Read South Giziga 1SA 27 Bible Online

1SA 27 - South Giziga bible

1SA 27

¹Davit a wuluk, a ɓi: «Ko mbri, pas purla na, Sawul a sa ziziy hutuŋ ɗu na si. Sey yi kil ng'ar hirwuy Filisti, gwat ya magi fineˀ hana anta. Akẽh so na, Sawul anta sa sipiy asi ruwuy Israyele gar mata, yo naɓa i lih le tisi haŋ naŋ ma.»

²Davit a zuɓa jiviɗe. Mizli skat skat merkeɗ aseˀeŋ, yo a cuh bal ti hay Akis, mangal ngi Maˀok, buy ngi Gat.

³Davit a cifi avu Akis a Gata, naŋ ati mizli naŋhaya, mbur gar ti mizli ngi hay naŋhay. Davit ati ngwas naŋ Ahinoˀam, zuŋ Zizreyel waɗ Abigayel, ngwas ngi Nabal ngi hirwuy Karmel.

⁴Mizli a soko ɓaka Sawulo, Davit a kil le nga Gat, joˀ Sawul a pula sipi Davite.

⁵Ngi hin mekelem ada na, Davit a ɓa Akis tuwa: «Da ki pura le, ya kuy avu ka na buy, anja ki vuliy li ar prok, ɓa yi cifi anga takwa! Walahay ngi buy ma na, gawla ɗik a cifi a ciki ɗike ngi gi mike?»

⁶Kalla si na, Akis a vulaŋ walahay Siklak. Vurˀe, hã dana kwana, Siklak i walahay ngi buy Zudahay aruŋ.

⁷Davit a cifi ar prok ngi Filistihey a zik vi purla ti kiya mufaɗa.

⁸A Siklak Davit ati mizli ngi seˀehey a zlaka kiɗa vu ati Gesurihey, Girzihey waɗ ati Amalekey, asi taŋ i mizli miya cak ngi kẽhey. A cifam zle ar nah kini ngir ti ruwuy Sur, hã sesẽŋ angi hirwuy Ezipte.

⁹Davit a ngizla mizli, zil malla ngwas, ko a pul ti siifa loŋ ta. A tuɓo slahay, tumuŋhoy, ˀaway, zunguhoy, zlogomohoy ati zanahaya ceke. Naŋ mimawa na, aru ngi hay Akis.

¹⁰Akis a cufuɗa Davite: «Ka migi kiɗa vu ngadana na ati waka?» Davit a mbiɗaŋ di: «I gi kiɗa vu ati hirwuy Zuda, vay ngi ruwuy,» malla ati «hirwuy vay ngi ruwuy ngi Yeramelihey.» Yo waɗ ati «hirwuy vay ngi ruwuy Kenihey.»

¹¹Mbur mizile malla ngwasa, Davit a pul ko purla ɓa a soko di ti siifa nga Gata ta. Davit a zluwun, asi a ɓi na: «Ar li kiɗa slire, a sa njikam ndra.» Davit a cifi kahana, yo hin naŋ micifi di angi hirwuy Filisti gar na, gwat ngi gi naŋ, naŋ kahana.

¹²Akis a si na Davite le kuy kuy wãˀ. A ɓi a kwacay naŋ na: «Davit a gi gwat mukuy ta le haɗa avu Israyel, mizli naŋhaya, a sa ndir i gawla ɗu wãˀ so.»