Read South Giziga 1SA 26 Bible Online

1SA 26 - South Giziga bible

1SA 26

¹Mizli ngi Zifey a soko lumaka Sawul a Gibeya. A ɓakaŋ na: «Davite naŋ ada ɗum a muwã Hakila, gweˀ a mbuŋ li mahuvaka ta na, ki si na le kwa mbrike?»

²Sawul a zuɓa jiviɗ, aru nga wuzlaɓuh ngi Zife. Soje Israyeley durmuk makir a ram seˀeŋ nga sipa Davit a wuzlaɓuh ngi Zife.

³Sawul a pa hay naŋ a muwã Hakila, mupuɗak ti li mahuvaka ta, gweˀ avu jiviɗi. Davit a cifi a wuzlaɓuh mikirɗak kirɗaka. Davit a pura na, Sawul a supo di le nga wuzlaɓuh.

⁴A dirba Davit mislin mizli nga cino ɓi nah na, a si na le kuy kuy wãˀ, Sawul a ndilo le.

⁵Akẽh na, Davit a zuɓa jiviɗ, a ndil ar li Sawul mipa hay naŋ anga tuwaŋ. Sawul ati Abner, madiɗa ngi soje naŋhay, mangal ngi Ner, li taŋ mutup tup anga na, Davit a pura le. Sawul ara hinje tup a wuzla, amma sojeheye gar tup tup gun hirnga naŋ.

⁶Davit a zila Ahimelek, mbur Hiti waɗ Abisay, mangal ngi Seruya, sukum ngi Zoˀapa, a cufuɗa taŋ: «Mawuɗ ɓa i ram cuwa hã avu Sawul ar li pi sar naŋ i waka?» Abisay a ɓaŋ na: «I sa ram cuwa.»

⁷Davit ati Abisay ara ndilam ngi duvuɗ avu sojeheye, naɓa Sawul a ro ar li hinje tup a wuzla, waɗ ziwit naŋ dar a ruwuy a dudurum naŋ. Abner ati sojeheye kwana, ara hinjam tup tup gun hirnga naŋ.

⁸Abisay a ɓa Davite na: «Dana na, Bumbulvuŋ a vuluw mesene ɗike le asi haŋ ɗike, puliy jiviɗ ɓa i ra dira ti ziwit dar purla a ruwuyo, ko y'anta sa maŋ di sar cuw ta.»

⁹Davit a ɓa Abisaya na: «Ki kiɗa ta. Mbur, Bumbulvuŋ miwinaŋ le i buy madiɗa na, mbur a zuɓa haŋ, a kiɗa vagay, manja a kutakaŋ ti bonoy na, ada kwa?

¹⁰Joˀ Davit a ɓi: Kaɓa Buymisemuŋ misi ti siifa na, masa zizaŋ hutuŋ i naŋ ti haŋ naŋ. Malla a sa muc ti muc si, malla, a sa kiɗakaŋ ar vurum.

¹¹Buy, Bumbulvuŋ muwunaŋ le i buy na, ɓa yi ja haŋ ava na, anja Bumbulvuŋ a tikiy. Ziwit naŋ misi a dudurum hirnga naŋ na, zuɓa ɓula, waɗ gojogoɗ ngi yam naŋ na, a kum ti taŋ le.»

¹²Davit a zuɓa ziwit ati gojogoɗ misi a dudurum hirnga Sawulo, a cohom. Mbur mupuɗuk loŋ anta, mbur misina ɓi nah neˀ anta, yo mupur gwat neˀ anta. Mizli gar a roko hinjam. Bumbulvuŋ a po sar ti hinje bebezem le ar taŋ, a hinjam le wuɗ wuɗu.

¹³Davit a jiɗ nga muwã vay mekelem, ara cici deŋ a hirnga muwã, kileŋ avu taŋ.

¹⁴Davit a tilo mi da Sojehey, a ɓa Abner, mangal ngi Ner (tuwa) na: «Abner, ki ziliy mi kwa?» Abner a mbiɗaŋ di: «Matilo mi nga slimiɗ buy vuna i waka?»

¹⁵Davit a ɓa Abner tuwa: «Ki mbur mizile takwa, yo mbur misi kaɓa ka anta asi ruwuy Israyele ta. Na ki jigina buy madiɗa ta vur mike? Mbur aru le ti wuzla mizli nga kiɗa buy ɗike zleˀe.

¹⁶Gwat ka maga nah na, naŋ kuy ta. Madiɗa ɗik, Bumbulvuŋ muwunaŋ i buy na, ki jiginaŋ ta. Buymisemuŋ misi ti siifa na, ti slimiɗ naŋ, ki ndilaka le ngi kiɗ vagay vagay. Ziwit ati gojogoɗ ngi yam ngi buy misi a dudurum hirnga naŋ na, ani wurenna, taŋ amaka?»

¹⁷Sawul a si na ˀay ngi Davite le, a ɓaŋ: «Davit, mangal ɗu, i ˀay ɗik gisiŋ kwa?» Davit a mbiɗaŋ di: «Kumani ɗu, i ˀay ɗu.»

¹⁸Joˀ Davit a ɓi ma: «Buy masipiy ya gawla naŋ nder nder na, vur mike? I gi gwat mike, yo i malambaˀ mi avu yaka?

¹⁹Wurenna so na kumani, ambuh, anja ki cine mingiɓi ya gawla ɗik mawuɗ i ɓuw di na takwa? Da i Buymisemuŋ mahizigiɗo ka ng'ar ya, ɓa ki ga kanah na, anja a zãˀã mikuli ɓa a tislaŋ mevele so. Amma da i mizli na, anja Bumbulvuŋ a nisa taŋ. Asi mike na, dana ara ɓulikiy. Hirwuy Bumbulvuŋ muvula da mizli naŋhay na, ara tikikiy ngi cifi araŋ. Kite ara ɓikiy: ‹A ra huruk huruk a mbuŋ kulihey.›

²⁰Na wurenna so na, y'anta wuɗ ɓa i muc kileŋ a mihiri ngi Bumbulvuŋ ta. Asi ka buy ngi Israyele, ki bi le, ki ra sipiy ya busukum ngatara lambaˀa? Ki ra sipiy kaɓa masipam tuuru a muwãhay.»

²¹Sawul a ɓi: «Yi gi mungra le. Mangal ɗu Davit, mawa. Y'anta sa guw malambaˀ mata, asi siifa ɗu naŋ puɗaw haɗa avu ka angi hin misenna. Haˀaw, yi gi gwat ngi gilaway le. Kay, yi zluɓa le haɗa wãˀ?»

²²Davit a mbiɗa: «Ziwit ngi buyo naŋ anihĩ. Mbur purla a wuzla gawla naŋhay a so tiɓaŋ.

²³Mbur gar a wuzla ndra, anja Bumbulvuŋ a wurkaŋ migir naŋ asi kaslsla ati jeŋŋe naŋ. Dana, Bumbulvuŋ a vuluw le na asi haŋ ɗu, yo Bumbulvuŋ a wunuw le ki buy, yi ngum ja haŋ avu ka ta.

²⁴Da siifa ɗike naŋ puɗaw haɗi dana avu ya na, anja siifa ɗu kwana naŋ puɗaw haɗa a mihiri ngi Bumbulvuŋ ya, yo anja a lihiy avu menderehey garaya.»

²⁵Sawul a ɓa Davite: «Mangal ɗu Davit, anja Bumbulvuŋ a ɗuwuluw mi. Naŋ kanah, kisa gi gwat madiɗa madiɗahay, a sa gam gisiŋ gisiŋ si.» Davit a zuɓa jiviɗ naŋ, a ru, joˀ Sawulo kwana a mi ngi hay naŋ ya.