Read South Giziga 1SA 3 Bible Online

1SA 3 - South Giziga bible

1SA 3

¹Samuyel, mangal meciɗeke, ara ga slra da Buymisemuŋ a ciki Eli. Ti di nah na, mingiɓi ngi Buymisemuŋ anta wãˀ wãˀ ta, pura gwat Bumbulvuŋ mabiga na kwana, i gwat magi ndrehhe ta.

²Ti di nah na, Eli a gi midigila le, anta pur mata, a hin le tup ar li naŋ mahin yõyyõ.

³Naɓa lampe ngir hay ngi Bumbulvuŋ naŋ da dizze a aruŋ, yo Samuyele, naŋ da tup a hur hay ngi Buymisemuŋ, ar li akoti ngi Buymisemuŋ misi anga na.

⁴Buymisemuŋ a zila Samuyele, Samuyel a zilaŋ mi: «Yowi, y'ani.»

⁵A kil nga ciki Eli, a ɓaŋ: «Ka miziliy na, y'ani.» Eli a mbiɗaŋ di «Yi ziluw ta, mi, ara hin.» Joˀ Samuyel a mi, ara hin.

⁶Buymisemuŋ a zila Samuyel ava ma. Samuyel a slikiɗi, ara luuma Eli, a ɓaŋ: «Ka miziliy na, y'ani.» Eli a mbiɗaŋ di: «Yi ziluw ta mangal ɗu. Mi, ara hin.»

⁷Naɓa Samuyele, a si na Buymisemuŋ t'aruŋ zleˀe. Mingiɓi ngi Buymisemuŋ a njik ava t'a ruŋ.

⁸Buymisemuŋ a zila Samuyele sar mimakir naŋ ava ma. A slikiɗ ara luuma Eli. A ɓaŋ: «Ka miziliy na, y'ani.» Dar Eli a sla wala nah muduba, mazila mangal na i Buymisemuŋ.

⁹Eli a ɓa Samuyele na: mi, ara hin. Yo da mbur a ziluw le na, kisa ɓaŋ: «Ka ɓi Buymisemuŋ, gawla ɗik ara cinaŋ.» Joˀ Samuyel a mi, ara hin ar li naŋ a muŋ

¹⁰Buymisemuŋ a so deŋ akẽh. A zila Samuyele kaɓa hõyyõ zleˀe tuwa ma: «Samuyel, Samuyel.» Samuyel a ɓaŋ: «Ka ɓi, gawla ɗik ara cinaŋ.»

¹¹Buymisemuŋ a ɓa Samuyele: «Ani, i wuɗ i sa gi gwat pal angi hirwuy Israyele, hã ko wa gar misa cine le na, a sa zumaŋ hirnga.

¹²Angi hin nah na, gwat ya miɓi i sa ga da Eli waɗ da hay naŋ gar na, yi sa zla, i ga wãˀ muduba.

¹³Yi ra ɓaŋ di, yi sa ga kiita da hay naŋ hã ngi sete, asi malambaˀ naŋ. Zir naŋhay ara zaka Bumbulvuŋ, a si na le ngbaŋ, amma ko a buca taŋ ta.

¹⁴Vurˀe, i dumvu muy ngi Eliheye. Malambaˀ ngi muy ngi Elihey na, ko gwat masa puya anta ndiɗaˀ wãˀ, ko mikuli, ko gwat ngi vul ti vul da Bumbulvuŋ anta sa puya avra gu ta.»

¹⁵Samuyel a ndir tup a haya, hã li a wun, akẽh, a wuna miviŋ ngi hay ngi Bumbulvuŋ. Samuyele, gwat Bumbulvuŋ mibigaŋ di, naŋ mupura na, a zluwun ngi ɓa da Eli.

¹⁶Eli a zila Samuyele, a ɓaŋ: «Mangal ɗu Samuyel.» Samuyel a zilaŋ mi: «Y'ani»

¹⁷Eli a ɓaŋ: «Buymisemuŋ vuna a ɓuw mbrike?» Inga ɓiy di, ki ɗumiy di ta. Ɓi naŋ muɓuw di gar na, da ki ɗum le purla, ki ɓiy di ta na, anja Bumbulvuŋ a guw kiita mihimaˀ.

¹⁸Dar Samuyel a ɓaŋ ɓi Buymisemuŋ miɓaŋ taŋ tuwa gar, ko a ɗumoŋ pal ta. Eli a ɓaŋ: «I Buymisemuŋ. Gwat naŋ mapura kuy gar na, anja a gaŋ.»

¹⁹Samuyel ara gil, Buymisemuŋ naŋ da ati naŋ. Mingiɓi naŋhay gar na, a pul ko pal a diɗ a ruwuy ta.

²⁰Naŋ kine, angi hirwuy Israyel gar, zle a Daŋ hã a Berseba na, a sinaka le Samuyel i mijiviɗ mikaslsla ngi Buymisemuŋ.

²¹Buymisemuŋ ara biga vu naŋ ava ma a Silo. Asi mike na, Buymisemuŋ, a biga vu da Samuyel a diga, ɓa a bigaŋ mingiɓi naŋ.