Read South Giziga 1SA 25 Bible Online

1SA 25 - South Giziga bible

1SA 25

¹Ti di nah na, Samuyel a mucu. Israyeley gar a kusom nga gi mezegwel ngi vagay naŋ. A dikaka a hay naŋ a Rama. Akẽh na, Davit a zuɓa jiviɗ, aru nga wuzlaɓuh mikirɗa kirɗa ngi Paraŋ.

²Mbur ada a Maˀoŋ, i mbur mugop haɗa teˀe. A ga slra naŋhaya gar a Karmel. Naŋ ti tumuŋhoy durmuk makir waɗ ˀaway durmuk purla. Aru nga Karmel nga sli ngwic ngi tumuŋ naŋhay.

³A zilaka mbur nah Nabal, yo ngwas naŋ kwana Abigayel. Ngwasa, i ngwas misi lesl, yo naŋ kuy teˀe, amma zile, i mbur mutuwaˀa, yo i misi moˀore. I mbur ngisi sukwi ngi Kalep.

⁴Davit a cine le, Nabal a ro sli ngwic ngi tumuŋ naŋhay a ɓuh.

⁵Joˀ Davit tuwa, a slin mizli ngi seˀehey kuruˀu. Davit a ɓa taŋ na: «A ram nga Karmel. Ki ra lumaka Nabala, ki ɓakaŋ, yi jaŋ haŋ le.

⁶Ki sa ɓakaŋ: Anja ki vi zuy zuy. Anja ki ndiram jam jam, hay ɗik waɗ gwat ɗikey gar, a ndiram zuy zuy.

⁷I cine na, mizli a roko slam ngwic ngi tumuŋhoy a hay ɗike. Naŋ kanah, ti di mijigin ɗikey misi ati ndra a Karmele, angi hin nah gar na, i gaka taŋ malambaˀ ko neˀ ta, yo ko gwat taŋ a zizi loŋ ta.

⁸Ki cufuɗa mizli ɗikeye, a sa ɓukuw kaslsla nah, anja ani ki tiɓa mizli ɗuwoy na a hay ɗike kuy kuy takwa, asi mike na, i soko i hin ngi muguzlum. Ambuh ta kwa! Gwat zliv ka misi ti naŋ gar na, vula ndra gawla ɗikeye, waɗ da mangal ɗik Davite.»

⁹Mizli ngisi Daviteye, a ram, ara ɓaka mingiɓi hana gar da Nabala kaɓa Davit miɓa, ara kutukom.

¹⁰Amma Nabal a mbiɗa da gawla ngi Daviteye: «Davit malla mangal ngi Zese vuna i waka? Ti dana, bekehey ada haɗi makilam ti hay buy taŋhaya.

¹¹Peŋ ɗu, yam ɗu ati useˀ ɗu, i da da mizli ɗuwoy maslikiy ngwic ngi tumuŋhoy. Mizli ya misina a soko vuna ti ka ta si na, ɓa yi zuɓa i vula da taŋ di sukwa?»

¹²Joˀ mizli ngisi Davitey a mam, ara mbiɗaka mingiɓi ngi Nabal tuwa da Davite.

¹³Akẽh Davit a ɓa mizli naŋhaya: «Anja mbur gar a zuɓa maslalam naŋ.» Dar mbur gar a luwa maslalam naŋ a ciki. Gwat ngi mizli skat skat mufaɗ, a ram asi Davite. Amma mizli skat skat cuw na, a cifam ngi kutuko gwat taŋhay.

¹⁴Mbur purla a wuzla gawla ngi Nabalaya, a so fa ɓi nah da Abigayel, ngwas ngi Nabal tuwa, a ɓaŋ: «Pura ɗi, Davite, zle a wuzlaɓuh mikirɗak kirɗaka, a slino mizli nga ja haŋ da buy ndra, amma buy ndra a tiɓa taŋ kuy kuy ta.

¹⁵Mizli tayna a cifam le kuy kuy ati ndra zleˀe jaka. A gam ndra gwat malambaˀ ko neˀ ta. Ndra mambiɗam ati taŋ a ɓuh gar na, angi hin nah gar, ko i zizam gwat ndra loŋ ta.

¹⁶Ti hin ndra misi ati taŋ gar ar li jigina tumuŋhoy na, duvuɗ ti papas gar na, a jiginam ndra le kaɓa mohol mugunno hirnga ndra.

¹⁷Wurenna so na, wuluk kuy kuy ar gwat ɓa sey ki ga. I ɓimujuwa le, bonoy ada a sa ndilawa avu buy ndra waɗ ar hay naŋ gar. Naŋ, kpak nga naŋ i malambaˀ wãˀ, naŋ anta i mbur ngi ɓaŋ ɓi ta.»

¹⁸Dar Abigayel a wus vu kutum, a hil ɗaf skat skat cuw, kwenekwene ngi mbaazla cuw, tumuŋ zlum mikiɗahay le, daw musulo sol sol le daram zlum, yi gudubun muˀulo naŋ docok docok skata, helelem ngi yi ngi ˀuruf mija loŋ loŋ skat skat cuw, a juwa taŋ a duba zungu.

¹⁹Dar Abigayel a ɓa gawla naŋhaya: «Cohom a mbuŋ ɗu cici. Yi ra supukum.» Amma, ko a ɓa da zil naŋ Nabala ta.

²⁰A jiɗ ar zungu naŋ, ti naŋ mapi sar ɗum a duba muwã na, naɓa ti Davit ati mizli naŋhay ara poko sar taˀ hiri ng'avu Abigayele. Abigayel ara ji ti taŋ hirnga.

²¹Naɓa Davit ara ɓi a kwacay naŋ zleˀe na: «Zlili ngi mbur nah gar, ya miwaŋ di vu a wuzlaɓuh mikirɗak kirɗak, ko gwat naŋ purla mizizi anta na, i ngataraŋ: gi mezle a miy di ti malambaˀa.

²²Zle wurenna, hã ti miprike, da yi pul mbur le pal ti siifa a wuzla mizli ngi hay Nabalaya na, anja Bumbulvuŋ a giy bonoy mukuyta wãˀ.»

²³Abigayele, naŋ mupura Davite keɗ na, a wus vu, a po sar tir zungu cak. A huruk a mbuŋ Davite, a huruk huruk, a ruwuy.

²⁴Akẽh na, a diɗ a si sar naŋ, a ɓi: «Kumani ɗu, malambaˀa, inga ya, inga ya pal ɗu. Zliv ki puliy ya ngwas beke ɗike, i ɓuw neˀ nga slimiɗ kwa? Ambuh, cine mingiɓi ngi beke ɗike ta kwa!

²⁵Nabal i mbur ngi pula gir ta, a sipi di i baraf ngi slimiɗ naŋ vuna si, a zilaka Nabal gilaw, yo gilaw vuna a tiɓaŋ le gisiŋ. Amma ya ngwas beke ɗike, yi pura mizli ngi sikahay, ka mislina taŋ na ta kumani ɗu.

²⁶Kaɓa Buymisemuŋ misi ti siifa gisiŋ, yo kaɓa ka vunaka misi ti siifa gisiŋ aya na, naŋ kanah ya, matikuw ɓa ki kiɗ hirnga ta, yo ɓa ki pul cuwal ar Nabala ta na, i naŋ Buymisemuŋ vuna gisiŋ. Haˀaw kumani ɗu, mesene ɗikey, yo mizli mawuɗam ngi guw malambaˀ gar na, anja a lumam gwat masa luuma Nabal na ya.

²⁷Kumani, gwat ngi vul beke ɗik musuw di hana, tiɓaŋ, ɓa gawlahay makisoko ka na, a wuɗkaka ar wala taŋ so.

²⁸Ambuh ya ngwas beke ɗike, malambaˀ ɗu na, pula ɓi nah avra. Naŋ kine, i si na le Buymisemuŋ a sa cif ti ka buy ngi wãˀ ati dideˀ ɗikeye, vur ka kumani, ki ga vurum ngi Buymisemuŋ le, yo angi hin ngi siifa ɗik gar na, anta sa lumam malambaˀ avu ka ta.

²⁹Mbur a slikiɗ, a ka mbuŋ da mizli ɓa ngi sipi ɗike, a wuɗ ziza hutuŋ ɗike, amma Bumbulvuŋ ɗik Buymisemuŋ a jiginuw hirnga ɗike le, a wi vu ti ka kutuk a cikeˀe, amma mesene ɗike na, a hiziga siifa taŋ kileŋ avra, kaɓa makicuwuram gwat ti ŋvehŋvehlu.

³⁰Gi mezlehey gar Buymisemuŋ miɓa a sa guw di na, kumani, ti naŋ misa ga le na, a sa cif ti ka buy ngi Israyele.

³¹Anja k'anta sa zil marava a mevel ɗike, kaɓa ki kiɗ hirnga le lambaˀ ta, yo kaɓa ka ti haŋ ɗike, ki ga vu ɗike le, ka jeŋŋe ta. Kumani, da ti Buymisemuŋ misa guw mezle le na, kisa wulka ɓi ɗu ya ngwas beke ɗike keŋ ta kwa.»

³²Davit a ɓa Abigayele: «Yi ra ga sise da Bumbulvuŋ Buymisemuŋ, ngi Israyel mislino ka ar hin hana ngi so ji hirnga ti ya na.

³³Ka vuna ya kwana, yira guw sise asi wuluk ɗik mezle, sise asi ka mitikiy ɓa yi kiɗ hirnga ta, yo ɓa yi pul cuwal ti haŋ ɗu ta na.

³⁴Amma gisiŋ, ti slimiɗ ngi Buymisemuŋ misi ti siifa, Bumbulvuŋ ngi Israyel mitikiy ɓa yi gi malambaˀ ta na, da ki so kutum zleˀe nga ji hirnga ti ya ta na, anja ani hã li ara wun na, a hay Nabala, ko mbur masa ndir ti siifa loŋ anta.»

³⁵Gwat, Abigayel muso di tuwa, Davit a tiɓa ti haŋ naŋ. Joˀ a ɓa Abigayele: «Mi ngi hay ɗike ti zuy. Ani yi cine mingiɓi ɗike le, yi tiɓa le, yo yi guw mezle le.»

³⁶Akẽh na, Abigayil a mo ngi hay Nabala. Keɗ na, Nabal ara gi muguzlum, i muguzlum migisiŋ gisiŋ ngi buyoy. Nabal ara cin ndum a mevele. A wi le wãˀ. Abigayele, ko a ɓaŋ ɓi neˀ le ta, hã avu li.

³⁷Put ngi li naŋ muwun na, naɓa Nabala, mbaazla a wuyuh le muduba. Ngwas naŋ Abigayel a slufaŋ ɓi mucuh tuwa. Akẽh a muɗa didak le da Nabala haɗa, hã a huluɓ hilaɓ hilaɓ.

³⁸Hin kuruˀ a dirba nah ma na, Buymisemuŋ a kiɗa Nabala, a mucu.

³⁹Davit a cine na, Nabal a muc le, a ɓi: «Yi ra ga sise da Buymisemuŋ mijiniˀis asi ya, asi zi ɗu Nabal miziy na! Sise asi naŋ mitikiy ya gawla naŋ, ɓa yi gi malambaˀ ta, yo moˀore ngi Nabal na kwana, Buymisemuŋ a maŋ di le nga hirnga naŋ a muŋ.» Akẽh na, Davit a slin, ara cufuɗaka Abigayele, ɓa a zuɓaŋ ngi ngwasa.

⁴⁰Gawla ngi Davitey a ram ng'avu Abigayel a Karmele, a ɓakaŋ na: «Davit a slino ndra ng'avu ka, ɓa i zuɓukuw, ki tiri ngwas naŋ.»

⁴¹Abigayel a slikiɗ, a guɓ midibiɗ durus a ruwuy, a ɓi: «I sa tiri beke ngi kumani ɗu. Yi juw vu le nga buna sar ngi gawla ngi kumani ɗuwoyo.»

⁴²Abigayel a wus vu ɓa a ru. A jiɗ ar zungu naŋ, yo ngwas beke naŋhay zlum a kisakaŋ, a sipa mislin ngi Daviteye. Naŋ kine, Abigayel a tiri ngwas ngi Davit le.

⁴³Dumbuŋ zleˀe na, naɓa Davit a zuɓ ngwasa le, i Ahinoˀam zuŋ Zizirieyel. Abigayel ati Ahinoˀama, taŋ cuw taŋ, i ngwas naŋhay.

⁴⁴Mikal, ngwas ngi Davite, cine naŋ Sawulo, a vula le da Palti, a Zuɓa le. Palti i mangal ngi Layis ngir hirwuy Galim.