Read South Giziga 1SA 31 Bible Online

1SA 31 - South Giziga bible

1SA 31

¹Filistihey a gam kiɗa vu ati Israyeley a muwã Gilboˀa. Israyeley a kilam ti Filistiheye, hã a kiɗam mizli haɗi a wuzla Israyeleye.

²Dar Filistihey a gucoko Sawul ati ziri naŋhaya guc. A kiɗaka Zonataŋ, Abinadap waɗ Malki-Suwa, ziri ngi Sawuloyo.

³Gidaŋ ngi kiɗa vu gar a mbiɗi hirik ng'ar Sawul. Misi luvutoy a puraka le. Sawul mupura misi luvutoy tuwa na, a gaŋ zluwun haɗa wãˀ.

⁴Sawul a ɓa gawla naŋ majijiraŋ gwat ngi vurumoyo: «Muɗa maslalam ɗike, kiɗiy vagay, asi y'anta i wuɗ ɓa i Filistihey, manja ci mizaw tayna makiɗikiy, ɓa a singiram ar ya ta.» Amma gawla naŋ majijiraŋ gwat ngi vurumo a ngum ta, asi ara zluwun haɗa teˀe. Akẽh na, Sawul a muɗa maslalam naŋ waɗ a diɗ kuɓ angaŋ.

⁵Gawla mijijira gwat ngi vurum ngi Sawulo, a pura na, Sawul a muc le. Naŋ tuwa kwana, a diɗ kuɓ ar maslalam naŋ ya, a micam cuwa ati Sawulo.

⁶Sawul, ziri naŋhay mimakireye, gawla naŋ majijiraŋ gwat ngi vurumoyo, waɗ mizli naŋhaya gar, taŋ jom a micam tapasaŋ.

⁷Israyeley misi ada a duba sozo, yo waɗ misi a duba Zurdeŋheye, a pulaka walahay taŋhaya, a kilam. Asi a cinaka le, Israyeley a kilam le, yo Sawul ati ziri naŋhay a micam le ma. Joˀ Filistihey a soko cifam ar walahay ngi Israyeleye.

⁸Put ngi li naŋ muwun na, Filistihey a soko cukoko zana ngi mizli mikiɗahaya. A lumaka vagay ngi Sawul ati ziri naŋhaya makir taŋ ɓaˀ ɓaˀ a muwã Gilboˀa

⁹A bukoko hirnga ngi Sawulo, waɗ a cukokoŋ gwat ngi vurumoyo, a bulam ti hirnga naŋ angi hirwuy ngi Filistiheye, bal ti tila mi ti ɓi nah, ar hay ngi kuli taŋhaya, yo waɗ a tilam di mi a wuzla mizli.

¹⁰Gwat ngi vurum ngi Sawuloyo, a paka taŋ angi hay ngi kuli taŋ Astarte, waɗ a luwaka vagay naŋ law avu mohol ngi walahay Bet-Seyaŋ.

¹¹Amma, mizli ngi Yabesey, hirwuy Galaˀata, gwat Filistihey migaka da Sawul na, a cinaka le.

¹²Mizli gambara mifineˀ mekelemeye, a zuɓam jiviɗ, kap ngi duvuɗo ar li ru, vagay ngi Sawul ati ngi ziri naŋhaya, a cukoko taŋ ti vu mohol ngi walahay Bet-Seyaŋ. A soko taŋ nga Yabes, a wuraka taŋ a diga.

¹³A cikila tesleye, a dikaka taŋ asi widis ada, a zilaka Tamaris a Yabes. Akẽh na, a gam dalyam hin tarnaˀa.