Read South Giziga 1SA 30 Bible Online

1SA 30 - South Giziga bible

1SA 30

¹Ar hin mimakir naŋ, ti Davit ati mizli naŋhaya mindilam a Sikilaka na, dambalaka, Amalekey a gam kiɗa vu le ati hirwuy Zuda vay ngi ruwuy, waɗ ati Sikilaka. A zumaka walahay Sikilaka pay pay, yo a wuraka le ma.

²A jaka ngwasaya, ziri ati mizli madiɗahaya, a gam taŋ beke, amma ko a kiɗam mbur pal ta ɓula. A jaka taŋ, a ram taŋ a haŋ.

³Davit ati mizli naŋhaya, ti taŋ mindilam ar walahaya, keɗ na, i muwura le, yo ngwasaya, ziri taŋ mizilehey ati mongosohoyo, a ram ti taŋ le.

⁴Davit ati mizli ngi seˀehey a zlaka tuwuy, a tuwam a tuwam, hã gidaŋ ngi tuwuy anta mata.

⁵Ngwas ngi Daviteye, cuw taŋ, a jaka taŋ le ya. I Ahinoˀam, ngir walahay Zisreyel ati Abigayel, ngwas ngi Nabal ngir walahay Karmel.

⁶Yo Davite, ara lik haɗa haɗa, asi mizli ara ɓam ɓa a kuypakaŋ. Mbur gar na, ara lik ti wulka ziri naŋ mizilehey ati mongosohoyo. Amma Davit a lum gidaŋ le, mbele Bumbulvuŋ Buymisemuŋ, naŋ.

⁷Davit a ɓa masay Abiyatar, i mangal ngi Ahimelek: «Ambuh, siy ti zana ngi mikuli na takwa.» Abiyatar a saŋ ti zana ngi mikuli tuwa.

⁸Dar Davit a cufuɗa Buymisemuŋ: «Da yi sipa mivi vu tayna le na, zliv i ra ja taŋ is kwa?» Buymisemuŋ a mbiɗaŋ di: «Sipa taŋ, ki ra ja taŋ is, kisa tuɓo mizli ɗikeye.»

⁹Davit aru ati mizli aseˀe skat skat merkeɗe, ara ndilam a mizaw Besor. Mizli mekelemey a ndiram le a dirba.

¹⁰Davit ara sipa taŋ nga mbuŋ ava ti mizli skat skat mufaɗ aseˀe. Mizli skat skat cuw a ndiram ar li nah. A giram le, a ngiraka mizaw Besoro gu ta.

¹¹A jam hirnga ti mbur Ezipte a duba gala. A jakaŋ, a ram di ng'avi Davite. A vulakaŋ ɗaf a zum, yo yam, a si.

¹²A vulakaŋ wurslak avu yi ngi ˀuruf mukutumo arleˀe waɗ yi ngi gudubun muˀulohoy dokocok dokocok cuw. Yo a dirba nah, mbur tuwa muzum gwat na, gidaŋ a so le avu vu muduba so. Asi mike na, a go le hin makir, duvuɗ ati papas gar, ko a zum gwat ta, a si gwat ta.

¹³Davit a cufuɗaŋ «Muwuw i waka? Ki so ti damaka?» Mbur tuwa, a ɓi: «Yi gawla Ezipte, yi beke ngi mbur Amalek. Buy ɗu a puliy mbak fuk, asi ya gu ta zleˀe. Dana a gi le hin makir.

¹⁴Zleˀe na, mizli Kretihey, Yudehey ati Kalepey na, micam mikiɗaka taŋ tir vay ngi ruwuy ngi li taŋhay na, i ndra. Yo i wuraka hirwuy Sikilaka le ma.»

¹⁵Davit a ɓaŋ: «Ki ru ti ya gu ng'avi mivi vu tayna kwa?» A mbiɗaŋ di: «Hudum a mbuŋ ɗu ti slimiɗ ngi Bumbulvuŋ, k'anta sa kiɗiy ta, yo k'anta sa mi ti ya ng'asi haŋ ngi buy ɗu ta. Naɓa yi sa ru ti ka ng'avi mivi vu tayna.»

¹⁶Joˀ aru ti Davite so. Amalekey a zliɗam hirnga le zlar hirwuyo, ara zumam, ara sam.

¹⁷Zle ngi li, hã pastaˀ ngi li naŋ muwun mekelem na, Davit ara ngizla taŋ. Mbur milih purla anta, sey gawlahay skat skat mufaɗ mijiɗam a duba zlogomohoy, a kilam le.

¹⁸Gwatay Amalekey mihilaka taŋ gar na, Davit a tuɓo taŋ le. Yo ngwas naŋhay mucuw tuwa, a loho taŋ aya.

¹⁹Ziriy ati mizli madiɗahay, ziri taŋ mizilehey ati mongosohoyo, mbur mindir pal, ɓa a loho di ta na, anta. Zlili mihilaka ti vurumo cineˀe. Gwatay mesene taŋhay mihilika taŋ gar na, Davit a tuɓo taŋ le.

²⁰Gwat misãmi, memeɗehey ati madiɗahay gar na, Davit a tuɓo taŋ le. Mizli maram ɓaˀɓaˀ a mbuŋ ginewey, a ɓam na: «Hana i zlili ngi Davit mulumo di ar vurum.»

²¹Mizli miskat skat cuw, migiram le, a sipaka Davite gu ta, yo mupulaka taŋ zleˀe a mizaw Besor tuwa. A boko nga ji hirnga ti Davit waɗ ti soje naŋhaya. Davit a kiraham ati soje naŋhaya ngavi taŋ, a ja taŋ haŋ.

²²Mizli miki saka Davit tuwa, a wuzla taŋ misi moˀorehey, yo hĩhĩyahay, a gam mi wuwwo, a ɓam: «Zlili ndra mutuɓoko di ar vurum na, ndr'anta vulaka taŋ ta, asi taŋ a ram asi ndra ta. Sey i vulaka taŋ ngwas taŋhay ati ziri taŋhaya ɓula. Anja a hilaka taŋ, a cohom.»

²³Amma Davit a ɓa taŋ: «Sukum ɗuwoy, gwat Buymisemuŋ muvula ndra di na, anja ki gam di kanah ta. Naŋ a jigina ndra le, yo mizli mivam ndra gwatay, yo muzumaka walahay Sikilak na, a vula taŋ le asi haŋ ndra ta kwa!

²⁴Ɓi kum hana, mbur masa cunukum di anta. Naŋ kine, mbur gar na, a lum mi nga naŋ ar zlili ndra mutuɓoko di ar vurumo. Mbur muru le ar li kiɗa vu ati mbur micifi ngi kutuko gwatay gar na, a wuɗkaka ar wala taŋ.»

²⁵Zle ti hin nah, wuluk mujuwa nah na, Davit a tiri di i ɓimuɗuva da Israyeley gar, naŋ da gi slra hã dana aruŋ.

²⁶Taŋ mumoko nga Sikilak na, Davit a hil cah avu zlili mutuɓoko di ar vurum tuwa, waɗ a slin di da ngama naŋhay, mizli micawwa ngi Zudahay, a ɓa taŋ: «Gwat mutuɓoko di ar vurum avu mesene ngi Buymisemuŋhoy tuwa na, tiɓaka mi ngi kum ani ya.»

²⁷Yo a slin di da ngi Beteley, da ngi Ramotoy tir vay Negev, da ngi Yatirey,

²⁸da ngi Aroˀer, da ngi Sifmotoy, da ngi Estemoahay,

²⁹da ngi Rakahay, da ngir walahay ngi mizli Yeramelihey ati ngi Kenihey,

³⁰da ngi Hormahay, da ngi Bor-Asanay, da ngi Atakay,

³¹da ngi Hebroŋhoy, waɗ lihey gar, Davit mucuh le ti kẽh gar ati mizli ngi seˀeheye na, a slinaka taŋ ti gwata.