Read South Giziga 1SA 24 Bible Online

1SA 24 - South Giziga bible

1SA 24

¹Akẽh na, Davit a pula hirwuy nah, ara cifi gweˀ avu En-Gedi, angi li mutuwaˀ ngi jiɗi.

²Ti Sawul mumo tir li ɓula Filistiheye na, a slufakaŋ ɓi nah, a ɓakaŋ: «Wurenna Davite n'ani a En-Gedi.»

³Sawul a hil sojehey durmuk makir, muwunahay ti wini asi hirwuy Israyel gar, a ram nga proko ti Davit ati mizli naŋhay misi ar li misek duba cakay ati muwã ngi ˀaw muwãhaya, ɓa a si na da naŋ da kwana.

⁴A ndil avu gezleŋ ngi tumuŋhoy migweˀ gweˀ a ciki jiviɗi. Butum ada a diga. Sawul a ci nga muca kwanay anga. Dambalaka Davit ati mizli naŋhaya t'ada joa hur butum tuwa.

⁵Davite, mizli naŋhay a ɓakaŋ na: «Hin Buymisemuŋ muɓuw di tuwa na, i hin hana so, a ɓuw na: ‹Ani yi sa vuluw mesene ɗik asi haŋ ɗiki, ɓa kisa gi di kaɓa ka mawuɗo.› Akẽh Davit a slikiɗ, ara sli mburac avu mi ngi zana ngi sawulo ti mi yaŋ yaŋ.

⁶A dirba nah, Davite, didak ara muɗaŋ ti gidaŋ, asi naŋ misli avu mi ngi zana ngi Sawul tuwa.

⁷Davit a ɓa mizli naŋhaya: «Anja Bumbulvuŋ a tikiy ngi wusa siifa ngi buy ɗu, naŋ muwunaŋ na. y'anta i sa ja haŋ avu naŋ ta ndiɗaˀ wãˀ, asi i mbur Bumbulvuŋ muwunaŋ.»

⁸Davit miɓi kanah tuwa na, a cica mizli naŋhaya gicic, a pula taŋ ɓa a kiɗaka Sawulo mata. Sawul a bi tir butumo, a zuɓa jiviɗ.

⁹A dirba nah na, Davit a slikiɗ, a bi tir butumo, a tila mi da Sawulo, a ɓaŋ: «Mobor, buy ɗu.» Sawul a puro hiri nga dirba. Davit a guɓ midibiɗ durus da ruwuy, a putukul a mbuŋ naŋ.

¹⁰Davit tuwa, a ɓa sawulo: «Mizli a waka kaɓa yi ra wuɗ zizi ɗike, ki cine mingiɓi taŋ vur mike?

¹¹Ani dana, ki pura le ti hiri ɗike: Buymisemuŋ a vuluw le asi haŋ ɗu ngadana ar butumo. A ɓikiy ɓa yi kiɗuw zleˀe, amma yi puruw ircece le, joˀ yi ɓi: ‹Y'anta ja haŋ avu buy ɗu ta, asi i buy Buymisemuŋ muwunaŋ.›

¹²Aw baha, pura gwat mikaw asi haŋ ɗu na. Haˀaw, pura, i mi ngi zana ɗik ya mubuko buk avu ka. Ani yi buk di i mi ngi zana ɗiki, yi kiɗuw vagay ta. Pura kuy kuy, y'anta ti wuluk ngi kiɗ ɗik, yo ngi slikiɗa ɓi avu ka ta takwa! Yo yi gi mungra avu ka ko neˀ ta. Masipiy ɓa ki ziziy siifa i ka jak.

¹³Anja Buymisemuŋ a ga ndra kiita ar wala ndra ati ka. Anja Buymisemuŋ a pula cuwal ɗu ti ka. Amma ya, y'anta i sa ja haŋ avu ka ta.

¹⁴Mikicuwul misi zleˀe a ɓi: ‹Moˀore a bo tivi misi Moˀorehey.› Amma ya, y'anta i sa ja haŋ avu ka ta.

¹⁵Buy ngi Israyel a bi nga gi vurum ati waka? Ati ya takwa! Buy a sipi nder nder i waka? I ya kiri mumuca le. Yo ya busukum ngatara na takwa?

¹⁶Naŋ kuy, Buymisemuŋ a sa ga ndra kiita ar wala ndra ati ka. Anja a ɗumburo ɓi ɗu, a jiniˀis asi ya, yo anja a ga kiita ɗu, a lihiy tisi haŋ ɗike.»

¹⁷Ti Davit mikiɗa mi ngi ɓa ɓi hana da Sawulo na, Sawul a ɓi: «Davit, mangal ɗu, hana i ˀay ɗik gisiŋ kwa, joˀ Sawul a zla tuwuy kaɗam kaɗam.

¹⁸Sawul a ɓa Davite: «Ka jeŋŋe fineˀ ya, asi ki giy mezle le, amma ya yi guw di i malambaˀa ngbaŋ.

¹⁹Yo mezle ɗik ka magiy di na, ki biga le dana muduba: Buymisemuŋ muvuliy asi haŋ ɗik na, ki kiɗiy vagay ta.

²⁰Da mbur miji hirnga le ti mesene naŋ ma na, a pula aru jam jam zleˀe ma kwa? Anja Buymisemuŋ a wurkuw migir ngi gwat ka migiy di ngadana na.

²¹Wurenna yi si na le: kisa tiri buy, yo zumabuy ngi Israyele, a sa ndir a haŋ ɗiki.

²²Wurenna so na, hudum a mbuŋ ɗu aka ti slimiɗ ngi Buymisemuŋ, ɓa a dirba ya mumuc le na, k'anta sa kiɗa hilfa ngi dideˀ ɗuwoyo ta, yo ɓa k'anta sa kiɗa slimiɗ ɗu ti wuzla mizli ngi hay bahahaya ta.»

²³Davit a hudum a mbuŋ Sawulo. Akẽh na, Sawul a mi ngi hay naŋ, joˀ Davit ati mizli naŋhay a jiɗam ng'ar li ɗum taŋ a muwã a muŋ.