Read South Giziga 1SA 29 Bible Online

1SA 29 - South Giziga bible

1SA 29

¹Filistihey a kusoko soje taŋhaya gar a Afek. Israyeleye kwana, taŋ a pam gweˀ avu miviɗiviɗi ngi yam a Zisreyel.

²Buy Filistihey ara cohom tulɓoŋ tulɓoŋ ti soje taŋhaya, soje durmuk durmuk, yo soje skat skata. Davit ati mizli naŋhay waɗ Akise, a cohom a dirba wãˀ.

³Buy Filistihey a ɓam na: «Heber tayna i wanahay maka?» Akis a mbiɗa da buy Filistiheye: «I Davit, gawla ngi Sawul, buy ngi Israyel! Ani a gi le vi pal malla cuw avu ya. Zle ti naŋ mupulo buy naŋ mbak hã dana na, yi lum gwat ngi mbiɗaŋ hirnga aseˀe t'aruŋ.»

⁴Buy Filistihey a jam mevel ar Akise, a ɓakaŋ: «Ɓula mbur nah ɓa a mi ng'ar li ka muvulaŋ di, ɓa a cifi anga na. Anja aru asi ndra ng'ar vurumo ta, vur naŋ masa mbuɗo hiri a muŋ ngi kiɗa vu ati ndra. Mbur misenna a sa mi, ɓa buy naŋ a hĩyãŋ na mbri mbrike? Na sey da aru le ti hirnga ngi mizli ndrahay takwa?

⁵I puyukam hirnga ta, ngwasay mazlam dimis ti ɓuruk na, ti Davit hana vuna takwa? A ɓam: Sawul a kiɗ mizli durmuk purla, Davit a kiɗ nga naŋ mizli durmuk durmuk mbeˀmbeˀe?»

⁶Akẽh na, Akis a zila Davite, a ɓaŋ: «Buymisemuŋ naŋ ti siifa, ar slimiɗ naŋ na, ka, ki mbur mikaslsla. Yi hĩyã le ɓa ki bi, ki ru asi ya ng'ar vurumo zleˀe, asi zle ti ka muso ndol a hay ɗu hã dana na, yi lum gwat malambaˀ avu ka ta. Amma k'anta cira hiri da buyoyo ta.

⁷Ka mi ngi hay, aru ti zuy so. Naɓa k'anta sa gi gwat neˀ ngi ja mevel da buyoyo ta.»

⁸Davit a ɓa Akise: «Na yi gi gwat mi ska buy? Ya gawla ɗike, zle ti ya mi ci kulaˀ ar slra ɗike, hã dana na, ki lum gwat mi ngi mbiɗiy hirnga aseˀe ta. Ɓa i ru asi ka, buy madiɗa ɗu nga kiɗa vu ati mesene ɗikeye na, i lum jiviɗ naŋ ta vur mike?»

⁹Akis a mbiɗa da Davite: «Haˀaw yi si na le, i hĩyuw haɗa kaɓa ki modro ngi Bumbulvuŋ. Amma buy Filistihey a ɓam na: Anja ki ru asi ndra ng'ar vurumo ta kini.

¹⁰Tiprike so na, slikiɗam ati mizli ngi buy ɗikey mikisoko ka. Li muwun le wun si na, slikiɗam a ram.»

¹¹Cẽẽt ngi miprik prike, Davit ati mizli naŋhaya, a slikiɗam, a ram nga hirwuy ngi Filistiheye. Amma Filistiheye, taŋ a ram nga Zisreyel.