Read South Giziga 1SA 28 Bible Online

1SA 28 - South Giziga bible

1SA 28

¹Ti di nah na, Filistihey a kusoko soje taŋhaya arleˀe, ɓa a gam vurum ati Israyeley. Akis a ɓa Davite: «Sey ki si na sin le, ka ati mizli ɗikeye, kisara gam vurum asi ya.»

²Davit a ɓa Akise: «Naŋ kuy haɗa, ka ti hirnga ɗike, kisa pura gwat ya gawla ɗik masa gaŋ.» Akis a ɓa Davite: «Kuy haɗa, yi sa gi ti ka mijigin a hirnga ɗu ndrehhe.»

³Naŋ kine, Samuyel a muc le zleˀe si. Israyeley gar a tuwaka vagay naŋ le si, yo ara dikaka a Rama walahay naŋ. Sawul a tika jiviɗ ngi pura daˀasa le asi ruwuy naŋ.

⁴Filistihey a kusom, ara pam sar a Sunem. Sawul kwana, a kuso Israyeleye gar, a pam sar a Gilboˀa.

⁵Sawul mupura Filistihey keɗ ar li pi sar taŋ na, a zluwun le haɗa, yo didaka ara muɗaŋ haɗa haɗa.

⁶Sawul a cufuɗa Buymisemuŋ na, ko Buymisemuŋ a mbiɗaŋ di ta, ko ar musuwun, ko ti gwat mipal ngi masay, ko ti mi ngi mijiviɗey, a mbiɗaŋ di ta.

⁷Sawul a ɓa gawla naŋhaya: «A ra sipikiy ngwas mupura daˀas, ɓa yi ra pur ava.» Gawla naŋhay a ɓakaŋ: «Ngwas mapur vuna ada a En-dor.»

⁸Sawul a mbiɗa zanahaya, a sin mata, aru waɗ mizli cuw sek aseˀeŋ. A ndilam a hay ngwas tuwa ngi duvuɗu, joˀ Sawul a ɓaŋ na: «Inga puriy daˀas, yo ɓa ki bigiy mbur ya masa ɓuw di na takwa.»

⁹Ngwas tuwa, a ɓaŋ na: «Pura ɗi, ka vuna, gwat Sawul miga na, ki si na le ta kwa: Ɓi ngi pura daˀasa, a susuymo le asi ruwuyo. Ki piy mazaɓ ngi muc kahana vur mike?»

¹⁰Sawul tuwa, a hudum ti Buymisemuŋ, a ɓi: «Buymisemuŋ naŋ ti siifa, ko gwat malumuw ar ɓi hana neˀ anta.»

¹¹Ngwas tuwa, a ɓaŋ: «Ki wuɗ vuna ɓa i ziluw waka?» Sawul a ɓaŋ: «Ziliy Samuyel.»

¹²Ngwas tuwa, a pura Samuyele keɗ na, a widi ti gidaŋ. A ɓa Sawulo, ki tikiniy vur mike? Ki Sawul ngbaŋ.

¹³Buy a ɓaŋ: «Ki zluwun ta. Na ki pur mike?» Ngwas tuwa, a ɓa Sawulo, yi pur gwat ka mizizik mabo ti ruwuy.

¹⁴Sawul a ɓaŋ: «Naŋ mbrike?» Ngwas a mbiɗaŋ di: «Majiɗawa i mbur midigila. I mumbuza le ti godo.» Akẽh na, Sawul a si na le i Samuyel. A huruk huruk a ruwuy.

¹⁵Samuyel a ɓa Sawulo: «Ki giy ngaˀa ngi muska vu ɗu, ki bo ti ya vur mike?» Sawul a mbiɗaŋ di: «Ɓi ada giriy haɗa haɗa. Filistihey ara gam vurum ti ya, na Bumbulvuŋ a mbiɗi duba le avu ya. N'anta mbiɗiy mi mata, ko ti balam mijiviɗ naŋhay, ko ar musuwun anta mbiɗiy di mata, ya miziluw na, anja ɓa ki bigiy gwat ya magaŋ.»

¹⁶Samuyel a ɓaŋ na: «Da Buymisemuŋ a mbiɗi duba le avu ka, yo a tiri mesene ɗik le na, ka macufuɗ na ngi gi mi ska?

¹⁷Buymisemuŋ a gi di i gwat ya miɓa zleˀe, yi ɓuw le: Buymisemuŋ a tiɓa buyo le avu ka, a vula le da mbur mekelem, da Davit.

¹⁸Asi mike na, ki cine mi ngi Buymisemuŋ ta. Naŋ muɓuw ɓa ki ngizla Amalekey na, ki ngizla taŋ ta. Gwat magi dana kahana avu ka na, vurˀe.

¹⁹Yo ka ati Israyeley vuna, Bumbulvuŋ a sa vulukum a haŋ Filistihey. Tiprike, ka ati ziri ɗikeye, kisa ndiram avu ya, yo soje Israyeley vuna, Buymisemuŋ a sa vula taŋ asi haŋ ngi Filistihey.»

²⁰Sawul micina mingiɓi ngi Samuyele cin na, a diɗ soɗoɗ a ruwuy, asi a zluwun le haɗa. Yo ma na, gidaŋ anta ava ta, asi hiipas jom ti duvuɗ naŋ, ko a zum gwat kuɗaˀ le ta wãˀ.

²¹Ngwas tuwa, a so ng'avu Sawulo, a pura keɗ na, naŋ ngirkiy lambaˀ. A ɓaŋ: «Kˀada ki pura kwa, yo beke ɗike, yi cinuw mi le. A ndir mata, ɓa yi mucu, amma mingiɓi ɗik ka miɓiy di na, yi ga le.

²²Na wurenna, ka kwana, cine mi ngi beke ɗike ya. Kwaɗay i vuluw makala neˀ ɓa ki zumaŋ. Ɓaka masa zuɓa jiviɗ na, ki lum gidaŋ le avu vu.»

²³Sawul a sli himaˀ, a ɓi: «Y'anta zum gwat ta.» Amma gawla naŋhay waɗ ngwas tuwa, a hurdumom di ɓa a zum na si, a cine taŋ mi. A slikiɗ ti ruwuyo, a cifi a mi arngawo.

²⁴Ngwas tuwa naŋ da ti zuŋ sla muzlumbura a haya. A wus vu, a slaka ˀay naŋ. A hil hapa, a fukuɗa, a di di ɗaf manja ˀis angaŋ.

²⁵A so di da Sawul ati gawla naŋhaya, a zumakaŋ. A dirba nah, a zuɓam jiviɗ, a mam a muŋ kalla ngi duvuɗ nah.