vu ngi ru kutum kutum ɓa a lih avu Sawulo. Sawul ati mizli naŋhaya, a ndir mata, ɓa ara jaka is da Davit ati mizli naŋhaya, yo ɓa a gunoko taŋ ɓa a jaka taŋ.

²⁷Amma mislin a ndilo avu Sawulo, a ɓaŋ: «Sawa kutum, asi Filistihey a coko le ngi kiɗa vu ati hirwuyo.»

²⁸Akẽh Sawul a pula sipi Davite, a mi nga kiɗa vu ati Filistiheye. Vurˀe, a zilaka li nah: ‹Muwã wunuku›